Hač do pjatka wšědnje wot 17 do 18 hodź. zběra towarstwo swj. ...
Ćopłoty dla do přichoda myslić
Kak budu so města Wojerecy, Grodk a Běła Woda přichodnje z ćopłotu zaběrać bě wčera tema na posedźenju Wojerowskeje měšćanskeje rady. Za to dachu wosebitu studiju zhotowić.
Wojerecy (AK/SN). Při zastaranju z energiju chce so město Wojerecy přichodnje na dalnoćopłotu koncentrować. „Wona je hospodarsce efektiwna a najpřijomniša warianta, předewšěm tam, hdźež wjele ludźi bydli“, wuzběhny jednaćel Wojerowskich zastaranskich zawodow Wolf-Thomas Hendrich wčera na posedźenju měšćanskeje rady. Radźićelow informowaše wón wo studiji, kotraž pokaza puće, kak móhli so Wojerecy, Běła Woda a Grodk přichodnje z ćopłotu zastarać. Studiju zdźěłał je Fraunhoferski institut. Na zakładźe studije ma Wojerowske měšćanske zarjadnistwo nětko pobrachowacy dźěl komunalneho ćopłotneho planowanja zdźěłać.
Krótkopowěsće (29.11.23)
Wjelka popadnyli
Ochranow. Sakski zarjad za wobswětoškit, ratarstwo a geologiju je wčera wopodstatniło, zo dyrbjachu fachowcy choru wjelčicu popadnyć a zasparnić. Młode zwěrjo běše widźomnje słabe. Wjacore ludźi su wjelka minjenu njedźelu w Großhennersdorfje blisko Ochranowa wuhladali a to přizjewili.
Cyłoněmski semesterski tiket
Drježdźany. Na jednotny semesterski tiket, kotryž ma z lětnim semestrom 2024 startować, su so Zwjazk a kraje předwčerawšim dojednali. Studentam zmóžni so tak tiket z měsačnej płaćiznu 29,40 eurow. Woni smědźa z nim wšitke wobchadne srědki zjawneho wosoboweho bliskowobchada wužiwać. Studentske zastupnistwa dojednaja so k tomu z wotpowědnymi tarifowymi zwjazkami.
Darja Ukrainje helikopter
Nowe wuhlady za historiski turbinowy dom
Běły Chołmc (AK/SN). Domizniske a kulturne towarstwo Běłochołmčanska turbina je nětko mějićel historiskeho turbinoweho domu we wsy. „Smy dom spočatk měsaca dospołnje přewzali. Hač do toho słušeše wón zawodej za sakski imobilijowy management a Łazowskej gmejnje. Z woběmaj smy so dojednali a kupne zrěčenje podpisali“, zdźěli předsyda towarstwa Rolf Möbius. Towarstwo móže nětko dom saněrować započeć a so na wobsahowe dźěło koncentrować.
Prěni nadawk budźe twarjenje wurumować a wokna sporjedźeć. Cyłkowne saněrowanje płaći po prěnim trochowanju něhdźe 60 000 eurow. „Chcemy so wo spěchowanske srědki prócować, ale tež wjele dźěłow sami wukonjeć“, praji Möbius. Zaměr je, twarjenje dołhodobnje zachować. Z nim su něhdy staw wody w jednotliwych hatach regulowali a milinu dobywali, čehoždla bě turbinowy dom za wjes dosć wažny. Nětko chcedźa twarjenje z nowym žiwjenjom napjelnić a je jako zetkanišćo wobydlerjow wužiwać. Mjez druhim planuja wustajeńcy, přednoški, čitanja a spěwne wječory.
Policija (28.11.23)
Paduši w gratowni
Budyšin. Gratownju dobrowólneje wohnjoweje wobory w jednym z Budyskich měšćanskich dźělow su sej njeznaći w nocy na njedźelu jako cil wupytali. Po tym zo běchu so do jězdźidłoweje hale zadobyli, pokradnychu z jednoho Lkw-ja hydrawliski dźěłowy grat wobornikow w hódnoće něhdźe 5 000 eurow. Nimo toho nasta 2 000 eurow wěcneje škody.
Zhromadnje poprjancy pjekli
Kniha změje premjeru
Budyšin. Smolerjec kniharnja w Budyšinje přeprosy na knižnu premjeru. Štwórtk, 30. nowembra, w 19 hodź. prezentujetaj přełožowarka Dorotheja Šołćina kaž tež přełožowar a wudawaćel Benedikt Dyrlich knihu „Posledni sněh/Der letzte Schnee“. Awtor knihi, kotraž je w nakładnistwje Pop w Ludwigsburgu wušła, je nakładnik a basnik Traian Pop Traian.
Na institutny dźeń
Budyšin. Serbski institut přewjedźe jutře, srjedu, wot 14 do 17 hodź. swój institutny dźeń w Budyskim Serbskim domje. Po powitanju přez Hauke Bartelsa porěči Edmund Pjech na temu „Mjez kooperaciju a konfrontaciju. Jan Skala (1889–1945) a jeho skutkowanje w Zwjazku narodnych mjeńšin Němskeje“. W 14.40 hodź. pledujetaj Lutz Laschewski a Julija Běrinkowa pod hesłom „100 000 serbsce powědacych hač do 2100“ za daloko sahace rěčne planowanje. Wo wužadanjach a namakankach při zawěsćenju awdiowizuelneho kulturneho herbstwa porěčitaj w 14.55 hodź. Wito Bejmak a Měrćin Brycka. Dale předstajeja Jana Šołćina, Leńka Šołćic a Jan Bogusz w 16 hodź. wuslědki ewaluaciju koncepta 2plus.
Přednošuje wo Wendlandźe
Alarmuja prěnich pomocnikow
Z pilotowym projektom móža mnohim pacientam spěšnišo pomhać
Wojerecy (SN). Wo projekće „Region žiwjenskich wuchowarjow“ je so tele dny sakski nutřkowny minister Armin Schuster (CDU) we Wojerowskej integrowanej wuchowanskej dispatcherni wuchodneje Sakskeje informował. Projekt zwjazuje wukubłanych prěnich pomocnikow z dispatchernju a je prěni pilotowy pospyt tajkeho razu w Sakskej.
Maja nowy princowski por
Lědma zo su w Kulowje 11. nowembra lětušu 318. karnewalowu sezonu zahajili, su tam na dwěmaj zarjadowanjomaj w sportowni nowy princowski por a jeho dwórskeho maršala předstajili.
Kulow (MKl/SN). Runje tak kaž 18. nowembra je so minjenu sobotu dalši kapičkowy wječor Kulowskeho karnewaloweho towarstwa w tamnišej sportowej hali wotměł. Hosćom poskićichu tři hodźiny trajacy wotměnjawy jewišćowy program. Lětsa akterojo na jewišću předewšěm wjele wo tuchwilnej nutřkownej politice w Němskej žortowachu a njedostatki na swoje wašnje pošwikachu. Wulki aplaws žněješe mjez druhim double Ericha Honeckera, kiž něhdyšeho předsydu statneje rady NDR z gestiku a hłosom awtentisce napodobni.
Zymske wjedro a zasněžene puće su so dźensa w Hornjej Łužicy wo ...
Zymske wjedro a zasněžene puće su so dźensa w Hornjej Łužicy wo wobchadne poćežowanja starali. Ćežke wobchadne njezbožo sta so krótko do 8 hodź. na statnej dróze S 101 při wotbóčce do Jědlicy. Tam stej BMW a Škoda do so zrazyłoj. Dwě zranjenej wosobje dowjezechu do chorownje. Po wšěm zdaću bě njepřiměrjena spěšnosć na zalodźenym puću přičina zražki. Foto: Rocci Klein
