Policija (11.01.24)
Wjacore delikty zwěsćili
Biskopicy. Dobry čuch mějachu policisća wutoru wječor w Biskopicach, jako tam wodźerku Škody kontrolowachu. Pola 46lětneje zwěsćichu hnydom wjacore delikty. Žona scyła žanu jězbnu dowolnosć njeměješe. Drogowy test wunjese, zo je wona amfetaminy brała. Nimo toho jeje awto zawěsćene njebě a měješe so tuž wotzjewić. Policisća přewodźachu žonu k „darjenju“ kreje.
Poslednje předstajenje
Njebjelčicy. Štóž njeje dotal hišće inscenaciju Kulowskeho Bratrowstwa „Tónkróć něšto z niwowom!“ widźał, změje njedźelu, 14. januara, w Njebjelčicach poslednju składnosć to nachwatać. Hrajerki a hrajerjo předstaja swoju komediju w 16.30 hodź. w Njebjelčanskej „Bjesadźe“. Wšitcy lubowarjo serbskeho lajskeho dźiwadła su wutrobnje přeprošeni.
Mjenje porodow
Budyšin. W lěće 2023 je so w Budyšinje 621 dźěći narodźiło. To bě mjenje hač w lětomaj do toho (2022: 740; 2021: 820). Najwoblubowaniše mjena pola holcow běchu Frieda (8), Emilia a Mia (wobě 6) kaž tež Charlotte, Emma, Lina a Lotta (stajnje 5). Pola hólcow běštaj Emil a Finn (wobaj 6) wosebje woblubowanaj, na dalšich městnach běchu Konstantin a Luca (stajnje 5) kaž tež Aaron, Anton, Leo, Lio, Louis, Milo a Oskar (stajnje 4).
Pěstowarnju lětsa dotwarja
W Slepom planuja medicinski zastaranski centrum
Slepo (AK/SN). Nowotwar Witaj-pěstowarnje „Milenka“ w Rownom, kotraž je w nošerstwje Slepjanskeje gmejny, chcedźa po móžnosći lětsa zakónčić. Tónle cil wuzběhny wjesnjanosta Jörg Funda (CDU) wutoru na posedźenju gmejnskich radźićelow. Woni přepodachu metalotwarske dźěła kaž tež zatwar woknow a durjow we wobjimje 180 000 eurow Wojerowskej firmje.
Z cyłkownje dźesać poskitkow, kotrež su po wupisanju dóstali, je Wojerowske předewzaće najlěpši zapodało, rozłoži twarski nawoda Slepjanskeje gmejny Steffen Seidlich. Sumy jednotliwych poskitkow sahachu wot 180 000 hač do 275 000 eurow. Hodźinska mzda saha wot 52 eurow hač do 80 eurow. A časowy wobjim za wšitke dźěła sahaše wot 1 369 hodźin hač do 1 600 hodźin. Kaž Seidlich dale rjekny, bě poskitk Wojerowskeje firmy 13 procentow pod wot planowanskeho běrowa wobličenymi kóštami. Tak móže gmejna něhdźe 26 000 eurow zalutować.
Tež w zymje dale dźěłaja
Wóspork (UM/SN). Při twarskich dźěłach za nowy móst statneje dróhi S 112 nad Lubatu we Wodowej Korčmje (Wasserkretscham) pola Wósporka žane wjetše přetorhnjenja w zymskich měsacach planowane njejsu. „Chcemy po móžnosći bjez wulkeje zymskeje přestawki dale dźěłać“, praji nowinski rěčnik Krajneho zarjada za dróhotwar a wobchad Franz Großmann. Stary móst je mjeztym wottorhany a fundamenty za nowy su přihotowane. Móst samy ma tak spěšnje kaž móžno slědować. Dołhož njeje wšitko hotowe, dyrbja šoferojo wupisanu wobjězdku dale wužiwać. Jeničce při zatwarje hotowych betonowych dźělow móže ke krótkodobnym poćežowanjam nadróžneho wobchada na statnej dróze S 111 dóńć.
Dźakowano krutemu a wobstajnemu zmjerzkej móžeš nětko na mnohich ...
Krótkopowěsće (11.01.24)
Zrěčenje podpisałoj
Kamjenc. Wokrjes Budyšin a město Kamjenc stej runohódnej partneraj w zaměrowym zwjazku za natwar noweje Lessingoweje kupjele w Kamjencu. Krajny rada Udo Wićaz (CDU) a wyši měšćanosta Roland Dantz (njestronjan) staj wotpowědne zrěčenje wčera w tamnišej halowej kupjeli podpisałoj. Zazběh twarskich dźěłow je za lěto 2026 planowany.
Nowa doba spěchowanja OHTL
Rakecy. Leaderowy region Hornjołužiska hola a haty (OHTL) je druhu projektowu namołwu za spěchowansku periodu Europskeje unije 2023–2027 wozjewiło. Požadanski čas za projekty skónči so 4. měrca. W cyłku maja 790 000 eurow spěchowanskich srědkow za přesadźenje lokalnych wuwićowych strategijow w LEADER-regionje za wšelke naprawy z dźesać wobłukowo k dispoziciji.
Digitalnje dźěłaca uniwersita
„Pozitiwny wothłós“ a „sprawne wjeselo“
Wotrow (SN/bn). Pod hesłom „Merles mystische Abenteuer“ je awtorka Stefanie Domašcyna dotal dwaj romanaj wudała (SN rozprawjachu). Wobě wotbłyšćujetej fiktiwne dyrdomdeje młodeje holcy, kotraž zhromadnje z přećelemi najwšelakoriše wužadowanja zmištruje. Serbska resp. łužiska mytologija twori w tym zwisku takrjec rjap jednanja. Minjeny pjatk je spisowaćelka swojej knize w něhdyšej Wotrowskej šuli předstajiła, přečitawši wurězki z prěnjeho zwjazka „Die Krone des Schlangenkönigs“.
Wothłós publikuma – přichwatało je něhdźe 50 zajimcow – bě po słowach Domašcyneje „přewšo pozitiwny. Mějach zaćišć, zo su so ludźo sprawnje nad tym wjeselili, zo sym tu była a knize předstajiła, kotrejž sym na zakładźe serbskich powěsćow napisała“ a kotrejž matej nastupajo jednanje geografisce „jasne regionalne ćežišćo“.
Wjesnjenjo zhromadnje pućowali
Policija (10.01.24)
Awto pokradnjene a namakane
Pančicy-Kukow. Sobudźěłaćer twarskeje firmy dyrbješe dźensa rano w Pančicach-Kukowje zwěsćić, zo bě něchtó jeho zamknjeny firmowy transporter pokradnył. W 4.50 hodź. zahajene pytanje za Citroënom Jumperom bě hižo po ani połdra hodźinje wuspěšne. W 6.10 hodź. wuhladachu policisća transporter w Mužakowje. Paduchej bě so bohužel poradźiło twochnyć.
Wo planowanju ćopłoty
Budyšin. Pod hesłom „Zhromadnje za na přichod wusměrjene ćopłotne planowanje“ přewjedźe Budyski měšćanski zwjazk CDU swoje prěnje lětuše zjawne stajne blido. Zarjadowanje wotměje so štwórtk, 11. januara, w 19 hodź. w Budyskej piwarni na Mannowej. Měšćanosta za twarstwo a měšćanske wuwiće Heiko Nowak chce wobdźělnikow wo aktualnym stawje ćopłotneho planowanja informować. Po tym budźe rozmołwa.
Tři skupiny hraja hardcore
Budyšin. Kapały Street Hammer, Sick Times a Slapface zahudźa sobotu, 13. januara, w Budyskim Kamjentnym domje hardcore a punk. Zastup je wot 19.30 hodź., koncert započnje so w 20.30 hodź. Lisćiki za 13 eurow w předpředani dóstanu zajimcy pod .
