W kuchni so paliło
Pančicy-Kukow. Wohnjowe wobory z Pančic-Kukowa, Wotrowa, Žuric a Chrósćic dyrbjachu njedźelu připołdnju w Pančicach-Kukowje woheń hašeć, kiž bě w bydlenskim domje na Halštrowskej wudyrił. Jako něhdźe 30 kameradow tam dojědźe, so z woknom kuchnje hižo husty kur waleše. Spěšneho zapřimnjenja wobornikow dla, ale tež dźakowano přizjewjakej kura w domskim móžachu rozpřestrěću płomjenjow na dalše rumnosće zadźěwać. Přičinu wohenja policija nětko přepytuje.
Podružnik ničo njepytnył
Wojerecy. W nocy na minjenu njedźelu je w bydlenju na Steinbrückowej we Wojerecach woheń wudyrił. Hosćo dróhoweho swjedźenja w susodstwje informowachu wohnjowu woboru. 37lětny podružnik bydlenja njebě sam ničo pytnył. Rozměr škody dotal jasny njeje.
Woheń w dźěćacej stwě
Budyšin. Wohnjowa wobora, policija a pomocnicy chwatachu wčera rano krótko po wosmich na Budysku Lützowsku. Tam bě so z dotal njeznateje přičiny w dźěćacej stwě jednoswójbneho domu paliło. Wohnjowi wobornicy dyrbjachu špundowanje wočinić. Dźakowano přizjewjakej kura móžachu hóršemu zadźěwać. Spjacy wobydlerjo wostachu njezranjeni. Wěcna škoda wučinja wjacore tysacy eurow.
Do wobchoda so zadobyli
Wojerecy. W nocy na srjedu su so njeznaći we Wojerecach do wobchoda na Budyskej aleji zadobyli. Z njeho spakosćichu woni najwšelakoriše nastroje w hódnoće wjac hač 600 eurow. Nimo toho su paduši wěcnu škodu 150 eurow načinili.
Při wuparkowanju njekedźbowała
Budyšin. 44lětna wodźerka wosoboweho awta marki VW je wčera rano na Budyskej Hornčerskej znjezbožiła. Wona bě ze směra Drjewowe wiki přijěła. Dalša, 49lětna šoferka awta Volvo wujědźe z parkowanskeho městna, njewobkedźbowaše pak při tym přijěducy VW, a zrazy do njeho. VW zajědźe do sćěny, a jeho wodźerka so ćežko zrani.
Pytaja swědkow
Kamjenc. Swědkow wobchadneho njezboža, kotřiž so na barbu ample a na dokładny čas zražki dopominaja, pytaja nětko w Kamjencu. Zazwonić měli woni na policajski zarjad pod čisłom 03578 /3520. Stało bě so njezbožo srjedu, 8. septembra, rano na křižowanišću Wuchodna/Wojerowska dróha w Kamjencu. Wobdźělenaj běštaj 61lětny šofer Forda a 18lětny šofer Nissana.
Njezbožo ze sćěhami
Budyšin. Wodźer běłeho Mercedesa je wčera na Drježdźanskej dróze w Budyšinje-Sćijecach wobchadne njezbožo zawinił. Při wotbočce na Ratarječansku bě wón ze swojim awtom do čorneho Mercedesa zrazył. Wobaj šoferaj dyrbještaj zranjenaj do chorownje. Jězdźidle so dospołnje skóncowaštej. Dróha bě dlěje hač dwě hodźinje zawrjena.
Brónje namakali
Čorny Chołmc. Při kontroli na čaporowych wikach w Čornochołmčanskim Krabatowym młynje je policija kónc tydźenja pola dweju wikowarjow wjacore wjetše nože a dalše brónje namakała, nimo toho njedowolene symbole z Třećeho reicha. Zastojnicy wšitko zawěsćichu a sćazachu. Wikowarjow su chłostajomneho njeskutka dla přizjewili.
Pod wliwom drogow z awtom jěł
Chrósćicy. Hdyž lepja policisća wodźerja awta, kiž pod wliwom drogow jědźe, je to zwjetša w městach. Druhdy pak su zastojnicy tež na wsy wuspěšni, kaž pokaza so to předwčerawšim w Chrósćicach. Tam zadźeržachu w 13.30 hodź. na Hórnikowej 18lětneho šofera VW Golfa. Při tesće so wukopa, zo bě wón amfetaminy brał. Za njeho bě jězba wězo nablaku nimo. Policisća su młodostneho hnydom k wotedaću kreje sobu wzali a jeho delikt přizjewili.
Zaparkować so njeporadźiło
Wojerecy. Wjacore razy zwrěšćiła je 74lětna žona předwčerawšim we Wojerecach, jako chcyše swoje awto parkować. Najprjedy spyta wona swój VW Polo wróćo zaparkować, storči pak při tym do za njej stejaceho VWja. Jako zaso doprědka jědźeše, zrazy do čakaceho Opela. Na to spyta swoje zbožo na hinašim městnje. Při tym pak prasny jeje Polo z připrawu za připowěšak dwójce do murje. Wěcnu škodu trochuje policija na dohromady něhdźe 9 000 eurow.
Pluwaceho paducha zajeli
Budyšin. Paduch je předwčerawšim sobudźěłaćerjow kupnicy na Budyskej Kamjentnej zaběrał. 41lětny předawarkam napadny, dokelž běchu jemu hižo přistup zakazali. Nimo toho bě sej wón twory do nachribjetnika tyknył. Jako chcyše bjez płaćenja wobchod wopušćić, jeho kasěrarka narěča. Muž najprjedy njereagowaše, na čož so jemu sobudźěłaćerjo do puća stupichu. Přećiwo nim so muž masiwnje wobaraše a na nich pluwaše. Skónčnje pak policija přijědźe a 41lětneho zaja.