Wobšudnistwu zadźěwał

Budyšin. Žonje w Budyšinje je wutoru pozdatny sobudźěłaćer předewzaća Paypala při telefonje napowědał, zo je něchtó 500 eurow wot jeje konta wotzběhnył. Žona pak móhła to storněrować, hdyž tak mjenowane steam-karty kupi a tajne čisła zdźěli. Jeje mandźelski so tuž na puć do přichodneho wobchoda nastaji a chcyše tam tajke karty kupić. Při kasy jeho kedźbliwy sobudźěłaćer wobchoda na to skedźbni, zo móhło so snano wo wobšudnistwo jednać a zo měł tuž radšo na policiju zwonić. Sobudźěłaćer wobchoda a přiwołani policisća móžachu tak pjenježnej škodźe zadźěwać.

Pica za pčołki alarm zawiniła

Protecy. K njewšědnemu zasadźenju su wohnjowych wobornikow póndźelu dopołdnja do Protec (Prietitz) pola Halštrowa wołali. Tam bě w jězdźidle paketoweje słužby na želej podobna maćizna z paketa wuběžała. Zasadźeni běchu kameradojo z Protec, Halštrowa, Šmorkowa kaž tež wosebita jednotka wobornikow za chemiske substancy. Po wobšěrnym pruwowanju alarm skónčichu. Jednaše so jeničce wo picu za pčołki.

Muža na hawbje sobu wzał

Budyšin. Dokelž přejara nalěwo jědźeše, je njedźelu popołdnju na Budyskej Kamjentnej slěbrobarbny BMW napřećo přijěducy VW šmórnył a wobškodźił. ­Zawinowar pak dale jědźeše, tuž spěchaše sobujěducy z VWja pěši za BMWjom a jón při přichodnej ampli dosćahny. ­Dokelž šofer při zelenej swěcy dale jě­dźeše, skoči muž na motorowu hawbu a něhdźe 30 metrow sobu jědźeše, doniž njewotskoči. Při tym so wón zrani.

Wopiteho dwójce lepili

Budyšin. Policajscy zastojnicy su srjedu na Cyhelskim nasypje w Budyšinje wodźerja Fiata kontrolowali. Pola 45lětneho naměrichu 1,94 promilow alkohola w kreji. Policisća přikazachu, zo ma muž krej wotedać, a jemu dalšu jězbu zakazachu. To pak bě jemu po wšěm zdaću smorže. Połdra hodźiny pozdźišo mjenujcy muža znowa kontrolowachu, tónraz na Tuchorskej. Tam měješe wón mjeztym 2,0 promilow intus. Zastojnicy wupisachu wospjet chłostanske přizjewjenje a kluč awta sćazachu.