24. łužiske rybowe tydźenje zawčerawšim we Wichowach zahajili
Wichowy (AK/SN). Hatarjo w Hornjej Łužicy z wobhospodarjenjom wodźiznow k tomu přinošuja, zo so něhdźe 800 lět zrosćena kulturna krajina zachowuje a hlada. Zo bychu so wot bobra zawinowane škody wobmjezowali su woni na podpěru swobodneho stata pokazani. Tohorunja trjebaja hladajo na zwičnjenje łužiskeho karpa w regionje a hosćencach podpěru. Tole je prezident Sakskeho krajneho rybarskeho zwjazka Bernd Lange zawčerawšim na zahajenju 24. łužiskich rybowych tydźenjow na Wichowskim dworje (we wjesnym dźělu Wósporka) wuzběhnył. Cyłkownje 13 zawodow so na rybowych tydźenjach wobdźěla. Su to hatarstwa, hosćency a biosferowy rezerwat Hornjołužiska hola a haty. Hač do 31. oktobra ze zarjadowanjemi kaž rybarskimi swjedźenjemi, wodźenjemi po přirodźe abo warjenskimi kursami do regiona přeprošuja.
Premjera interaktiwneje inscenacije „Mjaseckoma“, kotruž wuhotowarjej Delnjoserbske kulturne towarstwo Studnja a wuměłstwowy kolektiw Santa Christina jako „imersiwne pućowanje k měsačkej“ wopisujetej, je minjeny pjatk wopytowarjow kołowokoło bywšeje jamy Klěśišća-Sewjer putała. Jako pasažěrojo z wosebitej awdijotechniku wuhotowaneho woza podachu so na „performatwinu ekskursiju do paralelneho swěta“. Tuta wotbłyšćowaše stawizny a rysowaše móžny přichod areala, kiž je předewšěm za atrakciju „ležaca Eiffelowa wěža Łužicy“ znaty. Pjeć dalšich předstajenjow je planowanych, a to na prěnimaj kóncomaj tydźenja oktobra. Foto: NC/Konstanze Kušyc
Prěnje koparske mustwo Sokoła Ralbicy/Hórki je wčera popołdnju we wokrjesnej wyšej lize načolnu hru přećiwo mustwu Póst Germania Budyšin 2:1 (1:0) dobyło. Před 188 přihladowarjemi běštaj za Ralbičanow Niklas Šnajder (42., při bulu, Ralbicy) a Denny Gloxyn (69.) trjechiłoj. Za Budyšanow bě Nils Stöltzner wurunał. W tabulce polěpšichu so koparjo z Delan na druhe městno. Sobotu hraja Sokoljo wot 15 hodź. w Kulowje přećiwo Módro-běłym Kulow. Cyłk trenarja Stephana Pruchi bě sobotu w Ottendorfje 1:3 (1:1) přěhrał. Foto: Konstantin Hrjehor
Z emocionalnym zarjadowanjom su so wčera w USA z morjenym aktiwistom republikanow Charliejom Kirkom rozžohnowali. W stadionje města Glendale a w staće Arizona zhromadźichu so wjacore tysac přiwisnikow Kirka. Prezident USA Donald Trump mjenowaše zatřěleneho aktiwista „martrarja ameriskeje swobody“. Charlie Kirk bu 10. septembra zatřěleny. Foto: dpa/John Locher
Młodźinski orchester Oberlichtenauskeho hrajneho ćaha bě wčera z hosćom na Kupje komunikacije we Worklecach. Koncert bě přewšo wuspěšny. Při kofeju, tykancu a dalšich kulinariskich poskitkach sej wjele wopytowarjow ze wsy kaž tež z blišeje a dalšeje wokoliny wotměnjawu měšeńcu moderneje hudźby a tradicionalnych kruchow chwaleše. Zarjadowanje je towarstwo Wjesna zhromadnosć Worklecy organizowało. Foto: Maria Čušcyna
Grodk (JoS/SN). Zawod Mjedźel Łužica (KSL) bě zašłu sobotu druhi raz wo to wabił, w kónčinje wokoło Grodka nowe wudobywanišćo kopora wutworić. Za to pak dyrbja najprjedy wuslědźić, hač kónčina tole docyła znjese. Prěnju tajku próstwu wo zwěsćenje znjesliwosće bě braniborske ministerstwo za infrastrukturu a planowanje kraja – zhromadny wotrjad planowanja krajow Berlin-Braniborska (GL) w lěće 2023 wotpokazało. Prjedy hač dalši pospyt zahaja, su zajimowanych wobydlerjow nětko znowa wo procedurje informowali. Něhdźe 150 wobydlerjow bě na informaciske zarjadowanje přichwatało. Zawod KSL bě swoju strategiju za prezentaciju přiměrił, wšako běchu so ludźo po poslednim zarjadowanju nowemu wudobywanišću spjećowali. Sobotu tuž jenož fachowcy ze wšelkich wobłukow referowachu. Tole přisporješe wěcownu debatu. Hižo na spočatku rjekny Doris Grahn, sobudźěłaćerka inženjerskeho běrowa GICON, kotryž za KSL dźěła, zo chcedźa wokoło Grodka jenož telko kopora wudobywać, kaž to přiroda znjese. Wona rozprawj ...
Trjebin (SN). Na wulki wjeršk sobotu w Trjebinje bě tež předsyda Domowiny Dawid Statnik přichwatał. Tamniša Domowinska skupina swjećeše z mnohimi hosćimi zbliska a zdaloka 80 lět wobstaća a swěrneje dźěławosće na dobro Serbstwa a jeho prezency we wšědnym žiwjenju cyłeho regiona. Zbožopřeća gmejny Trjebin je na swjedźenskim zarjadowanju wjesnjanosta Robert Sprejz sposrědkował. Tež županka župy Jakub Lorenc-Zalěski Diana Maticowa a społnomócnjena Zhorjelskeho wokrjesa za serbske naležnosće Kati Strukowa skutkownosć aktiwneje bazy třěšneho zwjazka z gratulaciju hódnoćeštej. Mnozy zastupjerjo župje přisłušacych towarstwow a dalši hosćo so tomu přizamknychu.
