Wot jutřišeho štwórtka hač do 9. januara wotměje so zaso ...
Krótkopowěsće (05.01.22)
Incidenca pomału přiběra
Budyšin. Po kóncu lěta z mjenje testami incidenca po Roberta Kochowym instituće nětko tež w Hornjej Łužicy zaso přiběra. Za Budyski wokrjes mjenuje RKI hódnotu 269,1, za Zhorjelski 222,7. Wo 269 natyknjenjach z koronawirusom a dalšich wosom smjertnych padach rozprawjachu wčera we wokrjesu Budyšin. Wokrjes Zhorjelc informowaše wo 225 infekcijach a 15 wosobach, kotrež běchu w decembrje w zwisku z koronu zemrěli.
Wosebite posedźenje sejma
Drježdźany. Sakski krajny sejm je so dźensa ze zhromadźenjemi za čas koronapandemije zaběrał. Wosebite posedźenje bu próstwy frakcije AfD dla zwołane a měri so na aktualne postajenje nuzoweho stawa w swobodnym staće. Demonstracije su wulkeho stracha natyknjenja dla na dźesać ludźi na krutym městnje wobmjezowane. Wuwzaća přizwolić je móžno. Kritikarjo korona-naprawow pak zawjazki prawidłownje ignoruja.
Słownik zaso na předań
Přirada za prašenja zbrašenych z pozitiwnej bilancu
Wojerecy (SiR/SN). Předsydka přirady za zbrašenych města Wojerec Evelin Graf bilancuje lońše dźěło přirady jako pozitiwne. Čestnohamtsce skutkowacy čłonojo přirady poradźuja měšćansku radu, zo móhli naležnosće wobydlerjow z handicapom zwoprawdźić. „Po mojim měnjenju je so nam poradźiło, naležnosće wobydlerjow po direktnym puću zwjetša k pozitiwnemu wuslědkej wjesć. To płaći za próstwy wo wupokaz za ćežkozbrašenych runje tak kaž za sposrědkowanje kontaktow k najwšelakorišim institucijam“, Evelin Graf rozłožuje. Tež při domjacych wopytach móžachu wobydlerjam na přikład při zarjadniskich prašenjach pomhać.
Njeluboznaj hosćej w ptačej chěžce
Dalše twarnišćo připowědźene
Wulke Ždźary. Nalěto započnu we Wulkich Ždźarach wopłóčkowy kanal kłasć, kaž Łazowski wjesnjanosta Thomas Leberecht (CDU) připowědźi. Za twarske dźěła zwjazkowu dróhu B 96 po wotrězkach dospołnje zawru. Bus mjez Budyšinom a Wojerecami pojědźe potom po Stróžanskim puću. Tamny wobchad powjedu po hinašej wobjězdce.
Kuchnja skónčnje hotowa
Hórnikecy. Wobydlerski centrum w Hórnikecach je nětko skónčnje z nowej kuchnju wuhotowany. Hižo wot lěta 2019 su so we wobłuku wobydlerskeho etata města Wojerec wo kuchnju prócowali. Dokelž pak budget jednoho lěta njedosahaše, su tež pjenjezy z 2020 a 2021 zapřijeli. Tak móžachu tohorunja wšelake twarske ćeže přewinyć. Mjeztym je wšitko zatwarjene a kuchnja funguje, kaž město Wojerecy zdźěli. Ze zbywacymi pjenjezami chcedźa hišće grat a sudobja kupić.
Policija (04.01.22)
Kružny wobchad přewidźał
Słona Boršć. Nowy kružny wobchad pola Słoneje Boršće je předwčerawšim wječor šofer VW Phaetona po wšěm zdaću přewidźał a z wotmachom na připrawjenu hórku zajěł. Wodźerja a sobu jěducu dyrbjachu wobornicy z jězdźidła wućahnyć. Jeju dowjezechu do chorownje.
Z wobydlerskim busom jězdźić
Kóždu wutoru darmotny poskitk jako wědomostnje přewodźany test
Hamor (CK/SN). Wosrjedź Delnjeho Wujězda steješe wonu wutoru jednotliwa žona při busowym zastanišću. Sobu jěć wona nochcyše, ale jenož wědźeć, kak to z nowym busowym zwiskom funguje. Wot njedawna móžeš stajnje wutoru darmotnje do Hamora jako hłowneje wsy gmejny jězdźić: nakupować, k lěkarjej, do apoteki abo lutowarnje. Bórze na to mały bus zastanje. Zastupił do njeho tón dźeń tež při tamnych zastanišćach hišće nichtó njebě. Zastupowacy Hamorski wjesnjanosta Hendryk Balko (Wolerske zjednoćenstwo Hamor) so njedźiwa. Wšako dyrbja ludźo wo tym hakle zhonić.
Hamorski wobydlerski bus je pilotowy projekt Swobodneho stata Sakskeje. Zaměr je 18 wsow gmejny lěpje zwjazać. Stajnje wutoru stej dwě jězdźidle Kolchmeierec pućowanskeho předewzaća po puću. Kóžde móže wosom ludźi sobu wzać. Jězba je darmotna. Jenož koronowe postajenja maja sobujěducy dodźeržeć. Małej busaj zastawatej tež na dwórnišćomaj w Delnim Wujězdźe a Klětnom, tak zo je tohorunja zwisk k železniskej čarje Zhorjelc– Wojerecy zjednorjeny.
Wjeselo a starosće z wopłóčkami
Zaměrowy zwjazk za wopłóčki Mała Sprjewja je loni něštožkuli zeskutkownił. Za přichod pak su wuhlady skerje ćěmne, za čož drje je Swobodny stat Sakska zamołwity.
Wulka Dubrawa (UM/SN). Zaměrowy zwjazk za wopłóčki Mała Sprjewja ze sydłom we Wulkej Dubrawje zhladuje z wjeselom na minjene a ze starosćemi na nowe lěto. Tak su 2021 při zwoprawdźenju koncepta wotwodźowanja wopłóčkow „cyły krok doprědka přišli“, kaž jednaćel Andreas Skomudek rozprawja. To pokaza so předewšěm w Budyšinku, ale tež w Boranecach a Nowych Boranecach. Twarske naprawy w tychle třoch wsach su nimale hotowe. Nimo toho móžachu wjacore wjetše reparatury na wopłóčkowych kanalach zwoprawdźić.
