Tydźeń mjeńšinowych rěčow

Lipsk. Institut za sorabistiku Uniwersity Lipsk kaž tež towarstwo ERIU stej dźensa „Tydźeń europskich mjeńšinowych rěčow“ zahajiłoj. Hač do pjatka maja zajimcy móžnosć, so z čitanjemi, seminarami a koncertami ze šotiskej gelišćinu, ze serbšćinomaj, z kymrišćinu a iršćinu zeznajomić. Mjez druhim wuhotujetaj je „narodny poet Walizow“ Ifor ap Gyn a japanski sorabist prof. Goro Kimura w sociokulturnym centrumje Villa Leipzig.

Wjele zajimcow přišło

Lubij. Na tradicionalnych wukubłanskich wikach Insidertreff zawčerawšim w Lubiju witachu organizatorojo tysacow zajimcow. Wjac hač 130 wustajerjow je tam atraktiwne wukubłanske poskitki w domiznje předstajiło a wo dorost wabiło, při čimž bě lětuše ćežišćo strowotniski wobłuk.

Sudetscy Němcy w syći

Kulow (AK/SN). Za porjedźenje komunalnych pućow a mostow nałožuje město Kulow přichodne měsacy 110 000 eurow. Tole zdźěli zastupowacy twarski nawoda města Frank Kral na zašłym posedźenju měšćanskeje rady.

„Planowane je, puć do Noweje Wsy wot wodočisćernje hač k mostej saněrować“, Kral rozłoži. Dale chcedźa saně­rować dźěl Wojerowskeje dróhi w Kulowje a puć wot Salowa do Koćiny. Nimo toho ponowja přijězd ke gratowni Kulowskeje wohnjoweje wobory. Tu jedna so wo 120 metrow dołhi wotrězk Srjedźneho puća. A skónčnje ma tež móst w Nowej Wsy nowu hornju asfaltowu worštu dóstać.

Derje pokročuja dźěła na wjesnej dróze w Mučowje wot kromy wsy ze směra Brěžkow hač k zwjazkowej dróze B 96. Po informacijach Franka Krala maja twarske dźěła hač do kónca julija wotzamknjene być. Přichodne předewzaće budźe kolesowanska šćežka wot Brěžkow do Mučowa. Prěni twarski wotrězk chcedźa spočatk julija twarić započeć.

Padušny porik lepili

Wojerecy. Žiwidła, kosmetiske twory, debjenki a elektriske nastroje w cyłkownej hódnoće 2 300 eurow chcyše padušny porik předwčerawšim we Wojerowskej kupnicy kradnyć. Personal pak to sčasom pytny a informowaše policiju. Muž w starobje 35 lět a 39lětna žona běštaj nimo toho z kolesomaj po puću, kotrejž buštej w Lipsku pokradnjenej.

Bukecy přeprošuja kónc tydźenja na Serbski ewangelski cyrkwinski dźeń a spočatk julija na wjesny jubilej.

Bukecy. Bukečenjo lětsa wulki jubilej swjeća. Před 800 lětami bu wjes hromadźe z druhimi wsami Hornjeje Łužicy prěni raz we wopismje Mišnjanskeho biskopstwa naspomnjena.

Wot tych 800 lět mam wulku wjetšinu za serbske stawizny. W składnostnje jubileja njedawno wušłej knize „800 Jahre Hochkirch / 800 lět Bukecy“ su so awtorojo a awtorka kaž Trudla Malinkowa, Arndt Zoba, Domaš Žur a wosadny farar Thomas Haenchen wo to postarali, zo maja tam serbske temy zašłosće a přitomnosće wuznamne městno. Dwaj nastawkaj stej w serbskej rěči.

Dramatiske běše wuwiće za Serbow wosebje w poslednich sto lětach. Wo bohatym towarstwowym žiwjenju hišće w 1920tych lětach móžemy dźensa jenož hišće sonić. Maćernorěčnych Serbow a Serbowkow je lěto a mjenje a tak je tež serbske wosadne žiwjenje w Bukecach nimale womjelknyło.