Z tanka ćěriwo kapało

Hodźij. Na statnej dróze S 111 w Hodźiju su sej policisća wutoru popołdnju nakładne awto bliže wobhladali. Při jězdźidle 61lětneho bě přidatny tank při­twarjeny. Z njeho ćěriwo kapaše. Při dokładnišim přepruwowanju zastojnicy zwěsćichu, zo bě tank wobškodźeny. Dalšu jězbu policisća mužej zakazachu. Wón ma nětko nanajspěšnišo defekt wotstronić dać. Policisća wodźerjej znajmjeńša dowolichu, hač do přichodneje zamkarnje jěć.

Motorske do Lkw-ja zrazyło

Čornow. Při ćežkim wobchadnym nje­zbožu wčera wječor na statnej dróze S 95 w Čornowje (Zschornau) stej dwě wosobje žiwjenje přisadźiłoj. 45lětny wodźer motorskeho bě z njeznateje přičiny na napřećiwnu jězdnju zajěł a frontalnje do nakładneho awta zrazył. Wón a 43lětna sobu jěduca so smjertnje zraništaj.

Najskerje traktora dla so paliło

Jědlow. K wjacorym wohenjam su sobotu popołdnju wohnjowu woboru a policiju podłu statneje dróhi S 94 wołali. Mjez Jědlowom (Gödlau) a Krěpjecami, blisko Žuric kaž tež při kružnym wobchadźe w Ramnowje je so dohromady na štyrjoch městnach sucha trawa paliła. Zasadźeni wobornicy z Pančic-Kukowa, Biskopic, Ramnowa, Halštrowa a Rušicy jednotliwe wohenje spěšnje zhašachu, tak zo žana wjetša škoda njenasta. Runočasnje dochadźachu wjacore informacije, zo bě na mjenowanym wotrězku dróhi historiski traktor typa Lanz „škrički pluwajo“ po puću. Wohnjowa wobora a policija wuchadźatej z toho, zo bě stara mašina na wohenjach wina. To pak na Kamjenskim policajskim rewěrje nětko dokładnje přepruwuja.

Twory za 40 000 eurow zničić dyrbjeli

Wojerecy. Njeznaći su so wo to postarali, zo je w nocy na štwórtk w kupnicy na Wojerowskej Šulskej hasy chłódźenska připrawa dospołnje wupadnyła. Najprjedy technikarjo z toho wuchadźachu, zo jedna so wo mylenje. Alarmowany monter pak zwěsći, zo běchu skućićeljo nuzowy zapinak na třěše kupnicy hasnyli. Z tym je chłódźenje za cyłe twarjenje dźěłać přestało. Wšitke w chłódźakach składowane twory dyrbjachu zničić. Škodu trochuja na něhdźe 40 000 eurow.