Zwjazk ZVON před rozpućom
Budyšin (UM/SN). Zaměrowy wobchadny zwjazk Hornja Łužica-Delnja Šleska (ZVON) steji před rozpućom swojich stawiznow. Wobaj sobustawaj zwjazka – wokrjes Budyšin a Zhorjelc – matej wšelakorej předstawje wo přichodnym wusměrjenju zjednoćenstwa.
Kreatiwne hłójčki prašane
Na forumje Łužica w Běłej Wodźe kulturu jeno skrótka wobjednali
Běła Woda (AK/SN). Kulturnicy a kreatiwne hłójčki móža so nastupajo strukturnu změnu we Łužicy sobu angažować. Tole podšmórny Claudia Muntschick, wot lońšeho junija rěčnica Saskeho centruma za priwatnu kulturu a kreatiwne hospodarstwo wuchodneje Sakskeje, na njedawnym Běłowodźanskim forumje Łužica. Architektka je zdobom jednaćelska nawodnica załožby Domu Schminke w Lubiju. Tónle dom fabrikanta nasta po naćisku znateho architekta Hansa Scharouna (1893–1972) w lětomaj 1932 a 1933.
Tež hdyž hišće zyma knježi, ratarjo na polach dźěłaja. Tak su ...
Jězorina z jasnym profilom
Turistikarjo chcedźa so bóle na swójby a čěskich hosći wusměrjeć
Wojerecy (AK/SN). Z ćežišćemi kolesowanje, dowol na wodźe a přetworjaca so krajina ma so łužiska jězorina na turistiskich wikach po cyłej Němskej etablěrować. Poskitki pak chcedźa bóle na swójby a wopytowarjow z Čěskeje wusměrjeć. „Trjebamy jasny profil. Změnu krajiny móža wopytowarjo bjezposrědnje sobu dožiwić, štož je nastupajo wubědźowanje na turistiskich wikach jónkrótne. Tohorunja skruća to identifikaciju“, podšmórny jednaćelka mjezy přesahowaceho turistiskeho zwjazka Łužiska jězorina Kathrin Winkler na prěnim turistiskim dnju zawčerawšim we Wojerecach. Něhdźe 120 wobdźělnikow je na fachowy dźeń do kompjuteroweho muzeja Konrada Zusy přišło. Mjez nimi běchu zastupjerjo towarstwow, komunow, zarjadow, institucijow a kubłanišćow.
Turistiski dźeń steješe pod wodźacym hesłom „Nowe wiki wotkryć“. Na dźěłarničkach wobjednawachu přitomni temy wólny čas, přichilnosć swójbam, infrastrukturu a komunu kaž tež čěske wiki.
Wuměnjenja za ludźi a skót budu polěpšene
Ratarske zawody Gröbner z Döbelna chcedźa Ralbičansku kormjernju swini přetwarić
Kónc lěta chcedźa ratarske zawody Gröbner planowane twarske naprawy na ležownosći Ralbičanskeje kormjernje swini zahajić, a hač do kónca lěta 2019 maja wone zwoprawdźene być. To wuswětli prokurist a překupski nawoda zawodow Gröbner Rico Krause na naprašowanje. Žro naprawow je wotstronić tři chlěwy, a na jich městnje matej dwaj nowej nastać. Dalše štyri wobstejace chlěwy chcedźa přetwarić. Město sydom změja potajkim jenož hišće šěsć chlěwow, hdźež změja swinje wjace městna. Předwidźane je mnóstwo skoćatow wot dotal 6 840 na 11 392 powjetšić. Modernizacija ma nimo toho wuskutki na čłowjeka a wobswět pomjeńšić a wuměnjenja skotu polěpšić. Swinje z wjace městna profituja – přichodnje změja telko, zo móža sej same swoju buchtu w chlěwje wupytać.
Mjezy přesahowace zhromadne dźěło wolóžić
W geoparku UNESCO Mužakowski zahork maja lětsa wjele dźěła, kaž jednaćelka tamnišeho parkoweho zarjadnistwa Nancy Sauer rozprawja. Ćežišćo dźěławosće je harmoniske wuwiće cyłeho terena geoparka, kotryž němskej zwjazkowej krajej Braniborsku a Saksku z wojewódstwom Lubuskie w Pólskej zwjazuje.
Zakład skutkowanja je směrnica Europskeje unije z lěta 2006, wopisowaca Europu zwjazowace teritorialne zhromadne dźěło. Směrnica twori prawniske ramikowe wuměnjenja za to, załožić mjezy přesahowacu organizaciju, z pomocu kotrejež je kooperacija móžna. Wosebje zesylnić chcedźa akterojo hospodarsku, socialnu kaž tež teritorialnu zwjazanosć. Za to trěbne su zmysłapołne naprawy, kotrež ćeže pomjeńšeja – předewšěm we wšelakorych regionalnych zarjadach, hdźež maja často wšelake předpisy a směrnicy. Hranicy krajow njeměli hižo zadźěwk być, tohodla wolóža směrnica EU teritorialne zhromadne dźěło.
Bjez wokołopućow zaměr docpěli
Bjez wokołopućow su wučomnicy Wojerowskeje towaršnosće za wu- a dalekubłanje (GAF) swój zaměr docpěli. Njedawno su tam jědnaće wučomnikow a dweju překubłancow z wukubłanja wuwjazali. Jedyn z prěnich gratulantow bě nowy jednaćel GAF Torsten Eckelmann, kiž zastojnstwo wot noweho lěta wukonja.
Minjene lěta wukubłachu so młodostni w zawodach z dołhej tradiciju, tak na přikład w Kamjenjanskej kaolinowni a w Bóščanskej Zeibinje.
Ze wšěch zawodow su zastupjerjo na wuwjazanje swojich wučomnikow do Wojerec přijěli. Mjez nimi běchu tež wučerjo Běłowodźanskeho powołanskošulskeho centruma, hdźež je wjetši dźěl młodostnych swoje teoretiske wukubłanje absolwował. Wšitcy dźě mějachu zhromadny zaměr, zo wučomnicy swoje wukubłanje wuspěšnje zakónča, štož je so poradźiło.
Tež Serbja tema na wikach ITB byli
Hornja Łužica je jedna z najmnohotnišich dowolowych regionow Němskeje. Wo tym móžachu so wopytowarjo njedawneje Mjezynarodneje turistiskeje přehladki w Berlinje přeswědčić. Tradicije a nałožki Serbow běchu tam tohorunja tema.
Budyšin (SN/BŠe). Dobre hospodarske połoženje w Němskej stara so wo dobru naladu mjez ludźimi. Znajmjeńša začuwachu to zarjadowarjo lětušeje Mjezynarodneje turistiskeje přehladki (ITB) w Berlinje. Hladajo na 110 000 fachowych a dalšich 60 000 priwatnych wopytowarjow běchu organizatorojo z ličbu a wothłosom přewšo spokojom.
W sakskej hali prezentowaše so mjez druhim Marketingowa towaršnosć Hornja Łužica-Delnja Šleska (MGO). Sobu we wačoku měješe hnydom tři nowe tematiske turistiske wudźěłki – Kulturnowotkrywanski kraj, Dźěćaca dožiwjenska krajina a dźiwowpołna kónčina. Wosebity wjeršk wikow bě spožčenje myta Złotych měšćanskich wrotow. We wubědźowanju docpě imageowy film hornjołužiskeho zwjazka šesćiměstow z mjenom „Wotkrywanske města w Hornjej Łužicy“ druhe městno w kategoriji region.
W bibliotece chcedźa „serbski róžk“ zarjadować
Kamjenc (SN/mwe). Kamjenska měšćanska biblioteka chce „Serbski róžk“ z knihami a dalšimi medijemi za Serbow a za tych, kotřiž so za nich zajimuja, zarjadować. To zdźěli Thomas Käppler, referent Kamjenskeho wyšeho měšćanosty a nowinski rěčnik města, Serbskim Nowinam na naprašowanje. „To so přichodnje stanje, wosebje hladajo na dźěćacu literaturu. Bohužel je próstwa Załožbje za serbski lud wo financne spěchowanje serbskorěčnych titlow zwrěšćiła. Wopodstatnili su wotprajenje z pokiwom, zo słušeja wulke dźěle Kamjenca k serbskemu sydlenskemu rumej, tak zo Lessingowe město w tym padźe spěchować njemóža“, Käppler wuswětli. Nětko chce to město Kamjenc ze swójskimi srědkami po małych krokach realizować.
Nowa sezona zahajena
Dźiwaja na wjace dwurěčnosće a serbske poskitki w parku błudźenkow
Wochozy (CK/SN). Swoju 15. sezonu je wčera Wochožanski park błudźenkow zahajił. Za to su tam na małej žurli wopytowarskeho centruma wustajeńcu „W holi – Serbskosć na nasypje“ wotewrěli. Lěta 2012 wot Budyskeho Serbskeho muzeja koncipowana přehladka pokazuje proces přewróta we łužiskej holi. Tehdy, tak rjekny Manfred Hermaš, njeby jeho nichtó přerěčeć móhł, lawdaciju přednjesć. Přejara běchu wo brunicu wojowali. „Mjeztym smy so w Slepjanskim regionje nowym wuměnjenjam přiměrili a za serbskosć w Slepom něštožkuli docpěć móhli“, rozłoži župan župy „Jakub Lorenc-Zalěski“. Podpěra Swobodneho stata Sakskeje a Zwjazka pak je dale trěbna. „Dźensa njesteji jeno přichod Serbow na hračkach, ale cyłeje Łužicy“, Hermaš wuzběhny. Wo hudźbne wobrubjenje postara so Slepjanski serbski dźěćacy chór. Dalšu wustajeńcu přihotuja wo serbskim žiwjenju we Wochožanskej wosadźe.
