Policija (22.03.22)
Wopity z kolesom jěł
Šešow. Po tym zo bě 37lětny muž předwčerawšim wječor po wšěm zdaću jara hłuboko do piwoweje škleńcy hladał, je wón po Šešowje z kolesom jěł. Na Nižowjesnjanskej dróze wón 50 metrow za železniskim přechodom padny a so zrani. W chorowni přewjedźeny test wunjese 2,66 promilow alkohola w kreji. Na to dyrbješe hišće krej wotedać. Kaž w rozprawje Zhorjelskeje policajskeje direkcije rěka, změje so muž z Usbekistana nětko wopiłstwa w nadróžnym wobchadźe dla zamołwić.
Policija (21.03.22)
Njezbožo zawinił a ćeknył
Žičeń. 58lětny wodźer nakładneho awta je sobotu w Žičenju (Seitschen) při dwórnišću do parkowanišća kolesow zrazył a ćeknył. Swědk informowaše policiju. Zastojnicy lepichu zawinowarja pozdźišo w Husce a zwěsćichu pola njeho 1,66 promilow alkohola w kreji.
Policija (18.03.22)
Spěšnosć kontrolowali
Rakecy. Dlěje hač pjeć hodźin je policija předwčerawšim popołdnju a wječor spěšnosć na hłownej dróze w Rakecach kontrolowała. Do směra na Budyšin bě wot 600 jězdźidłow 28 přespěšnych. Rekord docpě pólski Opel z 82 km/h. Šofer dyrbi nětko měsac nóžkować a 260 eurow pokuty płaćić. Do napřećiwneho směra bě wuslědk moderatniši. Wot 660 měrjenych awtow bě pjeć přespěšnych, z toho tři we wobłuku pokuty. Najspěšniši z 71 km/h bě VW z Budyskim čisłom. Na wodźerja čakatej nětko dypk w Flensburgu a 115 eurow pokuty.
Policija (17.03.22)
Awto, bus a Lkw do so zrazyli
Zejicy. Njekedźbliwosće dla je so předwčerawšim rano wobchadne njezbožo na křižowanišću statneju dróhow S 100 a S 101 w Zejicach stało. 59lětny wodźer wosoboweho awta typa Toyota njebě tam krótko do 7 hodź. předjězbu busa wobkedźbował. Tón zrazy najprjedy do njezbožo zawinowaceho wosoboweho a na to do nakładneho awta, kotrež na statnej dróze S 101 čakaše. Cyłkowna wěcna škoda na třoch jězdźidłach wučinja něhdźe 10 500 eurow. Kaž w policajskej rozprawje rěka, so na zbožo nichtó njezrani, tak zo su wšitcy wobdźěleni jeničce blachowu škodu poćerpjeli.
Policija (16.03.22)
Bjez dowolnosće a z drogami
Ćisk. Wjacore přeńdźenja zwěsćili su policisća, jako předwčerawšim připołdnju w Ćisku wodźerja VW Passata kontrolowachu. 43lětny njemóžeše uniformowanym žanu jězbnu dowolnosć předpołožić, z kotrejž by směł wosobowe awto wodźić. Dale steješe wón pod wliwom wopojnych srědkow, štož so při drogowym tesće wukopa. Nimo toho měješe samo tež drogi při sebi. Zastojnicy přewodźachu muža k wotedaću kreje. Ale tež 58lětny wobsedźer awta, kiž bě při kontroli přitomny, žadyn jandźel njeje. Wón bě młódšemu jězdźenje ze swojim awtom po wšěm zdaću dowolił, byrnjež tón scyła žanu trěbnu jězbnu dowolnosć njeměł. Tohodla tež na njeho policajska wozjewjenka čaka, a to přizwolenja jězdźenja bjez dowolnosće dla.
Policija (15.03.22)
Jědź w pjecy so smudźiła
Wojerecy. W bydlenju na Wojerowskej Löfflerowej je předwčerawšim wječor přizjewjak kura reagował. Na to informowaše susodka wohnjowu woboru. Jako kameradojo přijědźechu, so z bydlenja hižo kurješe. Wočiniwši durje woni zwěsćichu, zo podružnik doma njebě. Po wšěm zdaću bě wón zabył, zo měješe jědź w zapinjenej pjecy stejo. Tohodla bě cyłe bydlenje zakurjene. Zranił so na zbožo nichtó njeje.
Policija (14.03.22)
W kuchni so paliło
Biskopicy. Pjeć zranjenych wosobow je wuslědk wohenja, kotryž dyrbjachu wobornicy minjeny pjatk wječor w Biskopicach hašeć. 24lětna žona bě tam wolij w fritezy sćopliła, pozdźišo pak na to zaby, tak zo so wolij palić započa. Jeje 23lětny partner chcyše fritezu z wokna ćisnyć, štož pak jemu so njeporadźi a płomjenja so w kuchni rozpřestrěchu. K hašenju wołachu wjace hač 70 wobornikow ze 16 jězdźidłami. Zawinowarka poćerpje šok, 23lětny so na rukomaj ćežko zrani. Kura dla dyrbjachu dalšu 40lětnu wobydlerku domu a jeje dźěsći w starobje šěsć a třinaće lět ambulantnje zastarać.
Policija (11.03.22)
Droha technika fuk
Budyšin. Po wšěm zdaću cyle zaměrnje su so njeznaći spočatk tohole tydźenja na Budyskej Nagelowej do pincy wjaceswójbneho domu zadobyli. Z jednoho pinčneho wotdźěla pokradnychu woni kompletnu hudźbnu připrawu. Sobu wzali su basowu boksu subwoofer, dwaj wótřerěčakaj, tak mjenowany kónčny schodźenk, měšenski pult a mikrofon. Hódnota ekwipmenta wučinja dohromady něhdźe 4 500 eurow.
Policija (10.03.22)
Třo zranjeni po njezbožu
Běła Woda. Tójšto wěcneje škody a třo zranjeni su wuslědk wobchadneho njezboža, kotrež je so wčera rano na zwjazkowej dróze B 156 při wotbóčce do Wochoz stało. 61lětny chcyše ze swojim VWjom z pódlanskeje na hłownu dróhu wotbočić, njewobkedźbowaše pak předjězbu transportera a zrazy do njeho. 39lětny wodźer transportera a 29lětny sobujěducy so snadnje zraništaj. Šofera VWja dowjezechu do chorownje. Wěcna škoda wučinja něhdźe 60 000 eurow.
Policija (09.03.22)
Štom na awto padnył
Smjerdźaca. Na transporter 61lětneho muža je předwčerawšim pola Smjerdźaceje štom padnył. Na zbožo so nichtó zranił njeje. Škoda na awće wučinja něhdźe 2 000 eurow.
