Azylowe pady so dale kopja
Drježdźany (dpa/SN). Ličba skóržbow w azylowych naležnosćach na sakskich zarjadniskich sudnistwach w Drježdźanach, Kamjenicy a Lipsku spochi rozrosće. „Tendenca je raznje přiběraca“, rěčnik Budyskeho wyšeho zarjadniskeho sudnistwa na naprašowanje medijow zdźěli. Kónc septembra mějachu tam 5 844 nowych próstwow, 400 wjace hač lěto do toho. Hač do kónc lěta drje ličba skóržbow na 6 000 rozrosće.
Rozsudam zwjazkoweho zarjada za migraciju a ćěkancy spjećuja so w najwjace padach ludźo z Venezuele, dokelž jich pady w Sakskej koncentruja, ale tež ze Syriskeje, z Turkowskeje, Afghanistana a Irana. Po informacijach sudnistwa personalne wobsadźenje zarjadniskich sudnistwow nawalej dźěła dawno hižo njewotpowěduje. Situacija wuskutkuje so tež negatiwnje na druhe wobłuki. Mjeztym traje wobdźěłanje spřećiwjenjow přerěznje 18,5 měsacow, štož je wjace hač w zwjazkowym přerězku.
Wobćežne je połoženje tež w Lipsku, hdźež koncentruja wot meje pady turkowskich požadarjow azyla. Tuchwilu kopi so tam 1 200 skóržbow.
To a tamne (05.11.24)
„Zesmudźene zadki“ chcedźa so wobydlerjo małeje francoskeje wsy na wuchodźe kraja wotnětka mjenować. Swojorazny wuraz je so při dwaj tydźenjej trajacym wothłosowanju mjez wobydlerjemi wsy Olley na kóncu přesadźił. Po informacijach wjesnjanosty je so 89 z cyłkownje 200 wobydlerjow wobdźěliło. 42 hłosow měješe na kóncu „cul brûlé“.
Kanonu na připowěšaku awta namakali su policisća njedaloko němsko-belgiskeje mjezy. Dokelž njemóžachu zastojnicy zwěsćić, hač njeje bróń tola hišće wužiwajomna, kanonu najprjedy raz sćazachu. 60lětny šofer rjekny, zo je zahority zběrar starych brónjow a zo je kanonu za 9 000 eurow w Belgiskej kupił. Fachowcy dyrbja nětko zwěsćić, hač je kanona wotpowědujo předpisam znješkódnjena. Porjadnje přiwjazana wona na připowěšaku bě, zastojnicy wobkrućeja.
Žadanja serbskeho ludu na koaliciske jednanja Sakskeje 2. dźěl
4. Digitalizacija a spěchowanje serbskeje rěče
Pozadk: Digitalizacija skići wulku šansu, serbsku rěč tež w přichodźe zaručić. (...) Wosebje w načasnej informaciskej a komunikaciskej technologiji je serbšćina cuze zapřijeće. Prosymy statne knježerstwo wo to, nas w tym zmysle aktiwnje – tež financielnje – podpěrać.
Žadanja: – wužiwanje serbskeje rěče na globalnych platformach: Přikładej Microsoft Corporation sćěhujo dyrbi so serbska rěč tež na platformach kaž na př. Google a Apple integrować, zo by so efektiwnje jako komunikaciska, informaciska a datowa rěč wužiwała.
– spěchowanje modernych rěčnych technologijow: Wuwiće systemow za awtomatiske přełožowanje a spóznawanje serbšćiny dyrbi so spěchować. (...)
5. Mjeńšinowa politika na krajnej a zwjazkowej runinje
Pozadk: Serbski lud je jedna ze štyrjoch awtochtonych narodnych mjeńšin w Němskej. Trjebamy sylniše prawniske zaručenje na krajnej a zwjazkowej runinje, za škit a spěchowanje awtochtonych narodnych mjeńšin w Němskej .
Zahaja koaliciske jednanja
Podstupim/Erfurt (dpa/SN). Po dołhim sonděrowanju su dźensa w Braniborskej a Durinskej koaliciske jednanja k wutworjenju noweju krajneju knježerstwow zahajili. W Podstupimje chcetej SPD ministerskeho prezidenta Dietmara Woidkeho a Zwjazk Sahry Wagenknecht knježerstwowy zwjazk wutworić. W Erfurće jednaja CDU, SPD a BSW w samsnej naležnosći. Knježerstwowe wobdźělenje BSW by nowostka w Němskej była.
Trump tuka na wobšudnistwo
Washington (dpa/SN). Republikanski kandidat za prezidenta Donald Trump je minjeny kónc tydźenja něšto dnjow do wólbow w USA hižo raz na to tukał, zo móhła móžna wólbna poražka wuslědk manipulowanja a wólbneho wobšudnistwa być. Na zarjadowanju w staće Pennsylvania mjenowaše wón demokratow „demonisku stronu“, kotraž při wólbach wobšudźi. Dobyćer wólbow je po jeho słowach hišće we wólbnej nocy znaty.
Ze swětnišća so nawróćili
Wšo druhe hač přećelne bě witanje, jako španiski kral Felipe ...
Erdoğan złóstnik w Syriskej?
Israel zakaz UNRWA přesadźi
Ministerka přilubja Ukrainje pomoc
Kijew (dpa/SN). Wonkowna ministerka Annalena Baerbock je Ukrainje hladajo na bližacu so třeću wójnsku zymu a trajacych nadpadow Ruskeje dla dalšu podpěru přilubiła. „Němska steji zhromadnje ze swojimi partnerami njepowalnje poboku Ukrainy“, rjekny politikarka Zelenych k zahajenju swojeho solidaritneho wopyta. Ministerka bě dźensa rano z ćahom do ukrainskeje stolicy Kijewa dojěła. Wopyt njeběchu wěstotnych přičina dla do toho připowědźili.
Nimale tysac dnjow po zahajenju ruskeje nadpadniskeje wójny chwaleše ministerka chrobłosć a zmužitosć Ukrainjanow najebać masiwne ruske nadpady na ciwilnu energijowu infrastrukturu.
Zymska škitna tarč, kotruž bě Němska hakle njedawno wo 170 milionow eurow za nuzowe zastaranje z milinu rozšěriła, je wotmołwa na zničene milinarnje a milinowody, Baerbock rjekny. Nimo toho chcedźa powětrowy škit zesylnić, zo bychu so ruskim lětadłam a trutam wobarać móhli. Hakle minjenu nóc bě Ruska sta trutow do Ukrainy pósłała.
Klingbeil: Rozsudny tydźeń
Amplowa koalicija před wažnymi wuradźowanjemi wo dalšim dźěle
Berlin (dpa/SN). W sprostnjenej zwadźe amploweje koalicije chcedźa tutón tydźeń wjele wuradźować. Terminowy zapisnik je pjelnjeny a lisćina temow, kotrež chce koalicija SPD, Zelenych a FDP wobjednawać, je dołha. Mjez druhim póńdźe wo přichod amploweho zwjazka, wo wusměrjenje hospodarskeje politiki a wo wuslědk wólbow w USA. Hižo wčera wječor běštaj so financny minister Christian Lindner (FDP) a zwjazkowy kancler Olaf Scholz (SPD) w kanclerskim zarjedźe zetkałoj. Wo wuslědkach zetkanja njebě spočatnje ničo znate.
Zajutřišim, srjedu, dźeń po prezidentskich wólbach USA, zeńdźe so koaliciski wuběrk, kotremuž přisłušeja tež předsydźa stron a frakcijow. Rěčeć chcedźa wosebje wo pobrachowacych miliardach w zwjazkowym etaće a wo planach, hospodarsku krizu Němskeje přewinyć. Scholz, hospodarski minister Robert Habeck (Zeleni) a Lindner chcedźa so do posedźenja koaliciskeho wuběrka wospjet sami zetkać, zo bychu za wupućemi z krizy knježerstwa pytali.
