Krótkopowěsće (27.05.20)
Dalšej wosobje zemrěłoj
Budyšin/Zhorjelc. W Budyskim wokrjesu stej dalšej wosobje na koronawirus zemrěłoj. Tak rozrosće ličba smjertnych padow na 19. Dale strowotniski zarjad wčera wozjewi, zo su pola třoch wosobow infekciju zwěsćili. W Zhorjelcu so město toho ničo njezměni, tam žanoho na koronu schorjeneho wjac nimaja.
Pomhaja potrěbnym šulerjam
Drježdźany. Swobodny stat Sakska je dźensa zrěčenju ze Zwjazkom wo 500 milionow eurow wopřijacym programje za hnydomne wuhotowanje šulow přihłosował. Tak ma Sakska 25 milionow eurow k dispoziciji, zo móhła mobilne kompjutery za šulerjow kupić, kotřiž tajke nastroje njewobsedźa. Nošerjo šulow maja kompjutery kupić a potrěbnym za přichodne šulske lěto wupožčić.
Nowe čoło frakcije CDU
Budyšin. Rolf-Alexander Scholze předsyduje nětko frakciji CDU Budyskeje měšćanskeje rady, Matthias Knaak je jeho naměstnik. Jeju su měšćanscy radźićeljo CDU předwčerawšim wuzwolili. Wólby běchu trěbne, dokelž bě dotalny frakciski předsyda Karsten Vogt kónc lěta 2019 mandat złožił a měšćansku radu wopušćił.
Krótkopowěsće (26.05.20)
Ličba poměrnje konstantna
Budyšin/Zhorjelc. Ličba wobkrućenych koronainfekcijow je so w Budyskim wokrjesu wo jedyn pad na 482 powjetšiła. Cyłkownje 109 ludźi je tuchwilu schorjenych, 356 je so mjeztym wustrowiło. W Zhorjelskim wokrjesu nimaja ani jeničkeho schorjeneho. Wot 6. meje njeje tamniši strowotniski zarjad žanu nowu infekciju přizjewił. Jenož dwě kontaktnej wosobje stej hišće w karantenje.
Namjezne kontrole zběhnjene
Praha. Čěska policija je wobšěrne a systematiske kontrole na němskej a awstriskej mjezy zběhnyła. Město toho chcedźa wotnětka jenož hišće „zaměrnje a lubowólnje“ kontrolować, kaž čěske knježerstwo na swojim wčerawšim posedźenju wobzamkny. Přiwšěm je wukrajnym turistam dale zakazane do kraja přińć, hewak hroža jim razne pjenježne pokuty.
Mjenje terminow korony dla
Krótkopowěsće (25.05.20)
Ličba infekcijow snadnje wjetša
Budyšin/Zhorjelc. Kónc tydźenja bu dalša z koronawirusom natyknjena wosoba zwěsćena, tak zo je w Budyskim wokrjesu tuchwilu 481 dopokazanych padow. Sydom pacientow je so wustrowiło. Ličba postajenych karantenow je so na 247 jasnje pomjeńšiła. W Zhorjelskim wokrjesu njejsu dale žane infekcije zwěsćili. Tam je hišće sydom schorjenych. Dwě wosobje stej w karantenje.
VW dyrbi wotškódnjenje płaćić
Karlsruhe. Awtotwarc Volkswagen je zasadnje winowaty wobsedźerjam dieselowych awtow, kotřiž manipulowaneho wotpłuna dla skorža, wotškódnjenje płaćić. To je Zwjazkowe sudnistwo w Karlsruhe dźensa rozsudźiło. Kupcy, kotřiž chcedźa pjenjezy za swoje awto wróćo měć, dyrbja pak sej kilometry, kotrež su z nim mjeztym po puću byli, přiličić dać.
Geyer: Mnohe wěcy su chore
Krótkopowěsće (22.05.20)
Pjeć nowych inficěrowanych
Budyšin. Budyski wokrjes je korona-hotspot w Sakskej. Ličba natyknjenych zwyši so wčera wo pjeć na 480. Z nich je 114 schorjenych. Z dalšim smjertnym padom je nětko dohromady 17 mortwych korony dla. Aktualnje je strowotniski zarjad 310 karantenow postajił. W Zhorjelskim wokrjesu je dale 268 wobkrućenych koronapadow, nowe tež wčera žane njeběchu, 22 ludźi dotal zemrě.
Za dalšu wuměnu so wuprajił
Budyšin. Budyski krajny rada Michael Harig (CDU) referowaše wčera na mjezynarodnej wědomostnej konferency „Sacharowe čitanja 2020: ekologiske problemy 21. lětstotka“ mjez druhim wo tudyšich naprawach korony dla a wo kóncu wudobywanja brunicy a sćěhach toho za łužiski rewěr. Konferencu online wuhotowała je Běłoruska statna uniwersita. Zdobom wupraji so Harig za dalšu hospodarsku a kulturnu wuměnu Němskeje z wuchodoeuropskimi statami.
Melodija zwonohry změnjena
Krótkopowěsće (20.05.20)
Infekcije w Kamjenskej chorowni
Budyšin/Zhorjelc. Ličba z koronawirusom natyknjenych je w Budyskim wokrjesu na 469 (+11) stupała. Mjez druhim su pady w Kamjenskej chorowni maltezow a we Wojerowskim powołanskošulskim centrumje zwěsćili. 120 ludźi je tuchwilu schorjenych. W Zhorjelskim wokrjesu njejsu wot 6. meje žane nowe infekcije zwěsćili, tu je dale 268 inficěrowanych, zo toho je wosom ludźi chorych.
Nakładnistwa wuznamjenjene
Berlin. Społnomócnjena Zwjazka za kulturu a medije Monika Grütters (CDU), Bursowe towarstwo němskeho knižneho wikowarstwa a załožba Kurta Wolffa su wčera dohromady 66 nakładnistwam Němske nakładnistwowe myto přiznali. Mjez šěsć sakskimi lawreatami je tež Lipšćanske nakładnistwo Poetenladen, kotrež je mjez druhim lyriku Róže Domašcyneje a Kita Lorenca publikowało.
Region zhromadnje wuwić
Krótkopowěsće (19.05.20)
Dalša wosoba zemrěła
Budyšin/Zhorjelc. W Budyskim wokrjesu je dalša wosoba na koronawirus zemrěła. Ličba smjertnych padow wučinja nětko 15. Z jednej nowoinfekciju je tu dohromady 458 natyknjenych. 114 z nich je schorjenych, 19 lěkuja w chorowni. W Zhorjelskim wokrjesu njejsu wot 6. meje žane dalše nowoinfekcije zwěsćili, tu je dale 268 natyknjenych. Aktualnje maja tam dwanaće schorjenych, 22 ludźi je w zwisku z pandemiju zemrěło.
Dobre znamjo staršim
Budyšin. Budyski wokrjesny sejmik je wčera wobzamknył, zo njetrjebaja starši wot meje hač do julija za šulski bus ničo płaćić. Wšako so wuwučowanje na kubłanišćach tuchwilu jara rozdźělnje wotměwa. Rozsud bě jednohłósny. Po prózdninach budźe wotpowědny zarjad wokrjesa busowy popłatk zaso regularnje wotknihować.
Jara mało hosći w měrcu
Krótkopowěsće (18.05.20)
Hladanska słužba potrjechena
Budyšin/Zhorjelc. Ličba z koronawirusom natyknjenych je přez kónc tydźenja w Budyskim wokrjesu wo dźewjeć na 457 přiběrała. W ambulantnej hladanskej słužbje w Kinsporku kaž tež w Halštrowskej hladarni su infekciju zwěsćili a dalšich ludźi testowali. Dalša wosoba je zemrěła. Wokrjes Budyšin registruje dotal 14 smjertnych padow w zwisku z pandemiju. W Zhorjelskim wokrjesu je dale 268 infekcijow. Tam je dotal 22 wosobow wirusa dla zemrěło.
Na prašenja wotmołwjał
Budyšin. Sakski ministerski prezident Michael Kretschmer (CDU) je minjeny pjatk w Budyskim hosćencu „Alter Bierhof“ na prašenja hosćencarjow sprjewineho města wotmołwić spytał. Zarjadowanje bě tež přez internetnu syć Facebook sćěhujomny. Wosebje připosłucharjo su składnosć wužiwali a ministerskemu prezidentej kritiske prašenja stajeli.
Normalizuja bliskowobchad
Krótkopowěsće (15.05.20)
Dźěći dale wosebje potrjechene
Budyšin/Zhorjelc. Ličba z koronawirusom natyknjenych je w Budyskim wokrjesu wo dalšich dźewjeć na 448 přiběrała. Wulki dźěl nowoinficěrowanych su dźěći, kotrež su so zwjetša doma pola swójbnych natyknyli. Dohromady je 115 wosobow schorjenych, z nich 19 w chorowni. 320 ludźi je so wustrowiło. W Zhorjelskim wokrjesu wosta ličba inficěrowanych z 268 dale konstantna. Tuchwilu je tu 25 schorjenych, jednoho lěkuja w klinice. 221 ludźi je zaso strowych.
Wo lěsu mnozy mało wědźa
Drježdźany. Dźěło hajnikow a lěsnikow je njezbytne za zachowanje lěsa a tuž hódne za cyłu towaršnosć. To wujewi reprezentatiwne naprašowanje wo lěsu a lěsnistwje w Sakskej, kotrež je wičnoslědźenski institut hopp w nadawku zarjada Sachsenforst přewjedł. Mnozy ludźo pak wo funkciji lěsa a jeho wobhospodarjenju wjele njewědźa.
Hudźbne lěćo wupadnje
Krótkopowěsće (14.05.20)
Infekcije dale přiběraja
Budyšin/Zhorjelc. Ličba z koronawirusom natyknjenych je w Budyskim wokrjesu wo cyłkownje dwanaće na 439 rozrostła. Tež Njeswačanska pěstowarnja je potrjechena. Dohromady je 107 ludźi schorjenych, wosomnaćo su w chorowni. 319 ludźi (+10) je so mjeztym wustrowiło. W Zhorjelskim wokrjesu je dale 268 inficěrowanych, 28 wosobow je schorjeło, jednu lěkuja w klinice. 218 ludźi je zaso strowych.
„Kahoot“ myto dobył
Budyšin. Internetny kwis ze serbskorěčnymi nabožnymi hódančkami na platformje „Kahoot“ je tónle tydźeń myto Serbskeho poskitka tydźenja w syći (SPTWS) dobył. Skupina kołowokoło šefa Budyskeho studija SAEK Michała Cyža kóždy tydźeń prawidłownje nowe hódančka zestaja, při čimž móža wužiwarjo stajnje něšto nowe nawuknyć a sej zajimawe pozadki wotkryć.
Nowosće w Soblexu
Krótkopowěsće (13.05.20)
Młodźi ludźo potrjecheni
Budyšin/Zhorjelc. W Budyskim wokrjesu je nětko 427 (+ 9) z koronawirusom natyknjenych. Mjez nowoinficěrowanymi su tež dźěći a młodostni w starobje dweju do 17 lět. Wuslědki testow dalšich młodych kontaktowych wosobow hišće njepředleža. W Zhorjelskim wokrjesu wosta ličba infekcijow z 268 padami dale stabilna. Z toho je tuchwilu 28 ludźi schorjenych, 218 je so zaso wustrowiło.
Štyri miliony kulturnikam
Podstupim. Braniborska podpěruje něhdźe štyri tysac swobodnych wuměłcow z programom mikrostipendijow we wobjimje štyrjoch milionow eurow. „Chcemy so z njeběrokratiskim instrumentom wo to starać, zo kreatiwita koronawirus přežiwi“, rjekny braniborska ministerka za kulturu Manja Schüle (SPD). Stipendij njepřiliča zakładnemu zawěsćenju.
Zaso busowy zwisk do Čěskeje
