Policija (01.11.22)
Pjany po puću
Židźino. Zastojnicy Wojerowskeho policajskeho rewěra su wčera w rańšich hodźinach wosobowe awto typa Toyota w Židźinom kontrolowali. Při tym zwěsćichu alkoholowu wóń we wudychu 35lětneho šofera. Přewjedźeny test wujewi hódnotu 0,58 promilow, štož wjedźeše k přizjewjenju ze stron zastojnikow.
Do małotransportera so zadobyli
Budyšin. Chrobli paduši su so w času mjez minjenej sobotu a předwčerawšim připołdnju na dotal njeznate wašnje do transportera Mercedes Benz na Budyskim Třělnišću dóstali. Wozydło bě tam zawěsćene wotstajene. Mějićel njeje so wo nastatej wěcnej škodźe wuprajił. Skućićeljo su z wozydła kanister, napinanski pas, přisłušk za wozydło a dwanatk blešow piwa sobu wzali.
Wodźer motorskeho zranjeny
Sepicy. Njezbožo z wosobowym awtom typa BMW a motorskim je so njedźelu dopołdnja w Sepicach stało. Při zražce je wodźer motorskeho kontrolu zhubił a so walił. Při tym so zlochka zrani.
Policija (28.10.22)
Ćežki woheń w planowanym domje za ćěkańcow
Njeznaći skućićeljo su w planowanym domje za ćěkancow „Sprjewiny hotel“ w Budyšinje dźensa rano woknowe škleńcy rozbili. Dale je w twarjenju woheń wudyrił. Štyri wosoby, kotrež přenocowachu w domje, su njezranjeni. Wohnjowa wobora zamó woheń hašeć. Wo wěcnej škodźe dźensa dopołdnja hišće žane podaća njepředležachu. Policajski centrum za wotwobaranje terorizma a ekstremizma w Krajnym kriminalnym zarjedźe pad nětko přepytuje.
Dźěći so do domu zadobyli
Swědka je srjedu rano we Wojerecach třoch młodych hólcow lepiła, jako wokna stareho twarjenja rozbichu a so do domu zadobychu. To zdźěli žona policiji, kotraž pachołow na to lepi. Hólcy policiji powědachu, zo chcedźa wideja za YouTube natočić. Policija přepoda dźěći swojim staršim, kotřiž maja nětko ze skóržbu kaženja domjaceho měra a škody dla ličić. Nastata škoda wučinja něhdźe 200 eurow. Lokalna kriminalna słužba skućićelstwo přepytuje.
Policija (27.10.22)
Kedźbu před dźiwinu
W minjenymaj dnjomaj je so w Budyskim a Zhorjelskim wokrjesu třinaće njezbožow z dźiwinu stało. Z dateje přičiny chce policija wšitkich wobdźělnikow wobchada sensibilizować. Riziko njezboža z dźiwinu je nazymu wosebje wysoke. To zaleži na zadźerženju zwěrjatow, ale tež wobchadnych wobdźělnikow, kaž tež na wjedrje.
Policija (25.10.22)
Statny škit přepytuje
Kulow. Tři skóncowane swjate křiže su sobotu dopołdnja policiji přizjewili. W prěnim padźe su njeznaći mjez Sulšecami a Lubhozdźom křiž ze zornowcoweho stołpa torhnyli. Po wšěm zdaću měrjachu so na železnu konstrukciju, kotruž sobu wzachu. Tamnej padaj staštej so na Salowskej dróze w Kulowje. Tam bě wobydler dwaj powalenej křižej přizjewił. Jónu běchu metalowy křiž wotrězali, ale ležo wostajili. Tamny metalowy křiž su skućićelo wułamali a sobu wzali. Kaž Zhorjelska policajska direkcija na naprašowanje zdźěli, je nětko statny škit dalše přepytowanja přewzał, a to do wšitkich směrow. Po dotalnych informacijach drje jedna so wo paduchow metala, nowinski rěčnik zdźěli.
Policija (24.10.22)
Paduchow spěšnje wuslědźili
Budyšin. Pjekarnja na Budyskej Seminarskej hasy bě w nocy na sobotu cil najprjedy njeznatych paduchow. Z pjenježneje kasety pokradnych woni 2 200 eurow. Njeskutk je wobstražowanska kamera filmowała. Hišće za čas policajskich přepytowanjow zjewištaj so na městnje njeskutka muž a žona w starobje 22 a 26 lět. Kaž z widejoweho materiala wuchadźeše, móhło so wo skućićelow jednać. Muž měješe wjace hač 2 000 eurow při sebi. W jeju bydlenjomaj namakachu mjez druhim grat za zadobywanja.
Policija (21.10.22)
Paduši w hosćencu
Nadźanecy. Njeprošenych hosći mějachu w nocy na srjedu w hosćencu w Nadźanecach (Nadelwitz) pola Budyšina. Korčmar bě hosćenc něhdźe w 23 hodź. zawrěł a so rano w 7.30 hodź. do njeho nawróći. W tym času běchu so njeznaći do lokala zadobyli. Napoje a jědźe pak běchu jim po wšěm zdaću wšojedne. Město toho wšitke rumnosće přepytachu a wzachu po informacijach policije něhdźe 600 eurow pjenjez sobu. Nimo toho načinichu na městnje njeskutka něhdźe 1 500 eurow wěcneje škody.
Policija (20.10.22)
Zasadźenje trašaceho filma dla
Wojerecy. Dokelž žona we Wojerecach w nocy na srjedu wótře wołanje ze susodneho bydlenja słyšeše, wona policiju wołaše. Do móžneho swójbneho rozestajenja pak zastojnicy zapřimnyć njetrjebachu. Podružnicy we wopisanym bydlenju běchu jeničce trochu wótře w telewizoru trašacy film hladali, w kotrymž so wotpowědne zwuki jewjachu. Mjeztym běchu telewizor mjelčišo nastajili, tak zo móžachu policisća zaso wotjěć.
Policija (19.10.22)
Drogi wotedał
Budyšin. Po wšěm zdaću swoje swědomje wolóžić chcyše w nocy na póndźelu 25lětny muž w Budyšinje. Krótko po połnocy klinkaše wón na policajskim rewěrje a rjekny, zo wonka na třěše policajskeho awta drogi leža. Kaž so wukopa, bě wón je sam tam połožił, hromadźe z trašawku, kapsnej lampu a móšnju. Muž policistam zdźěli, zo ma nimo 40 gramow crystala z třěchi awta doma dalše drogi a pólske praskotaki. Přepytawši jeho bydlenje a zahrodowy domčk namakachu zastojnicy wjetše mnóstwo amfetaminow, konopa a marihuany kaž tež kokain, crystal, trašawku a wulku hromadu pyrotechniki. 25lětneho na to nachwilnje zajachu. Při drogowym tesće zwěsćichu, zo bě wón wšelake družiny wopojnych jědow brał. Přećiwo młodemu Budyšanej přepytuja nětko podhlada wikowanja z drogami a přeńdźenja přećiwo zakonju wo brónjach a rozbuchadłach dla.
Policija (18.10.22)
Dźěćo zawlec chcył
Huska. K pospytnemu zawlečenju dźěsća je minjenu sobotu popołdnju w Husce dóšło. Muž bližeše so ležownosći, na kotrejž dźěćacy wozyčk steješe. Wón storči staršeju doboka a hrabny sej wozyčk z ćěšenkom. Nan a wjacori swědkojo tomu zadźěwachu, zo móžeše skućićel wotjěć. Woni jeho přewinychu a policiju wołachu. Zastojnicy wzachu 29lětneho Egyptowčana sobu na rewěr a přećiwo njemu pospytne zawlečenje dźěsća přizjewichu. Samsny muž bě hižo dźeń do toho w Husce policajsce napadnył. Předwčerawšim dyrbjachu so zastojnicy z nim we Wallrodźe zaběrać.
Policija (17.10.22)
Moped manipulował
Němcy. Dobre wóčko mějachu policisća sobotu popołdnju w Němcach. Tam napadny jim moped typa S50 N, na kotrymž bu po wšěm zdaću technisce to a tamne změnjene. Jako chcychu wodźerja zadźeržeć, spyta so tutón policistam wuwinyć a jědźeše spěšnišo hač dowolene po Kulowskej dróze. Skónčnje pak jeho zastojnicy tola dosahnychu a zwěsćichu, zo bě 21lětny swój moped wjacore razy přetwarił. Nimo toho młody muž scyła žanu jězbnu dowolnosć njeměješe, dokelž běchu ju jemu hižo sćazali.
Kamjenje pokradnyć chcyli
Nowa Łuka. Z hałzami zawodźěte kamjentne platy w hódnoće 500 eurow je wobydler pjatk w Nowej Łuce namakał. Po wšěm zdaću běchu njeznaći w nocy do toho platy z bliskeho twaršćiznoweho składa wzali, zo bychu je pozdźišo wottransportowali.
