Šofer po njezbožu zemrěł

Nowe Poršicy. Wo wobchadnym njezbožu, kotrež je so předwčerawšim na statnej dróze S 111 w Nowych Poršicach stało (SN wčera rozprawjachu), je policija přidatne informacije wozjewiła, kotrež wčera hakle po skónčenju redakciskeho časa dóńdźechu. 73lětny wodźer Audija, kiž bě zražku z nakładnym awtom zawinił, je wčera rano w chorowni zemrěł.

Kóčku wuchowali

Brězowka. K njewšědnemu zasadźenju wołachu pjatk wječor policiju w Brězowce w Dźěwinskej gmejnje. Tam bě kóčka do sudobja za hnójnicu padnyła a njemóžeše so sama hižo wuswobodźić. Tuž dyrbjachu zastojnicy Běłowodźanskeho policajskeho rewěra pomhać. Kóčka drje bě žiwa, njemóžeše pak so na hładkej foliji­ ze sudobja wudrapać. Tuž přiwołachu policisća wjesnych dobrowólnych wohnjowych wobornikow. Kameradam so skónčnje poradźi, wosłabjene skoćo wuchować. Woni kóčku najprjedy raz wumychu a ju skónčnje tež zastarachu. Hač je so kóčka na to k swojemu wobsedźerjej dóstała, bohužel znate njeje.

Zakuski paduchow wabili

Budyšin. Awtomat za zakuski je w nocy na srjedu paduchow na Budyskej Einsteinowej přiwabił. Skućićeljo nastroj z jeho městna wutorhnychu. Na to jón tak dołho wobdźěłachu, doniž wjacore zakuski a tyzy z napojemi do faška padnychu, z kotrehož móžachu sej je paduši wzać. Škoda wučinja něhdźe 140 eurow. Policija pyta nětko swědkow, kotřiž su snano něšto podhladneho wobkedźbowali (tel. 03591/ 35 60).

Paduši we wobchodźe

Budyšin. Mějićel wobchoda na Budyskej Sukelnskej dyrbješe předwčerawšim rano zwěsćić, zo běchu so w nocy do toho pola njeho njeznaći zadobyli. Dokładnje běchu to štyrjo, kotřiž so namócnje do wobchoda łamachu. Wobstražowanska kamera je wšitko natočiła. Paduši pokradnychu po informacijach policije 25 mobilnych telefonow, dwaj telewizoraj, dwě hrajnej konsoli kaž tež dwaj laptopaj. Rubizna ma cyłkownu hódnotu něhdźe 10 000 eurow. Načinjenu wěcnu škodu trochuja na něhdźe 300 eurow. Kriminalny technikar móžeše zawostajene slědy zawěsćić.