Policija (03.08.22)
Dwójce so paliło
Budyšin. K hašenju wołachu wohnjowu woboru předwčerawšim něhdźe w 20 hodź. do wjaceswójbneho domu na Einsteinowej w Budyšinje. Z dotal njeznateje přičiny paleštej so na šestym poschodźe njerjad a matraca. Zasadźenych bě wjace hač 40 wobornikow z dźesać jězdźidłami. Wobydlerjow hornich třoch poschodow dyrbjachu něhdźe hodźinu ewakuować. Po zhašenju płomjenjow móžachu woni zaso do swojich bydlenjow so wróćić. Zranił so nichtó njeje. Połojca šesteho poschoda bu kura a wohenja dla wobškodźena. Škoda wučinja něhdźe 30 000 eurow. Na nimale samsnym městnje je so sydom hodźin pozdźišo znowa paliło. Tež tónle woheń wobornicy spěšnje zhašachu. Wohnjowoborny fachowc je wčera za přičinami slědźił. Policija přepytuje podhlada zapalerstwa dla.
Policija (02.08.22)
Awto policije znjezbožiło
Kamjenc. Při zasadźenju je předwčerawšim policajske awto w Kamjencu znjezbožiło. Byrnjež 32lětny zastojnik módru swěcu a signal zaswěćeny měł, dóńdźe na amplowym křižowanišću Budyska/Njebjelčanska k zražce ze Subaruwom 58lětneje žony. Škoda na woběmaj jězdźidłomaj wučinja wjacore tysac eurow.
Policija (01.08.22)
Na swětłym dnju kradnyli
Běła Woda. Z njewšědnje chrobłym padustwom dyrbješe so policija sobotu w Běłej Wodźe zaběrać. Najprjedy njeznaty muž zastupi po připołdnju do jězdźidłoweje zamkarnje a započa so ze sobudźěłaćerjom rozmołwjeć. W njewobkedźbowanym wokomiku hrabnyštaj sej dalšej podhladnaj awtowe koleso a specielny kluč a spěchaštaj k swojemu wosobowemu awtu. Z nim wšitcy třo wotjědźechu. Alarmowana policija pak móžeše muži w starobje 27, 28 a 30 lět w bliskosći lepić a jich nachwilnje zaja.
Policija (29.07.22)
Technika awto namakać pomhała
Biskopicy. Paduch transportera bě w nocy na srjedu w Biskopicach wuspěšny, znajmjeńša najprjedy raz. Wón najskerje z tym ličił njeje, zo bě jězdźidło z GPS-sćelakom wuhotowane. Jako wobsedźer pytny, zo bě awto fuk a padustwo policiji přizjewi, bě Fiat Ducato hižo wjace hač 100 kilometow zdaleny blisko pólskeho Bolesławieca, kaž bě z pomocu techniki zwěsćić. Na to informowachu němscy zastojnicy swojich pólskich kolegow, kotřiž trjebachu jenož GPS-signal sćěhować a tak transporter spěšnje wuslědźichu. Prjedy hač jón wobsedźerjej wróćichu, zawěsćichu w nim slědy. Paducha pak hišće lepili njejsu.
Policija (28.07.22)
Rentnarja zaso namakali
Běła Woda. Zhubjeneho wuměnkarja su předwčerawšim wječor w Běłej Wodźe pytali a zaso namakali. W hladarni 73lětny k wječeri přišoł njebě a w stwě tež njebě. Na to informowaše sobudźěłaćerka policiju, kotraž za mužom pytać započa. Při tym pruwowachu w měsće móžne adresy, dokal je sej rentnar snano dóšoł. Zasadźili su tohorunja wosebje wukubłaneho psa. Wokoło 23 hodź. kedźbliwaj pěškaj muža namakaštaj. Wón ležeše při kolesowanskim puću podłu S 126. Dokelž wón zranjeny njebě, dowjezechu jeho wróćo do hladarnje.
Policija (27.07.22)
Diesel pokradnyli
Kulowc. Z woporom paduchow diesela je so minjeny kónc tydźenja firma w Kulowcu stała. Tam dyrbjachu předwčerawšim rano zwěsćić, zo běchu skućićeljo z wjacorych firmowych jězdźidłow dohromady něhdźe 1 000 litrow ćěriwa pokradnyli. Při aktualnych płaćiznach je rubizna něhdźe 1 900 eurow hódna. Nimo toho načinichu paduši něhdźe 280 eurow wěcneje škody.
Policija (26.07.22)
Muža po zadobywanju zajeli
Wojerecy. Hnydom dwójce je so 35lětny muž z Pólskeje předwčerawšim na Wojerowskej Kolpingowej hasy do wosoboweho awta zadobył. Hižo na pózdnim popołdnju bě sej wón šěry Mercedes C 220 wupytał. Wón hižo w awće sedźeše, jako jeho wobsedźer lepi a wućěri. W nocy zadoby so kriminelny potom do šěreho Škoda Superb. W nim so jemu samo poradźi motor zaswěćić. Tež tu pak bu wón myleny a najprjedy raz pěši ćekny. Kaž Zhorjelska policajska direkcija rozprawja, so 35lětny bórze na to wróći. Mjeztym přiwołana policija jeho lepi a nachwilnje zaja. Pola skućićela naměrichu 1,18 promilow alkohola w kreji. Sudnistwo chcyše wčera rozsudźić, hač muža do přepytowanskeje jatby tyknu. Wo wuslědku rozsuda policija žane informacije njepoda.
Policija (25.07.22)
Transporter přećežki był
Wóspork. Sobotu popołdnju policiji zdźělichu, zo při awtodróze A 4 pola Wósporka něchtó twaršćizny z transportera mjeta. Zo jězdźidło tam steješe pak měješe hinašu přičinu. Ford bě nimale dwójce tak ćežko nakładźeny kaž dowolene. Tohodla bě so jedne z kolesow skóncowało. Zo móhł šofer rezerwowe koleso přišrubować, dyrbješe najprjedy dźěl nakładowanych twaršćiznow z awta wzać, štož je k iritacijam nimo jěducych šoferow wjedło. Po reparaturje a překładowanju twaršćiznow na hinaše awto smědźeše 32lětny pólski wodźer dale jěć. Za swój delikt pak změje wón tučnu pokutu płaćić.
Policija (22.07.22)
Šoferej móšnju kradnyli
Bolborcy. 54lětny wodźer nakładneho awta bu w nocy na srjedu wobkradnjeny. Muž z Ukrainy steješe ze swojim Lkw-jom na parkowanišću w Bolborcach. Jako wón w jězdźidle spaše, wotamknychu njeznaći lěwe durje a spakosćichu šmóratko a móšnju Ukrainjana. Kelko škody při tym načinichu, njeje dotal znate. Kriminalna słužba Budyskeho policajskeho rewěra je pad přewzała.
Policija (21.07.22)
Młodostneju lepili
Wojerecy. We wobchodźe na Wojerowskim Łužiskim naměsće je sobudźěłaćerka zawčerawšim 14lětnjej holcy při kradnjenju lepiła. Jedna z njeju sej twory w hódnoće 90 eurow do nachribjetnika tykaše, tamna situaciju wobkedźbowaše a stražowaše. Sobudźěłaćerka to pytny a jej narěča. Při kontroli jeju tobołow namaka policija pozdźišo najskerje pokradnjenu drastu z dalšeho wobchoda w hódnoće 20 eurow.
