Policija (13.01.22)
Paduši w Serbskim domje byli
Budyšin. W nocy na wutoru su so njeznaći na Budyskim Póstowym naměsće do zarjadniskeho twarjenja zadobyli, zdźěli wčera Zhorjelska policajska direkcija. Z rozprawy njewuchadźa, zo jednaše so wo Serbski dom. To wobkrući zarjadnistwo Załožby za serbski lud. Z rumnosće domownikow pokradnychu skućićeljo dwucyfrowu sumu pjenjez a elektriski grat markow Makita a Bosch. Hódnota rubizny wučinja něhdźe 320 eurow. Nimo toho nasta při zadobywanju něhdźe 200 eurow wěcneje škody.
Policija (12.01.22)
Paduši w bydlenju byli
Budyšin. Do bydlenja na Budyskej Karla Marxowej běchu so njeznaći předwčerawšim w běhu dnja zadobyli. Skućićeljo přepytachu wšitke rumnosće a wočinichu kamory a pisanske blida. Pokradnyli su laptopaj a kameru. Hódnotu rubizny trochuje wobsedźer na 4 000 eurow. Wěcna škoda na bydlenskich durjach wučinja něhdźe 400 eurow.
Policija (11.01.22)
Awće do so zrazyłoj
Horni Wujězd. Ćežke wobchadne njezbožo sta so wčera krótko po 17 hodź. na statnej dróze S 101 mjez Hornim Wujězdom a wotbóčku do Jědlicy. Wodźerka wosoboweho awta typa Seat je tam w křiwicy kontrolu nad swojim jězdźidłom zhubiła a frontalnje do napřećo přijěduceho Hondy zrazyła. Zražka bě tak mócna, zo so motor jednoho awta roztorha. Wobě wodźerce so při tym ćežko zraništej, tak zo dyrbjachu jej do chorownje dowjezć.
Policija (10.01.22)
Katalyzator pokradnyli
Wojerecy. Nimale wšědnje rozprawja policija wo pokradnjenych katalyzatorach awtow. Najnowši tajki pad sta so minjene dny na Wojerowskej Hasy D w tamnišim industrijnišću. Tam bě wobsedźer wosoboweho awta typa Honda Accord swoje jězdźidło srjedu připołdnju wotstajił a so hakle pjatk rano k njemu wróćił. W tym času běchu skućićeljo katalyzator wu-twarili a sobu wzali. Mějićelej awta nasta něhdźe 600 eurow škody.
Policija (07.01.22)
Narunanki kradnyli
Budyšin. Njewšědnu rubiznu běchu sej paduši minjene dny w Budyšinje wupytali. Kaž policija zdźěli, zadobychu so woni do garaže na Wósporskim puću. Tam namakachu wšelake narunanki za zubnu techniku. Te wzachu skućićeljo runje tak sobu kaž cigarety a piwo. Hódnotu rubizny trochuja na něhdźe 4 000 eurow. Policija pad nětko přepytuje.
Policija (06.01.22)
Rentnarce tobołku pokradnyli
Łaz. 78lětna žona je so předwčerawšim z woporom paduchow stała. Wona bě w kupnicy nakupować a je swoju tobołku w nakupowanskim wozyčku po wšěm zdaću wokomik z wočow zhubiła. Tón wšak skućićeljo wužichu a tobołku spakosćichu. W njej běchu nimo wosobinskich wěcow móšeń ze sto eurami a dokumenty rentnarki. Sobudźěłaćerka kupnicy informowaše policiju, kotraž je so wo wšo dalše starała.
Kołp znjezbožił
Běła Woda. Z njewšědnym padom je so wobydler předwčerawšim pola Běłowodźanskeje policije přizjewił. Wón rozprawješe wo znjezboženym kołpju při bywšej cyhelerni. Wulki ptak bě tam někak njezbožownje přizemił a so w płoće zapopadnył. Zastojnicy jeho wuhladachu a informowachu Běłowodźanski zwěrjenc. Tamniši sobudźěłaćerjo so wo kołpja starachu a jeho samsny dźeń zaso na swobodu pušćichu.
Policija (05.01.22)
Tři delikty naraz
Budyšin. Dobry čuch mějachu policisća předwčerawšim popołdnju, jako na Budyskej Curiejowej wosobowe awto typa Škoda zadźeržachu. Při kontroli 26lětneho šofera so wukopa, zo wón scyła žanu jězbnu dowolnosć njewobsedźi. Dale reagowaše přewjedźeny drogowy test pozitiwnje na amfetaminy. A nimo toho měješe młody muž snadne mnóstwo crystala při sebi. Na to zastojnicy přikazachu, zo ma wón krej wotedać, su awtowy klučik kaž tež drogi sćazali a wupisachu wjacore přizjewjenja.
Dźiwje swinjo do awta policije dyriło
Sprjewiny Doł. We wčerawšich rańšich hodźinach je dźiwje swinjo wobsadku policajskeho awta překwapiło. Zastojnicy běchu hižo rano zahe w Sprjewinym Dole po puću, jako ranca nadobo přez puć běžeše a do duri wodźerja jězdźidła dyri. Na zbožo nasta jenož něhdźe 300 eurow wěcneje škody, policisća w awće so njezranichu.
Policija (04.01.22)
Kružny wobchad přewidźał
Słona Boršć. Nowy kružny wobchad pola Słoneje Boršće je předwčerawšim wječor šofer VW Phaetona po wšěm zdaću přewidźał a z wotmachom na připrawjenu hórku zajěł. Wodźerja a sobu jěducu dyrbjachu wobornicy z jězdźidła wućahnyć. Jeju dowjezechu do chorownje.
Policija (03.01.22)
Wandalizm na torhošću
Biskopicy. Njewšědnje sylny praskotak drje běchu silwester krótko do połnocy w Biskopicach wužiwali. Jako tón na torhošću rozbuchny, buštej swětłomjetak kaž tež dźesać metrow zdalena wěstotna škleńca skóncowanej. Škoda wučinja 1 500 eurow.
Telefonowy rozdźělak powalili
Žičeń. Jeničce na kóncowanje wusměrjeni běchu njeznaći w prěnich hodźinach noweho lěta w Žičenju (Seitschen) w Hodźijskej gmejnje. Tam powalichu woni rozdźělowanski kašćik telekomunikaciskeho předewzaća a wutorhnychu tež hišće kable z njeho. Nimo toho rozbichu wokna busoweje čakarnje. Cyłkownje načinichu 1 200 eurow škody.
Listowy kašćik rozbuchnjeny
Budyšin. Po wšěm zdaću z pyrotechniku su njeznaći w silwesterskej nocy listowy kašćik na Budyskej Schäfferowej rozbuchnyli. Wěko kašćika bu wutłóčene a prasny do blisko stejaceho Forda. Dźěle listoweho kašćika wobškodźichu dalše wosobowe awto. Cyłkownu škodu trochuja na něhdźe 1 850 eurow.
Policija (30.12.21)
Drohu techniku pokradnyli
Wulke Ždźary. Na twarnišću we Wulkich Ždźarach dyrbjachu předwčerawšim dopołdnja zwěsćić, zo běchu tam w nocy do toho paduši pobyli. Woni běchu so do wjacorych twarskich kontejnerow zadobyli a 2 000 eurow wěcneje škody načinili. Pokradnyli su po informacijach Zhorjelskeje policajskeje direkcije měrjensku techniki w hódnoće 35 000 eurow.
