Turistiski region rozšěrić
Zaměrowy zwjazk Łužiska jězorina dotalne dźěło bilancował
Hamor (AK/SN). Přez mjezy kraja skutkowacy turistiski zwjazk Łužiska jězorina je minjene pjeć lět cyle zaměrnje za domjacy dowolowy region wabił. „Wot lěta 2012 smy so na 46 wikach ze swójskim informaciskim stejnišćom wobdźělili. Na dalšich 32 wikach wobdźělichmy so zhromadnje z partnerami.“ Tole zdźěli zastupowacy jednaćel zwjazka Marcus Heberle na minjenym posedźenju zaměroweho zwjazka Łužiska jězorina. Mjez wosebje wažnymi terminami běchu lětsa Drježdźanske pućowanske wiki, Kamjenske WIR, Praske For bike a Wojerowske jězorinowe wiki.
Mjeztym wobhospodarja zwjazk tež turistiskej informaciji w Złym Komorowje a we Wojerecach. „Wojerowska je wosebje wažna, dokelž leži wosrjedź jězoriny. Wona je přijomna, derje wuhotowana a hišće moderniša hač ta w Złym Komorowje“, rjekny Heberle.
Zawodaj z perspektiwu
Bombardier skónčnje koncept přichoda předstajił
Budyšin/Zhorjelc (SN/BŠe). Po dołhim čakanju je kanadiski koncern Bombardier wčera w Hennigsdorfje přichodny koncept němskich stejnišćow, mjez druhim zawodow w Budyšinje a Zhorjelcu, wozjewił. Kaž šef Bombardiera w Němskej Michael Fohrer zdźěli, je postupowanje nuznje trěbne, wšako dyrbi so koncern na přichod wusměrić. 2 200 swojich 8 500 dźěłowych městnow po cyłej Němskej chce w běhu přichodnych třoch lět wotstronić. Pozadk noweho koncepta je, zo su dochody minjene pjeć lět masiwnje woteběrali.
Zastanišća jednotne wuhotować
Dypkownje k prózdninam zetkachu so radźićeljo wobchadneho zaměroweho zwjazka Hornja Łužica-Delnja Šleska (ZVON) a wobchadneho zwjazka VVO wčera w Budyšinje. Na dnjowym porjedźe steješe nimo etata 2017 tež prašenje, kak zastanišća lěpje wuhotować.
Budyšin (SN/BŠe). Jednohłósnje wuprajichu so radźićeljo wobchadneho zaměroweho zwjazka (ZVON) za to, na zastanišćach jednotne znamješka wužiwać. „Na jednym boku dźe wo funkciju zastanišća, na tamnym wo wuhotowanje“, podšmórny předsyda ZVON, Budyski krajny rada Michael Harig (CDU), na zhromadnym wuradźowanju z wobchadnym zwjazkom VVO wčera w Budyšinje. Wonkowny napohlad zastanišćow dźě ludźi wobwliwuje, hač je wužiwaja. Zdobom měł so bjezbarjerny přistup wobkedźbować. Kak daloko budźe serbska rěč na znamješkach zapřijata, njeje dotal jasne.
Ze susodom „so ženić“
Budyšin (UM/SN). Zo móhli ideje turistikarjow dale rozšěrić, sadźa Marketingowa towaršnosć Hornja Łužica-Delnja Šleska (MGO) dale a bóle na zhromadne dźěło z čěskimi partnerami. Tak je MGO ze zwjazkarstwom „Novoborsko“ projekt z mjenom „žeńtwa“ nastorčił. „Zaměr je, zo projektni nošerjo wobeju krajow na zakładźe idejow, kotrež so derje hromadźe hodźa, kooperuja“, rozjasnja jednaćel MGO Olaf Franke. Tohodla je marketingowa towaršnosć na swojej internetnej stronje formular wozjewiła, z kotrehož pomocu móža turistikarjo projekty krótko rozłožić.
Wjeršk „žeńtwy“ ze susodom budźe 5. septembra w Großschönauwje, hdźež chcedźa 40 zapodatych idejow předstajić. Spěchować maja wone němsko-čěske zhromadne dźěło euroregiona Nysa.
„Zwjazkarstwo Novoborsko wobsteji ze štyrjoch městow a 14 gmejnow pomjezneho regiona. Zwjazkarstwo ma zaměr tradicionalnu turistisku kónčinu Łužiske hory atraktiwnišu sčinić“, zdźěli managerka Jana Nastoupilová.
Dźeń a mjenje kontrolow
Dźěłarnistwo kritizuje „składnostne wopyty“ cłownikow na twarnišćach
Drježdźany (SN/MkWj). Twarscy předewzaćeljo w Budyskim wokrjesu dyrbja dźeń a mjenje z tym ličić, zo cłownicy jich twarnišća přepruwuja. W cyłkownym wobłuku Drježdźanskeho hłowneho cłowneho zarjada su zastojnicy loni runje 388 twarskich zawodow kontrolowali. To je jědnaće procentow mjenje hač lěto do toho. Přirunujo z přepruwowanjemi, kotrež su hišće lěta 2014 přewjedli, je to samo 40procentowski spad, kaž industrijne dźěłarnistwo twar-ratarstwo-wobswět w nowinskej zdźělence informuje. Wuchodosakske industrijne dźěłarnistwo za twarstwo rěči w tym zwisku wo „njedostatkach při kontrolach“.
Wšitko swój čas traje
Liča z přerěznymi žnjemi
Rozmołwa sakskich ratarjow z ministrom Thomasom Schmidtom
Hlina (AK/SN). Sakscy ratarjo liča lětsa ze solidnymi a přerěznymi žnjemi. „Pola nazymskeho ječmjenja drje budźe to samsny wunošk kaž loni. Jara ćerpjeła pak je pšeńca“, rjekny Wolfgang Vogel, prezident Zwjazka sakskich ratarjow, minjeny štwórtk we wobłuku „žnjoweje rozmołwy na kromje pola“ z burami a sakskim ministrom za ratarstwo a přirodu Thomasom Schmidtom (CDU). Chłódne nalěćo z pózdnimi zmjerzkami je wuwiće žita haćiło. W meji a juniju padny jenož poł telko dešća kaž hewak. „Bohužel jewja so na lochkich pódach w sewjernej a wuchodnej Sakskej widźomne škody suchoty dla. Tam dyrbimy tuž ze stratami ličić“, Vogel potwjerdźi. W tamnych kónčinach Sakskeje porno tomu z toho wuchadźeja, zo změja lětsa přerězne abo samo dobre žně.
Baćony z cyłeje Němskeje lahnu we Łužicy
Wosebity pjeršćeń wě dosć zajimaweho kołowokoło wulkopyskateho ptaka powědać
Baćony lubuja włóžnu krajinu, hdźež nańdu dosć cyroby. Swoju domiznu maja tuž tež w hatatej Łužicy. Swoje hnězda twarja na třěchach chěžow, na wuhenjach a na milinowych sćežorach.
Informacisku taflu wo Radworskich baćonach staj nalěto Pawoł Rěčka a jeho syn Markus připrawiłoj. Za to běštaj zajimawe informacije zestajałoj. Baćonjace hnězdo w Radworju je hižo 43 lět stare a bě jeno tři lěta prózdne. Wšón tamny čas je w nim 60 młodźatow wotrostło. Wšitke su so na puć do juha nastajili, jenož jedyn jenički nic. W lěće 2015 bě mjenujcy młody baćon z hnězda padnył a sej křidło złamał. Jeho dowjezechu do přirodoškitneje stacije w Zhorjelcu, hdźež dźensa hišće je.
Napisane tohorunja je, hdy su so baćony kóžde lěto ze zymskeho kwartěra nawróćili. Hižo štyri lěta přileći stajnje samsny baćon do Radworja. Kaž tak mjenowany čorny ELSA-pjeršćeń na noze přeradźa, bě so wón lěta 2009 w Rochlitzu narodźił. 2013 je samo baćon ze susodneje Kamjeneje w Radworju na hnězdźe sydał, ale jenož te jedne lěto.
Brunicoweho plana so prawnisce wzdać
Kamjenc (AK/SN). Regionalny planowanski zwjazk Hornja Łužica-Delnja Šleska chce lěta 2014 wobzamknjeny brunicowy plan k Wochožanskej brunicowej jamje předźěłać a dale wjesć. Radźićeljo zwjazka su tole wčera na swojim wuradźowanju w Kamjencu jednohłósnje wobzamkli. „Mułkecy, Rowno, Trjebink a Slepo-juh maja so w swojich gmejnach swobodnje wuwić móc“, podšmórny referent planowanskeho zwjazka w brunicowym wuběrku a zwjazkowej zhromadźiznje dr. Robert Koch. Wón reagowaše na nowy koncept brunicoweho regiona, kotryž bě předewzaće Łužiska energija a milinarnje (LEAG) wozjewiło.
Wobdźěłać ma so brunicowy plan předewšěm w dypkach wěstotna linija, zniženje dnowneje wody, škit před imisijemi, naslědna krajina brunicoweho hórnistwa a přesydlenje. LEAG chce to hač do kónca lěta 2017 předźěłać. Po tym sćěhuje wothłosowanje z hórnikoprawniskim jednanjom. „Wuslědk toho budźe naćisk brunicoweho plana z přirodoškitnej rozprawu“, Robert Koch rjekny.
