Policija (19.08.22)
Swědk zadźěwa jězbje w pjanosći
Połčnica. Kedźbliwemu swědkej napadny srjedu wječor na B 98 w Połčnicy napita šoferka. Wona jědźeše ze swojim Opelom Astra w křiwicach na poprawom runej droze. Na to swědk policiju zawoła. Tuta kontrolowaše 38lětnu Němku krótko před tym, zo tuta swoju domjacu adresu docpě. Při tym zwěsćichu zastojnicy, zo ma 1,52 promile alkohola w dychu. Młoda žona dyrbješe jězbu přetorhnyć a so z policiju k wotewzaću kreje na rewěr podać. Tam zhotowichu tež wozjewjenje delikta.
Policija (18.08.22)
Dźěćo z awta wuswobodźili
Wojerecy. Policija a wohnjowa wobora stej předwčerawšim při Wojerowskej Łužiskej kupjeli małe dźěćo z awta wuswobodźili. Žona je zastojnikow wołała, dokelž njeda so jeje awto techniskich problemow dla wotwonka wočinić.
Policija (17.08.22)
Prózdne tyzy a diesel spakosćili
Nowa Łuka. Sta prózdnych tyzow napoja Red Bull su njeznaći z kólnje firmoweje ležownosće w Nowej Łuce pokradnyli. Kaž policija dźensa zdźěli su nimo toho ze štyrjoch nakładnych awtow wjace hač 2 000 litrow diesela wotklumpali. Hódnota rubizny wučinja wjac hač 5 000 eurow.
Policija (16.08.22)
Njewšědnosć w schodźišću
Zhorjelc. Z njewšědnymi a chětro wjele ćěkancami měješe so policija minjenu njedźelu popołdnju w Zhorjelcu bědźić. Hnydom wosom wakow dyrbjachu tam w schodźišću wjaceswójbneho domu na Kränzelowej popadnyć. 45lětny wobydler bě je po wšěm zdaću wusadźił, kaž policija zdźěli. Zastojnicy dowjezechu hač do meter dołhe hady w transportnych boksach na policajski rewěr, hdźež je Zhorjelski muzej za přirodowědu nachwilnje přewza. Čehodla je 45lětny hady wusadźił, njeje wujasnjene. Tuchwilu pruwuja, hač jemu nastate kóšty zasadźenja njenabrěmja.
Policija (15.08.22)
Z kolesom do znački
Protecy. Po wšěm zdaću ze swjedźenja po puću domoj bě 57lětna žona w nocy na njedźelu w Protecach. Kaž policija zdźěli, zrazy wona z kolesom do znački. Dokelž nahłownik njenosyše so wona ćežko zrani a dyrbjachu ju do chorownje dowjezć. Při přepytowanjach zwěsćichu zastojnicy, zo měješe znjezbožena chorhojčku. Kak wulka tuta bě, pak policija njezdźěli. Kolesowarka pak změje so wopiwstwa w nadróžnym wobchadźe dla zamołwić.
Awto zwróćił
Drječin. Zo njeby do dźiwiny zrazył chcyše so 18lětny šofer Dacije sobotu wječor pola Drječina (Dretschen) skoćeću wuwinyć. Wón zhubi pak kontrolu nad awtom, jědźe z jězdnje a awto so zwróći. Šofer a sobujěduca so lochce zraništaj. Wěcna škoda wučinja něhdźe 5 500 eurow.
Policija (12.08.22)
Přistajeny tankownje je žonu škitał
Wojerecy. Sobudźěłaćer tankownje we Wojerecach je 70lětnu žonu pozdaću před wobšudnistwom wuchował. Seniorka bě srjedu w tankowni chcyła Google Play kartki w hódnoće tysac eurow kupić. W rozmołwje z přistajenym so wukopa, zo su jej wobšudnicy při telefonje dobyće 38 000 eurow přilubili. Wona měła kartki kupić a čisła po telefonje posrědkować. Přistajeny informowaše policiju, kotraž nětko wobšudnistwa dla slědźi.
Policija (11.08.22)
Z awtom do sćěny zajěła
Budestecy. 77lětna wodźerka Fiata je předwčerawšim wobchadne njezbožo w Budestecach zawinowała. Wona bě w křiwicy runjewon jěła, płót ležownosće přełamała a do sćěny wjaceswójbneho domu prasnyła. Wodźerka a tři dźěći w awće so snadnje zranichu. Dohromady nasta něhdźe 8 000 eurow škody.
Policija (10.08.22)
Pjenjezy z kasy wzał
Słona Boršć. Kriminelne delikty na awtodróhowym wotpočnišću Hornja Łužica pola Słoneje Boršće měrja so zwjetša na to, zo spytaja tam bjez zapłaćenja tankować abo zo něšto z nakładnych awtow kradnu. Předwčerawšim pak je dotal njeznaty muž pjenjezy spakosćił. Jako bě jedna z kasow krótki wokomik njewobkedźbowana, sej wón z njeje wjace hač tysac eurow wza. To samsne pospyta wón tež při tamnych kasach, njeměješe pak při tym žadyn wuspěch. Policija pad nětko přepytuje.
Policija (09.08.22)
Wopiteho šofera lepili
Budyšin. Dźakowano kedźbliwym wobydlerjam móžeše policija předwčerawšim w Budyšinje muža lepić, kotryž pod wliwom alkohola z awtom jědźeše. Ze Stieberoweje swědkojo popołdnju wopiteho šofera zdźělichu. Jako chcyše wodźer Forda runje teren tankownje wopušćić, jeho policisća zadźeržachu. Pola 56lětneho naměrichu 1,34 promilow alkohola w kreji. Jězbnu dowolnosć muž hižo žanu njeměješe. Ju bě druheho alkoholoweho delikta dla hižo před časom wotedać dyrbjał.
Policija (08.08.22)
Cigaretowy awtomat w pincy
Budyšin. Po tym zo bě muž do noweho bydlenja na Hauensteinskej hasy w Budyšinje zaćahnył, wuhlada wón w pincy cigaretowy awtomat. Nastroj w hódnoće něhdźe 5 000 eurow bu po wšěm zdaću namócnje wočinjeny. Pinca bě něhdźe lěto njewužiwana. Nětko přepytuja, zwotkel awtomat pochadźa.
