Krótkopowěsće (11.11.24)
Knježerstwo bjez wjetšiny
Drježdźany. Prěni raz po nowozałoženju Sakskeje 1990 dóstanje swobodny stat mjeńšinowe knježerstwo: CDU je kónc tydźenja rozsudźiła, po wustupje BSW z jednanjow spytać, koaliciju jeničce z SPD tworić. Jeli so to njeradźi, by CDU sama knježiła, kaž frakciski předsyda strony Christian Hartmann w „Sachsenspiegel“ telewizije MDR praješe (čitajće prošu dale na 2. stronje).
Na pogromowu nóc spominali
Zhorjelc. Towarstwa, iniciatiwy a angažowani wobydlerjo Sakskeje su zawčerawšim na namóc přećiwo Židam w pogromowej nocy 9. nowembra 1938 spominali. Mjez druhim w Zhorjelcu zarjadowachu nyšpor w cyrkwi Našeje knjenje. Tam wopominachu přitomni tež powalenje murje 9. nowembra 1989. Po nyšporje běžachu ludźo ze swěčkami ke kulturnemu forumej Zhorjelskeje synagogi.
Jězdźenki su darmotne
Krótkopowěsće (08.11.24)
Woleńcu wčera wuznamjenili
Běłobóh. Woleńca z Wojerec je Hornjołužiske myto předewzaćelow Budyskeho a Zhorjelskeho wokrjesa dóstała. Swjedźenske zarjadowanje wotmě Marketingowa towaršnosć Hornja Łužica-Delnja Šleska wčera w Běłobohu. Woleńca dósta myto za wobstajne inowacije w minjenych 100 lětach, při čimž so tradicije rjemjesła zachowaja.
Šiman: „Spěšnje jednać!“
Budyšin. Budyski zapósłanc sakskeho krajneho sejma Marko Šiman (CDU) žada sej sprawny wid na hospodarsku situaciju w Němskej. „Dyrbimy spěšnje jednać“, wón zwurazni. Předewšěm kónčiny při hranicach špatnych rozsudow w Berlinje dla ćerpja. Šiman žada sej program za infrastrukturu na wuchodźe Němskeje, wutwar zwjazkoweje awtodróhi A4 a elektrifikaciju železniskeje čary mjez Drježdźanami a Zhorjelcom.
Prěnju olympiadu přewjedli
Krótkopowěsće (07.11.24)
Amplowe knježerstwo na kóncu
Berlin. Amplowe knježerstwo SPD, Zelenych a FDP je zwrěšćiło, po tym zo je zwjazkowy kancler Olaf Scholz (SPD) wčera wječor financneho ministra Christiana Lindnera pušćił. Mjeztym sej předsyda CDU Friedrich Merz žada, zo měł Scholz w zwjazkowym sejmje hnydom prašenje dowěry stajić a nowowólby zmóžnić. Scholz pak chce z tym hač do srjedź januara 2025 čakać. (Hlej 2. str.)
Koalicija CDU a BSW z blida
Drježdźany. Móžna koalicija CDU, SPD a Zwjazka Sahry Wagenknecht (BSW) w Sakskej je z blida. Zastupnicy BSW su sonděrowanja wčera přetorhnyli a připowědźili, zo chcył BSW wotnětka w opoziciji dźěłać. Ministerski prezident Michael Kretschmer (CDU) reagowaše přesłapjeny. Po zakonju dyrbi hač do spočatk februara nowe knježerstwo stać. (Hlej 2. str)
Požadanje wčera wotedali
Krótkopowěsće (06.11.24)
Trump jasny dobyćer wólbow
Washington. Kandidat republikanow Donald Trump je wólby prezidenta USA dobył. Po dotalnym wuličenju je sej wón 279 hłosow tak mjenowanych wólbnych muži zdobył. Jeho demokratiska kontrahentka Kamala Harris je hladajo na to jasnje podležała. Mjeztym su statni a knježerstwowi šefojo ze wšeho swěta, mjez nimi zwjazkowy kancler Olaf Scholz (SPD), Trumpej k dobyću gratulowali. (Hlej 2. str.)
2 700 ludźi ewakuěrowali
Wikow (Elsterwerda). Při twarskich dźěłach we Wikowje su dźěłaćerjo zawčerawšim bombu namakali. Je to něhdźe 250 kilogramow ćežka, ameriska lětarska bomba, kotruž mějachu fachowcy dźensa znješkódnić. Postajili su woni radius 1 000 metrow, kotryž dyrbja ludźo wopušćić. Něhdźe 2 700 ludźi je potrjechenych.
Zarjaduja nětko rěčne hodźiny
Krótkopowěsće (05.11.24)
Roschek chce za CDU kandidować
Budyšin. 52lětny Steffen Roschek je dotal jenički požadar na sobotnišimaj zhromadźiznomaj čłonow CDU w Chrósćicach wo zastojnstwo předsydy strony w Budyskim wokrjesu a kandidaturu za wólby zwjazkoweho sejma. Syn serbskeje maćerje je předewzaćel za IT a lětarstwo. Wón chce Uda Witschasa naslědować a so we wólbnym boju přećiwo Karstenej Hilse (AfD) přesadźić.
Zawod na wikach w Barcelonje
Barcelona. Inowatiwne koncepty, projekty a technologije za naslědne wuwiće městow su tema na wikach Smart Expo World w Barcelonje, hdźež so tež předewzaće z Hornjeje Łužicy wobdźěli. Zastupjerjo zawoda ZIEGLER z Pěskec wudźěłki prezentuja. Tež dalše předewzaća z Drježdźan a Lipska su wot dźensnišeho do zajutřišeho w Barcelonje zastupjene.
Palast město ležownosćow?
Krótkopowěsće (04.11.24)
Předpředań zahajili
Budyšin. Załožba za serbski lud informuje, zo su zastupne lisćiki za lětušu 150. schadźowanku wotnětka online na předań. Wotpowědny link podawaja pod https://stiftung.sorben.com. Tradicionalne „zetkanje serbskich studentow, gymnaziastow a absolwentow kóždeježkuli starobneje skupiny“ wotměje so na zwučene wašnje tydźeń do prěnjeho adwenta, lětsa potajkim sobotu, 23. nowembra, w Budyskej měšćanskej hali „Króna“.
Šulerka z Budyšina na 2. městnje
Drježdźany/Budyšin. W Sakskim krajnym sejmje su so kónc tydźenja zaso šulerjo z cyłeje Sakskeje wo titul najlěpšeho rěčnika wubědźowali. Druhe městno – snadnje za dobyćerjom Jakobom Paridonom z Drježdźan – docpě 17lětna Nathalie Juhnke z 12. lětnika Budyskeho Schilleroweho gymnazija. Wona bě so prašenju wěnowała, hač „słušeja klasikarjo literatury hišće do wučby šulow“.
Dźesać kandidatow přizwolili
Krótkopowěsće (01.11.24)
Wuswojenje na dobro brunicy
Rowno. Wobswětowa skupina Choćebuz Zeleneje Ligi je w zdźělence Renéja Šustera informowała, zo je Sakski wyši hórnistwowy zarjad wobsedźerjow lěsa pola Rownoho wuswojił. Z tym chce zarjad koncernej LEAG pokročowanje Wochožanskeje brunicoweje jamy zmóžnić. Potrjecheni pruwuja tuchwilu 168stronske zdźělenje a přemysluja, přećiwo tomu před sudnistwom skoržić.
Jancyna na zarjedźe hižo njeje
Budyšin. Wot dźensnišeho njeje Halena Jancyna hižo społnomócnjena za serbske naležnosće wokrjesa Budyšin. Wona je krajnoradny zarjad wopušćiła. Kaž wona našemu wječornikej na naprašowanje wobkrući, přewozmje poskitk noweho dźěła. Nowowobsadźenje jeje dotalneho dźěłoweho městna je hišće wotewrjene, pytaja najprjedy w zarjedźe za naslědnicu.
Škoda Auto VW wuchowuje
Krótkopowěsće (30.10.24)
Wjelka smědźa zatřělić
Budyšin. Po tym zo je wjelk wospjet škody zawinował a wužitne zwěrjata w Budyskim a Zhorjelskim wokrjesu nadpadnył a zakusał, nětko dowolnosć za zatřělenje rubježneho zwěrjeća předleži, zdźěli wčera krajnoradny zarjad Budyskeho wokrjesa. Krajny rada Udo Witschas (CDU) je wuwzaćnu dowolnosć mjeztym podpisał.
Podpěra za kulturny zawod
Wojerecy. Wojerowscy měšćanscy radźićeljo su wčera wobzamknyli, zo dóstanje tamniši powšitkownowužitny Kulturny zawod zwěrjenc, kultura a kubłanje, kotryž je hižo dlěje w hospodarskich wuskosćach, dohromady poł miliona eurow financneje podpěry. Zawodej přisłušeja hudźbna šula, hród, měšćanski muzej, biblioteka kaž tež zwěrjenc.
Kónc po 101 lětach
Krótkopowěsće (29.10.24)
Digitalne hamtske łopjeno
Budyšin. Budyska měšćanska rada je lětsa w septembrje rozsudźiła, zo wuchadźa hamtske łopjeno wot nowembra jenož hišće w digitalnej formje. Minjenu sobotu je so ćišćana warianta posledni raz jako přiłoha w nowinje „Mitteilungsblatt“ wozjewiła. Přichodnje wozjewjeja zakonsce předpisane informacije w ćišćanym formaće w Hornjołužiskim kurěrje.
Tež w Budyšinje stawkuja
Berlin. W zwisku z tarifowym konfliktom w metalowej a elektrotechniskej industriji je dźěłarnistwo IG metal wot dźensnišeho tež za Saksku warnowanske stawki připowědźiło. Mjez druhim wobdźěleja so dźěłaćerjo zawodow BMW w Lipsku, Alstom w Budyšinje a VW w Šwikawje. W dwěmaj tarifowymaj jednanjomaj so dźěłarnistwo a dźěłodawarjo dotal dojednali njejsu.
Čěski wulkopósłanc w Ruskej
Krótkopowěsće (28.10.24)
CDU z nowym předsydstwom
Budyšin. CDU w Budyšinje je nowe předsydstwo wuzwoliła. Nawoda wokrjesneho šulskeho zarjada Matthias Knaak je nowy předsyda. Nimo toho słušeja nětko Elisabeth Hauswald, Andreas Ziesche a Anke Knaak k předsydstwu, kotrež chce so 12. nowembra skonstituować. Z dobrej politiku chce so nowe načolnistwo wo to postarać, zo dowěra ludnosće do CDU zaso přiběra.
Brehmer wostanje wjesnjanosta
Rěčicy. Ralf Brehmer wostanje wjesnjanosta w Rěčicach. We wčerawšich wólbach hłosowaše 879 wobydlerjow gmejny za njeho. Dalši kandidat Torsten Lorenscheit dósta jenož 454 hłosow. Wólbne wobdźělenje wučinješe 66,4 procentow. Brehmer chce předewšěm medicinske zastaranje zaručeć. Tež wo wuwiće přemysłoweju přestrjenjow chce so wón dale prócować.
Kupnicu chce přetwarić
