Wojerecy (SiR/SN). Čłonojo zjednoćenstwa „IG dźěćace prózdniny“ mějachu hižo lěpše časy. Předsyda towarstwa Hans-Günter Möller rjekny: „Nam ćěkaja čłonojo a tuž mamy problemy dźěćace prózdninske lěhwa personelnje wobsadźić.“ Za to su wjacore přičiny. Na jednym boku skutkuja čłonojo w dźěłowym poměrje a wukonjeja swoje skutkowanje jako poradźowarjo abo nawodźa skupin čestnohamtsce. Druzy čłonojo towarstwa su hižo starši, někotři maja tež strowotne problemy. Tuž njeje aktiwne sobudźěło přeco móžne. Z teje přičiny njewotměwaja so hižo dlěje zymske prózdninske lěhwa. „Organizacija lětnich prózdninskich lěhwow bywa tež dale a ćeša“, Hans-Günter Möller rozłožuje. Loni su dyrbjeli za lěhwo w lěću pjenjezy z kasy towarstwa wu­žiwać, dokelž bě so přemało wobdźěl­nikow přizjewiło.

Lětsa chcedźa do zymskeho prózdninskeho lěhwa do susodneje Pólskeje jěć. Towarstwo pyta tuž za podpěraćelemi, sponsorami a nowymi čłonami kaž tež za poradźowarjemi a praktikantami, kotrymž towarstwo wobswědčenje wo wukonach w hladanskej funkciji přewostaji.

Chcedźa pomnik padnjenych we Wulkich Ždźarach saněrować

Wulke Ždźary (AK/SN). Łazowska gmejna chce saněrowanje dwurěčneho němsko-serbskeho pomnika za padłych Prěnjeje swětoweje wójny při Wulkoždźarowskej cyrkwi podpěrać. Tole potwjerdźi wjesnjanosta Thomas Leberecht (CDU) minjeny štwórtk na zjawnej woby­dlerskej rěčnej hodźinje w Krabatowym Nowym Wudworju. Hižo přichodny ­měsac, w februaru, ma gmejnska rada zasadne wobzamknjenje k tomu tworić. Na to ma jasne hódnoćenje slědować. Dale chcedźa trěbne dźěła do nadawka dać. Do přihotow chce gmejna dobro­zdaće wo stawje pomnika za padłych wojakow při muri kěrchowa zapřijeć. Naprawa saněrowanja ma so při planowanju etata gmejny Łaz wobkedźbować. 

Wjesna rada, wosada a wobydlerjo běchu předewzaće hižo w juniju 2022 nastorčili. Zasadźili su so za to w prěnim rjedźe wjesny předstejićer a gmejnski ­radźićel Tilo Babick kaž tež Jens Gerber jako předsyda wosadneje rady a do­miznowědnik Uwe Donath.

Grodk (JoS/SN). Kaž po cyłej Łužicy, ­wjesela so tež dźěći w pěstowarni „Za­ječa hola“ w Grodkowskim wjesnym ­dźělu Wjaskow (Weskow) na ptači kwas. Swjedźeń ma we wsy dołhu tradiciju. Znajmjeńša z časa, zo tam pěstowarnju maja, a tomu je lětsa 58 lět. Mjeztym ­je zarjadnišćo 32 lěta w nošerstwje ­Dźěłaćerskeho dobroćelstwa AWO. Dźěći w „Zaječej holi“ su lětsa picu sami ­přihotowali. Při tej składnosći su tójšto wo ptačkach wuknyli, předewšěm wo tych, kotrež w zymje w našim regionje wostanu. Na te wašnje ma přihot ptačeho kwasa wosebity pedagogiski zmysł. Na hrajkanišću móža dźěći ptački ­wobkedźbować, wšako je wokoło Zaje­čeje hole lěs.