Choćebuski stadion přemjenowany
Krótkopowěsće (19.12.23)
Kaulfürst naslědnik Bartelsa
Budyšin. Dr. Fabian Kaulfürst nastupi klětu spočatk januara zastojnstwo wotrjadnika wobłuka rěčespyt Serbskeho instituta. Z nim „budźe nimoměry dokładnje wukubłany sorabist rěčespytne dźěło w Choćebuzu kaž tež w Budyšinje nawjedować“, dotalny načolnik prof. dr. Hauke Bartels podšmórny. Bartels bě funkciju něhdźe 20 lět wukonjał a chce so nimo nadawkam jako direktor SI „dale dokumentaciji delnjoserbšćiny“ wěnować.
Předsydku znowa wolili
Budyšin. Čłonki a čłonojo spěchowanskeho towarstwa Serbskeho muzeja w Budyšinje su wčera na swojej hłownej a wólbnej zhromadźiznje dr. Annett Brězanec jako předsydku wobkrućili. Jako městopředsydu wuzwolichu Clemensa Brězana, za financnika Marka Suchyja. Předsydstwu přisłušeja nimo toho Helena Pallmanowa a Andrea Pawlikowa.
Jězus w tramwajce
W programje hwězdu pytałoj
Worklecy (SN/AN). Serbska zakładna šula „Michał Hórnik“ Worklecy přeprosy pjatk wječor na swój adwentny koncert do tamnišeje sportoweje hale. Pod wuměłskim nawodom wučerkow Jadwigi Ošikoweje, Boženy Hojerec a Milenki Cyžoweje předstajichu šulerjo a šulerki zabawny dwurěčny program. W nim pytaštaj hłownej akteraj Lukas Šołta jako Jank a Hanka Wałdźic jako Hanka za potajnej adwentnej hwězdu. Při tym zetkaštaj mjez druhim Sněholinku, lutki abo tež sněženki. Sportowa hala běše hač na poslednje městno wobsadźena. Staršiska band je nimale hodźinski program hudźbnje wobrubiła.
Po programje poskićichu słódnu kołbasku abo horce napoje.
„Štom žiwjenja“ nastajili
Posledni raz za dobry skutk
Beneficny koncert pola Rynčec zaso wulki wuspěch był
Jaseńca (CŠ/SN). Na Rynčec statoku w Jaseńcy bě sobotu mjeztym dźesaty beneficny koncert skupiny PoŠtyrjoch. W lěće 2011 su prěni raz w bróžni Floriana Rynča wustupili. Do toho su spěwarjo a wobsedźer dwora na narodninach ideju zrodźili. A podpěra je so spěšnje namakała. Najwšelakoriše ćělesa jich minjene lěta přewodźachu, najwjetši dźěl akustisce, bjez někajkeje techniki. A tež sobotu zaso tak bě. Na jubilejny koncert su hnydom tři dalše skupiny přeprosyli. Tak přednjesechu Wólbernosće znate kruchi, tež Přezpólni zaspěwachu swoje štučki, zdźěla zhromadnje z publikumom, z kotrymž hrónčka krótko do toho nazwučowachu. A Florian Rynč je tež swojich dujerskich přećelow skupiny Tutn und blasn do rjenje wuhotowaneje bróžnje witał. Woni su so na lóštne wašnje tohorunja wo posměwk mjez wopytowarjemi starali.
Adwentne woknješko
Za kubłanski dźeń so přizjewić
Budyšin. „Žiwy być kaž w paradizu?!“ rěka hesło kubłanskeho dnja, na kotryž přeprošuje dekanatne dušepastyrstwo wšitkich młodostnych a młodych dorosćenych w starobje 18 do 30 lět sobotu, 6. januara 2024, do Ewangelskeho centruma za dźěći a młodźinu TiK w Budyšinje. Za zastaranje, program a zawěsćenje zběraja přinošk dźesać eurow. Přizjewjenja přijimuja hač do wutory, 19. decembra, online. Link je pod wozjewjeny.
Kónclětny hudźbny nyšpor
Baćoń. Woblubowany kónclětny hudźbny nyšpor w Baćońskej cyrkwi wuhotuje njedźelu, 31. decembra, w 17 hodź. „Chór Šnajdrec wnučkow & co.“ Ćěleso wobsteji z 13 potomnikow njeboh Hany Šnajdroweje a Bena Šnajdra ze Smječkec a jich mandźelskich resp. partnerow. Nawod změje Jadwiga Kaulfürstowa, tohorunja jedna z wnučkow. Na wopytowarjow čaka pisany rjad kěrlušow z wjacehłósnym chórom we wulkej a mjeńšej wobsadce z mnohimi solemi, zdźěla z hudźbnym přewodom kaž tež instrumentalny přinošk z dwojimi huslemi a klawěrom.
Policija (18.12.23)
W bance zamknjenaj byłoj
Kamjenc. Na njewšědne wašnje je sobotu wječor policija wobydlerjomaj w Kamjencu pomhała. Wonaj chcyštaj w bance na torhošću pjenjezy wotzběhnyć. Dypkownje w 23 hodź. pak so durje banki awtomatisce zamknychu a wobydlerjej njemóžeštaj hižo won. Po dorěčenju z wěstotnej firmy zastojnicy wobydlerjomaj „instrukcije“ sposrědkowaštaj, zo móhłoj so samaj wuswobodźić. To so skónčnje tež poradźi.
Lětsa wjace ludźi w kupjeli było
Kulow (AK/SN). Kulowsku lěsnu kupjel je lětsa 18 000 ludźi wopytało. To bě tójšto wjace hač w lětach do toho. Na to skedźbni měšćanosta Markus Posch (CDU) na zašłym posedźenju měšćanskeje rady. „To je jara pozitiwny puć. Dźakowano modernizowanemu suwadłu ma naša kupjel dobry wothłós, a to hačrunjež bě lětsa na wjele dnjach dešćikojte wjedro“, wón rjekny. W lěće 2022 mějachu 17 000 wopytowarjow, lěto do toho 11 500.
Wopytowarjo přichadźeja hač z Drježdźanskich kónčin. „Při dnjowym zastupnym lisćiku za 2,50 eurow na wosobu móžeš to bjeze wšeho rozumić. Tajke něšto drje w Drježdźanach a wokolinje njenamakaš“, praji Posch. Po jeho słowach dyrbi město za kupjel wobstajnje dale pjenjezy připłaćić. Přiwšěm chce komuna jako nošer wólnočasne wočerstwjenišćo dołhodobnje wudźeržować. Wšako je kupjel z jeje kupanskim mištrom Uwe Mikelu wažny garant za to, zo dźěći płuwać nawuknu. Měšćanosta tuž podšmórny: „Chcemy kupjel dale wobchować.“
Popłatk socialnje znjesliwje zwyšić
Rakecy (JK/SN). Jenički wusahowacy a gmejnsku radu přiwšěm wužadacy dypk dnjoweho porjada poslednjeho lětušeho posedźenja Rakečanskeje gmejnskeje rady wěnowaše so njelubej temje: popłatkam za pitnu wodu a wopłóčki. Posledni raz běchu tele popłatki 2016 zwyšili a wostajichu je po štyrilětnej płaćiwej dobje w lěće 2020 na samsnym niwowje. Stupace płaćizny za wobhospodarjenje a wudźeržowanje připrawow za zastaranje z pitnej wodu a za wotstronjenje wopłóčkow pak su mjeztym čujomnje zwyšili. Rakečanska gmejna zaruča zastaranje z pitnej wodu w swójskej režiji ze swójskej připrawu. Wopłóčki wotstronjeja w Rakecach samych centralnje, we wjesnych dźělach hromadźa wopłóčki zwjetša w jamach a je decentralnje wotstronjeja. To žada sej tuž wosebite wobličenje a tak zdobom hinaši popłatk.
