Policija (17.01.24)
Delikt z praskotakami
Policija (15.01.24)
Do milinoweho sćežora zrazyła
Přišecy. Přišedši z Dobruše-Huski zhubi sobotu popołdnju 19lětna jězdźerka na hłownej dróze do směra Budyšin w křiwicy kontrolu nad swojim VW Golfom a zrazy do milinoweho sćežora. Tón so wotłama a padny na jězdnju. Dla reparatury sćežora je milina na wjacore hodźiny wupadnyła.
Bróžeń so paliła
Łužnica. Z dotal njeznatych přičin je so sobotu w nocy we Łužnicy třěcha bróžnje paliła. Wohnjowym wobornikam so poradźi, bydlenski dom w bjezposrědnym susodstwje před wohenjom škitać. Nichtó njebu zranjeny. Wěcnu škodu trochuja eksperća na 150 000 eurow.
Policija (12.01.24)
Kilogram marihuana namakali
Wojerecy. Při kontroli wodźerja e-scootera we Wojerecach policisća srjedu zwěsćichu, zo bě 19lětny drogi brał. W jeho tobole namakachu wjacore podhladne titki. Kaž so pozdźišo wukopa, bě to dohromady wjace hač kilogram marihuany. Młodeho muža na to nachwilnje zajachu a na přikaz sudnika jeho bydlenje přepytachu. Při tym drje žane dalše drogi njenamakachu, ale utensilije za jich wužiwanje.
Policija (11.01.24)
Wjacore delikty zwěsćili
Biskopicy. Dobry čuch mějachu policisća wutoru wječor w Biskopicach, jako tam wodźerku Škody kontrolowachu. Pola 46lětneje zwěsćichu hnydom wjacore delikty. Žona scyła žanu jězbnu dowolnosć njeměješe. Drogowy test wunjese, zo je wona amfetaminy brała. Nimo toho jeje awto zawěsćene njebě a měješe so tuž wotzjewić. Policisća přewodźachu žonu k „darjenju“ kreje.
Policija (10.01.24)
Awto pokradnjene a namakane
Pančicy-Kukow. Sobudźěłaćer twarskeje firmy dyrbješe dźensa rano w Pančicach-Kukowje zwěsćić, zo bě něchtó jeho zamknjeny firmowy transporter pokradnył. W 4.50 hodź. zahajene pytanje za Citroënom Jumperom bě hižo po ani połdra hodźinje wuspěšne. W 6.10 hodź. wuhladachu policisća transporter w Mužakowje. Paduchej bě so bohužel poradźiło twochnyć.
Policija (09.01.24)
W bywšej šuli so paliło
Budyšin. Najskerje wjetšemu wohenjej zadźěwali su wobydlerjo njedźelu popołdnju w Budyskej Strowotnej studni. Něhdźe w 16 hodź. woni zwěsćichu, zo so z něhdyšeje šule na Gagarinowej kuri. Po wšěm zdaću běchu so njeznaći tam zadobyli a woheń zamiškrili. Alarmowani wohnjowi wobornicy móžachu wšitko zhašeć. Kelko škody je nastało, dotal wobličene njeje.
Policija (08.01.24)
Jeleń škodu načinił
Krušwica. Kotre sćěhi móže zražka z wulkim jelenjom měć, dyrbješe pjatk wječor 42lětna žona w Krušwicy nazhonić. Jako bě tam wodźerka Škody krótko po 21 hodź. po puću, stupi jeleń z wulkimi rohiznami na puć. Žona njemóžeše zražce hižo zadźěwać. Wulke zwěrjo načini po informacijach policije něhdźe 10 000 eurow škody a hišće na městnje njezboža zahiny. Kaž policija dale rozprawja, bě cyły prědni dźěl awta hač k prědnjej škleńcy skóncowany. Žona so na zbožo njezrani.
Policija (05.01.24)
Do wodźerja awta so dał
Budyšin. K rozestajenju mjez wodźerjom awta a pěškom je srjedu rano w Budyšinje dóšło. 62lětny wodźer wosoboweho awta typa Dacia bě na Oswaldowej po puću a přepozdźe widźeše, zo muž runje přechod za pěškow wužiwaše. Zo njeby do njeho zrazył, wuwiny so šofer nalěwo a jědźeše za pěškom nimo. Tón wosta stejo a dyri z ruku do awta. Na to 62lětny šofer zasta, zo by so zawěsćił, hač je so muž zranił. Pěšk pak dyri z woběmaj pjasćomaj do šofera, tak zo tón padny a so při tym zrani. Nětko pytaja swědkow.
Policija (03.01.24)
W silwesterskej nocy kradnyli
Budyšin. Praskotanje w silwesterskej nocy su njeznaći w Budyšinje znjewužiwali a so do drastoweho wobchoda w nutřkownym měsće zadobyli. Kaž policija rozprawja, pokradnychu woni wjetše mnóstwo drasty a wjacore słónčne nawoči. Rubizna bě dohromady něhdźe 20 000 eurow hódna. Kelko wěcneje škody je nimo toho nastało, njeje hišće wobličene. Hakle Nowe lěto popołdnju je wobsedźer wobchoda padustwo zwěsćił.
