Łužica mało potrjechena

Drježdźany. We Łužicy njejsu wěstotne słužby a policija wulke škody wichora Zoltana dla zwěsćili, kiž je zašłu nóc zachadźał. W prěnim rjedźe rozrubachu a zrumowachu wohnjowi wobornicy jednotliwe štomy, kotrež běchu na dróhi padnyli. W cyłku běchu woni w Hornjej Łužicy 15 króć, mj. dr. we Wojerecach, Kubšicach a Lubiju po puću.

Šulske połlěto zakónčene

Budyšin. Sakscy gymnaziasća 12. a 13. lětnika, kotřiž so na maturu přihotuja, su hižo dźensa swoje połlětne wuswědčenje přijeli. Šulerjo powołanskošulskeho gymnazija mějachu dokument zdźěla hižo wčera w ruce. Přičina za to je nadměru krótke šulske lěto. Posledni šulski dźeń za abiturientow je klětu kónc měrca.

Rozrost wukrajnikow w Čěskej

Praha. Po zdźělenju Čěskeho statistiskeho zarjada je ličba wukrajnikow w Čěskej dotalny rekord docpěła. Wokomiknje jedna so wo 1,1 milion ludźi, to rěka 10,3 procentow wobydlerjow kraja. Jenož třećina pak změje dowolnosć k trajnemu přebywanju. Wulki rozrost zwisuje wosebje z přiwzaćom wjace hač 600 000 ukrainskich ćěkancow na přechodne přebywanje.

Hornja Hórka (HG/SN). Muskej spěwnej towarstwje z Hornjeje Hórki a Budestec kaž tež šulski chór Hornjohórčanskeje zakładneje šule wuhotowachu njedawno w Hornjohórčanskej sportowni adwentny koncert. Předsyda Hornjohórčanskeho chóra Ulf Müller hosći powita. Zazběh a finale poskićachu cyłki zhromadnje. Kóždy chór přednjese tež swójski dźěl dwuhodźinskeho programa z woblubowanymi hodownymi pěsnjemi. Přewodźeli su program Moritz Papitz na klawěrje, Jens Gabriel a wučer Michael Klöpper. Gymnaziastka Samira překwapi ze solomaj z klawěrnym přewodom. 380 wopytowarjow w kopaće połnej hali mytowaše kóždy spěw ze sylnym přikleskom, najsylniši za šulski chór a za młodu solistku. Na kóncu so Ulf Müller ­wopytowarjam kaž tež wšitkim, kotřiž su k poradźenju koncerta přinošowali, wutrobnje dźakowaše.

Chróšćanska gmejna je njedawno swojich wuměnkarjow na adwentničku přeprosyła. Něhdźe 60 rentnarjow bě přeprošenje wjesnjanosty Marka Klimana (CDU) do wjacezaměroweje hale „Jednota“ sćěhowało. Dźěći Chróšćanskeje serbskeje zakładneje šule „Jurij Chěžka“ poskićichu pod nawodom Daniele Hazec rjany adwentny program. Po słódnym kofeju njeje k wuměnkarjam rumpodich přišoł, ale policija. Wobydlerskaj policistaj rozjasništaj, kak maš so w padźe „wnučkoweho wobšudnistwa“ zadźeržeć. Wjesnjanosta Marko Kliman wo zwoprawdźenych projektach 2023 a wo planach za nowe lěto rozprawješe. Foto: Katrin Młynkowa

Chrósćicy. Nowe serbske hudźbne widejo kapały Horjany je wot dźensnišeho na YouTube-kanalu „Serbska hudźba – Sorbian music“ widźeć. Kaž Sonja Hejdušcyma z kapały zdźěli, zwjazuje hudźbne widejo „Hindraško“ tradiciju z modernu. Za swój projekt su starej serbskej ludowej spěwaj za wobsadku dujerskeje kapały aranžować dali a z tym spěwaj w modernym stilu dźensnišemu časej wotpowědujo wožiwili. Nastał je medley „Hin­draško“ zdźěla w rytmje Balkana. Nimo nahrawanja noweho medleyja přez kapału Horjany w studiju w Bretnigu su k tomu widejo natočili. Awdijoprodukt so přez znate streamingowe słužby (na přikład spotify) šěrokej zjawnosći spřistupnja, wosebje tež młódšej generaciji. Kapała Horjany je tutón projekt za hajenje serbskeje rěče a serbskeho spěwa z podpěru wubědźowanja „simul+ čiń sobu“ zwoprawdźiła. Zakład medleyja stej skerje njeznatej ludowej spěwaj „Hindraško, ty synko mój“, po ludowym teksće a melodiji wobdźěłany wot Bjarnata Krawca, a „Šěrik, měrik bałdrijan“ na tekst Jana Lajnerta a melodiju Bjarnata Krawca.

Wustajeńcu podlěša