Krótkopowěsće (17.06.22)
Incidenca zaso přiběra
Budyšin. Natyknjenja z koronawirusom najebać lětnje temperatury tež w Hornjej Łužicy zaso přiběraja. W běhu tydźenja je incidenca po Roberta Kochowym instituće wot pod 100 na dźensa 193,3 w Budyskim wokrjesu a 183,6 we wokrjesu Zhorjelc stupała. Tuchwilu wothladuja w Budyskim wokrjesu jědnaće wosobow z pozitiwnym koronatestom w chorowni.
Wuměłcy móža so přizjewić
Lubin. Za Błótowski wuměłski festiwal aquamediale 15, wotměwacy so klětu wot 3. junija do 30. septembra, staj zarjadowarjej wokrjes Dubja-Błóta a spěchowanske towarstwo aquamediale open call wozjewiłoj. W nim namołwjeja wuměłcow swoje projektowe namjety k lětušej temje „Unart Natur | čłowjek prokontra přiroda“ zapodać, a to hač do 15. julija.
Rudne hory zwičnjeć
Nowa sportownja poněčim rosće
Kultura słuša do srjedźišća zjawnosće
Delni Wujězd (JoS/SN). Z wosebitym piknikom w hrodowym parku su minjenu njedźelu w Delnim Wujězdźe kedźbnosć zjawnosće za kulturne pomniki we wsy zbudźili. Nastorčiło bě tele zarjadowanje spěchowanske towarstwo Zemjanstwowy pedagogium Dannenbergowy dom. Kaž Karsten Kunaschk jako hrabja Friedrich Caspar von Gersdorf wopytowarjam rozprawješe, chcedźa so wosebje wo hród z parkom, zemjanstwowy pedagogium a ewangelsku cyrkej starać. Tu drje njetrjebaja so saněrować, wona słuša cyrkwi. Boži dom pak je wobstatk kulturneho ansambla wsy.
Předstaja wubědźowanje
Wojerecy. Sakski fonds „Čiń sobu“ podpěruje we wšelakich regionach ideje, kotrež towaršnostnu zhromadnosć zesylnja, žiwjenske wuměnjenja polěpša a regionalnemu wuwiću w Swobodnym staće Sakskej přinošuja. Zo móhli prawje wjele idejow zwoprawdźić, je nětko składnosć, wubědźowanje Simul+ we wobłuku informaciskeho zarjadowanja lěpje zeznać. Krajny kuratorij za wjesnu kónčinu přeprošuje tuž zajimcow póndźelu, 20. junija, w 17 hodź. na Wojerowsku dźěćacu a młodźinsku farmu. Nimo projektoweho nawody wubědźowanja Simul+ Christopha Biele steja wopytowarjam dalši fachowcy za prašenja k dispoziciji. Přizjewjenje trěbne njeje.
Na židowskich slědach
Smochćicy. Ze židowskimi korjenjemi a stawiznami w Hornjej Łužicy zaběra so přednošk póndźelu, 20. junija, w 19.30 hodź. w Smochčanskim kubłanišću swjateho Bena. Markus Bauer ze spěchowanskeho kruha Zhorjelskeje synagogi poda dohlad do žiwjenja a skutkowanja Židow a Židowkow na wšelakich městnach regiona. Zarjadowanje wotměje so we wobłuku rjada „Dźěłowy kruh zetkanje ze Židowstwom.“ Přizjewjenje trěbne njeje.
Policija (16.06.22)
Wopiteju lepili
Chrjebja/Hamor. Policisća z Běłeje Wody su předwčerawšim dweju šoferow lepili, kotrajž běštaj hłuboko do piwoweje škleńcy hladałoj. W Chrjebi sedźeše dopołdnja 65lětny muž za wodźidłom Škody. Pola njeho naměrichu 2,06 promilow alkohola w kreji. Z kontrolu reagowachu zastojnicy na pokiw swědka. Wječor zadźeržachu w Hamoru 56lětneho wodźerja Citroëna. Wón měješe 2,5 promilow alkohola intus. Kaž so wukopa, muž ani jězbnu dowolnosć njeměješe.
Dalše płuwace domy na jězoru
Hamor (AK/SN). Připrawu płuwacych domow při Klětnjanskim přibrjohu Bjerwałdskeho jězora wo tři dalše domy rozšěrja. Wo tym informowaše Hamorski wjesnjanosta Achim Junker na zašłym posedźenju gmejnskeje rady. Kónc junija/spočatk julija šestu jednotku za kónčnu montažu na jězoru přiwjezu. Z tym móža dalši dowolnicy připrawu wužiwać. „Płuwace dowolowe domy móža zajimcy internetnje pod www.schwimmendeshaus.de skazać“, Junker zdźěli.
Porno tomu dliji so při Klětnjanskim přibrjóze planowane sanitarne twarjenje. Hórnistwowy saněrowar LMBV chce projekt z pomocu srědkow ze strukturneje změny zwoprawdźić. Prěnje wupisanje planowaneho projekta wosta bjez wuslědka. Dalše wupisanje měrješe so na šěrši kruh firmow. Kmany poskitk pak znowa njedóstachu. Cyłu proceduru dyrbja nětko hišće raz wospjetować, praji Achim Junker. Najwjetši problem móžnych zajimcow bě, nadeńć twarsku firmy za hłubokotwarske dźěła.
Twarski projekt nětko konkretny
Radwor (SN/MkWj). Bydlenjotwarski projekt „Stara Budyska dróha“ w Radworju dóstawa konkretne formy. Na wčerawšim posedźenju tamnišeje gmejnskeje rady je jón Jana Menzel, sobudźěłaćerka Budyskeho krajinoweho architekturneho běrowa Panse, hišće raz předstajiła. Na terenje mjez wjacezaměrowej halu Slavia a Starej Budyskej dróhu do směra na Borančansku dróhu ma cyłkownje 22 twarskich ležownosćow nastać. Na nich móža zajimcy jedno- a dwuswójbne domy z najwjace dwěmaj poschodomaj natwarić. Wulkosć ležownosćow je tuchwilu hišće wariabelna. Wobchadne přiwjazanje k Borančanskej dróze njeje planowane. Dróha po sydlišću započina so za Slaviju a kónči so na Starej Budyskej dróze. Podłožki maja w juliju a awgusće w gmejnskim zarjedźe wuležeć. Klětu w nalěću móhli twarske dźěła zahajić.
Dalši twarski projekt w Radworju chcedźa wot srjedź julija hač do kónca awgusta zwoprawdźić: nowe parkowanišćo při křižowanišću pola kěrchowa. W tymle času njeje parkowanje na nětko hišće prowizoriskim parkowanišću móžne.
Wěru zjawnje wuznawali
Po lětomaj přestawki procesiony zaso k wonkownym wołtarkam šli
Ralbicy (SN/MWj). Wysoki swjedźeń Božeho ćěła su dźensa w serbskich katolskich wosadach zaso dostojnje swjećili. Wón je nimo hód, jutrow a swjatkow sobu najwažniši cyrkwinski podawk lěta, z kotrymž kemšerjo wuznawaja, zo wěrja do Jězusa Chrystusa jako přitomneho w přežohnowanym woblatku. Hinak hač w zašłymaj lětomaj kročachu wěriwi lětsa po Božej mši zaso w dołhich procesionach z cyrkwjow k wonkownym wołtarkam, kotrež běchu na tradicionalnych městnach natwarjene. Puć k nim bě na mnohich městnach z mejkami wupyšeny, nimo toho su mjeńše družki a dalše dźěći pisane kćenja kwětkow na puć słali. Zdźěla mějachu wobydlerjo swoje domy z cyrkwinskej a ze serbskej chorhoju wupyšene. Procesiony přewodźachu zwjetša wosadni dujerjo.
Rozsudne je, wolerki a wolerjow mobilizować
Bój wo načolne zastojnstwo w Budyskim krajnoradnym zarjedźe dźe dale. Hinak hač w Braniborskej, hdźež smětaj k rozsudnym komunalnym wólbam jenož kandidataj z najlěpšimaj wólbnymaj wuslědkomaj nastupić, w Budyskim wokrjesu wšitcy požadarjo 3. julija hišće raz kandiduja.
Kamjenc (BG/SN). To někak kołwrótne klinči: Do zahajenja wólbneho boja Alexa Theileho su so politiske elity w Budyskim wokrjesu prašeli, štó je tónle Kamjenski jurist? W swojim domizniskim měsće Kamjencu bě tomu hižo wot lěta 2019 hinak. Tu překwapi wón konkurenta Uda Wićaza z CDU minjenu njedźelu z dobyćom najwjace hłosow. Pječa je tón tutu stratu jara wobžarował.
Wjesela so na Serbski swjedźeń
Tradicije po dwulětnej přestawce koronapandemije dla zaso rozkćěja. Jedna tajka je w Delnjej Łužicy we wobłuku Choćebuskeho měšćanskeho swjedźenja zajutřišim, sobotu, Serbski swjedźeń.
Choćebuz (SN/at). „Wšitcy, wuměłcy, kulturne skupiny a wězo tež publikum su zbožowni, zo budźe lětsa zaso Serbski swjedźeń w Puškinowym parku.“ Swojim słowam zamołwita za serbske naležnosće města Choćebuza Anna Kosacojc-Kozelowa přida, zo běchu w přihotowanskej fazy mjez někotrymi sobuskutkowacymi najebać wulke wjeselo nad so wotměwacym swjedźenjom, tež wobmyslenja. Bojachu, zo pobrachowaceho zaměrneho zwučowanja za čas korony dla wšitko hišće tak kulojće njeběži kaž je to jich narok.
