Wo Choćebuskich kopolakach čitała
Wětrow (ML/SN). Loni znowazarjadowana Wětrowska knihownja přeproša ludnosć prawidłownje měsačnje na čitanje. „Kopolaki w Choćebuzu“ bě tema čitanja minjeny štwórtk we Wětrowje. Awtorka spisa, Erika Pchalek, kotryž wuńdźe w nakładnistwje Regia delnjołužiskeje stolicy, zeznajomni zajimcow z pozadkami a žiwjenjoběhami předstajenych Židow a antifašistow z Choćebuza. Erika Pchalek je rodźena Budyšanka a jeje wuj bě wot nacijow zamordowany komunist Kurt Pchalek, po kotrymž je dźensa dróha w centrumje Budyšina pomjenowana. Wona bě žurnalistiku studowała a čas powołanskeho žiwjenja w redakciji dźenika Lausitzer Rundschau dźěłała. Jako wuměnkarka je swobodna awtorka za wusudami něhdźe 40 Židow a antifašistow Choćebuza slědźiła a wo nich pisała.
Jako prěni čita ze spisa „Kopolaki“ kapitl, kotryž jednaše wo Hammerschmidtec židowskej swójbje, předewšěm wo prawizniku Hermannje Hammerschmidće. Wón bu kaž jeho přiwuzni zamordowany. Wosudy dalšich Židow, na kotrychž maja kopolaki dopominać, sćěhowachu.
Wustaw budźe zetkanišćo
Serbska rěč a kultura změjetej w domje swoje krute městno
Kulow (AK/SN). „W tymle projekće tči wutroba“, powěda 63lětny Kulowčan Beno Róbl na dworje Kulowskeho wustawa Jakubetz, „a wulka porcija zmužitosće.“ Wot lońšeho nowembra přetwarja 31 čłonow a mnozy podpěraćeljo towarstwa „W zhromadnosći za Kulow“ wustaw na kulturne, kubłanske a zetkawanske srjedźišćo. Hišće lětsa chcedźa je wotewrić a so nowym nadawkam wěnować.
Stare dwórnišćo w Budestecach je wotnětka komunalny centrum a ...
Krótkopowěsće (18.05.22)
Logo za jubilej pytany
Chrósćicy. Na róčnicu swojeho 800lětneho wobstaća chcedźa w Chrósćicach kónc junija 2025 z wosebitym gmejnskim a wosadnym tydźenjom spominać. Za njón ma nastać wosebite logo. To je přihotowanski wuběrk jubilejneho swjedźenja na swojim wčerawšim štwórtym zetkanju w Chrósćicach wobzamknył. Namjety přijimuja hač kónca septembra w gmejnskim zarjedźe abo na tamnišej farje.
Planuja „žiwe konzerwy“
Praha. Na změnu wěstotneho połoženja w Europje nětko tež čěski Zarjad statnych materialnych rezerwow reaguje. Tak měli přichodnje žiwe kruwy wobstatk jeho składa žiwidłow město dotalneho zamróženeho mjasa być. Kruwy měli plahowarjo za zarjad zastarować. Dalša nowosć je nakup mloka za ćěšenkow. Žiwidłowe rezerwy dyrbja potrjeby stata za pjatnaće dnjow zawěsćić.
Na finale europa league
Radźićeljo wuradźuja
Róžant. Hnydom tři gmejnske rady so zajutřišim, štwórtk, k wuradźowanju zetkaja. Posedźenje parlamenta Ralbic-Róžanta započnje so we 18.30 hodź. w Róžeńčanskim gmejnskim zarjadnistwje. Mjez druhim póńdźe wo dalše ponowjenje trawerzow sportnišća w Ralbicach.
Chrósćicy. W 19 hodź. přizamknje so posedźenje Chróšćanskeje gmejnskeje rady w gmejnskim a kulturnym centrumje. W jednym z dypkow dnjoweho porjada zaběraja so z njeplanowanymi wudawkami za nakup trjebaneho multicara z připowěšakom.
Worklecy. Hospodarski plan lěta 2022 budźe jedna z temow posedźenja Worklečanskeje gmejnskeje rady. Wona schadźuje so tohorunja zajutřišim, ale hakle w 19.30 hodź., a to w jědźerni wyšeje šule.
Na koncert
Policija (17.05.22)
Njeznaći su značku pokradnyli
Budyšin. Na Dwórnišćowej w Budyšinje su dotal njeznaći wot policajskeho awta zadnju značku pokradnyli. Awto typa VW běše njedźelu w nocy před policajskim rewěrom parkowane. Hódnota pakosćeneje znački wučinja 30 eurow. Zastojnicy su DNA-slědy zwěsćili a chłostajomny skutk wozjewili. Kriminalna słužba rewěra budźe so dale z podawkom zaběrać.
Do nakładneho awta zrazyła
Wóspork. Na S 112 njedaloko Wósporka stej wčera dopołdnja wosobowe awto typa VW a nakładne awto hromadu prasnyłoj. 49lětna wodźerka Polo jědźeše w křiwicy z dotal njeznatych přičin runjewon a prasny do nakładneho awta typa Volvo. 55lětny šofer bu lochko zranjeny. Žonu dyrbjachu z ćežkimi zranjenjemi do chorownje dowjezć.
Wosa njezbožo zawiniła
Čorny Chołmc. Na S198 njedaloko Čorneho Chołmca je šofer awta marki Seat njedźelu nawječor do wobchadopřewodneho stołpa prasnył. Přičina za to bě wosa, kotruž bě wón spytał z jězdźidła wuhnać.
Wuhotowarjow wikow hišće pytaja
Njeswačidło (ML/SN). 16. dźeń Njeswačanskeho muzeja a rjemjeslniskich wikow wočakuje wopytowarjow njedźelu, 22. meje, wot 13 do 18 hodź. Něhdźe 30 rjemjeslnikow poskićeja swoje twórby a posłužby na nawsy, na dróze k parkej a na tamnišich bliskich dworach. Dalši wuhotowarjo wikow móžeja so hišće pola Dietera Petschela přizjewić, a to telefonisce pod 035933 30795.
Wětrowski klub oldtimerow předstaji tam swoje historiske jězdźidła, Budyski młodźinski orchester zapiska a Domizniski muzej je wotewrjeny. Přistupna je tež cyrkej a ludźo móža so tam na wěžu podać.
Z konjacymi zapřahami móža sej zajimcy do ratarskeho muzeja na Panachec statoku we Łomsku a potom zaso wróćo do Njeswačidła dojěć.
Wěnowanje Janej Skali
Pomjatnej tafli swědčitej wo angažemenće Njebjelčana za serbski lud
Njebjelčicy (SN/MiR). Pódla stele wobliča Jana Skale w Njebjelčicach stejitej nětko informaciskej tafli. Na nimaj, na jednej serbsce a němsce, na dalšej pólsce a jendźelsce, je zwěčnjeny žiwjenjoběh serbskeho patriota, poeta a politikarja Jana Skale. Tón bě so w lěće 1889 w Njebjelčicach narodźił a 1945 na tragiske wašnje w pólskich Dziedzicach (Erbenfeld) žiwjenje zhubił.
Prěni zaryw za wodarnju
Ćišćansku wodarnju jako zawod Wojerowskeje zastaranskeje tzwr (VBH) planuja hač do kónca lěta rozšěrić. W tym času zastara Čorna Pumpa město Wojerecy hišće z pitnej wodu.
Ćisk (AK/SN). Wukonowa kapacita wodarnje w Ćisku ma wot tuchwilu 8 600 kubiknych metrow wody wob dźeń na 11 500 kubiknych metrow stupać. Z tym móže wona přichodnje hač do 40 000 wužiwarjow pitneje wody po měsće a wokolinje kaž tež woteběraćelow z přemysła a industrije w přichodnych lětdźesatkach stabilnje zastarać. „Naprawa je zahajenje našich projektow w strukturnej změnje. Kročimy z tym na čole a zahajimy změnu“, potwjerdźa wyši měšćanosta Torsten Ruban-Zeh (SPD) zašły pjatk na symboliskim prěnim zarywje. „Naprawa je wažne zakładne wuměnjenje za zasydlenje předewzaćow.“ Za fazu přetwara hač do kónca lěta Ćišćanska wodarnja njedźěła.
Krótkopowěsće (17.05.22)
„Čitanja za měr“ wušli
Ludwigsburg. Awtorojo ze Sakskeje, Braniborskeje a Ukrainy su 16. měrca na „čitanju za měr“ w Drježdźanskim Ericha Kästnerowym Domje za literaturu swój hłós přećiwo Putinowej wójnje w Ukrainy zběhnyli. Nětko su přinoški w ukrainskej, němskej a serbskej rěči pod titulom „Wir ahnten nicht die nahende Gefahr“ w literarnym časopisu BAWÜLON (2/2022) Ludwigsburgskeho nakładnistwa Pop wušli. Předsłowo spisał je Benedikt Dyrlich.
Inscenaciju tjg wuznamjenili
Zwickau. Na zakónčenju lětušeho zetkanja sakskich dźiwadłow minjenu njedźelu w Zwickauje su inscenaciju „Tiere essen“ Drježdźanskeho Dźiwadła „Młoda generacija“ (tjg) ze Sakskim mytom dźiwadła 2022 wuznamjenili. We wopodstatnjenju jury rěka, zo produkcija přez tradicionelne dźiwadłowe formy, kaž staj to sćinohra a grjekski chór, swójsku, hnujacu estetiku wuprudźa.
Alstom pyta za rozrisanjom
