Berlin (dpa/SN). Nawodnistwo SPD chce debatu móžneje kanclerskeje kandidatury Olafa Scholza dla spěšnje zakónčić. Stronski šef Lars Klingbeil je připowědźił, zo chcyli přichodne dny plan za wólbny bój k wólbam zwjazkoweho sejma schwalić. „Dźe wo jasnosć w tutej naležnosći a wo puć, kotryž chcemy hač k zwjazkowemu zjězdej kročić“, rjekny wón w sćelaku ARD. „Póńdźemy z Olafom Scholzom do tutoho wólbneho boja.“

Debata wo kanclerskej kandidaturje Scholza je so minjeny čas dale přiwótřiła. Po wjacorych komunalnych politikarjach staj so prěni króć tež zapósłancaj zwjazkoweho sejma zjawnje za to wuprajiłoj, radšo zakitowanskeho ministra Borisa Pistoriusa za zastojnstwo nominować.

Klingbeil w tym zwisku přizna, zo w stronje Scholza dla mórkotaja. W tym zwisku planuja 30. nowembra „konferencu wólbneho dobyća“, na kotrejž změje kanclerski kandidat SPD swój prěni wulki wustup. Minjene dny je so tež Boris ­Pistorius jasnje za Olafa Scholza jako kanclerskeho kandidata wuprajił.

Prezident USA Joe Biden chce Ukrainje daloko sahace rakety přewostajić

Rio de Janeiro (dpa/SN). Do zahajenja wjerškoweho zetkanja G20 w Brazilskej je zwjazkowy kancler Olaf Scholz zwólniwosć Němskeje potwjerdźił, Ukrainu dołhož trěbne w zakitowanskim boju přećiwo Ruskej podpěrować. „Putinej dyrbi jasne być, zo njemóže so na to spušćić, zo Ukraina poněčim wosłabnje“, rjekny politikar SPD brazilskim nowinarjam. Runočasnje Scholz němske brónjowe eksporty do Israela zakitowaše, štož druhe kraje raznje kritizuja. Israel ma prawo, so zakitować, wón rjekny. „Při tym móža so naši partnerojo w Israelu na solidaritu Němskeje spušćić. K tomu słušeja tež brónje, kotrež kmanosć zakitowanja Israela zaručeja.“

Scholz je wčera wječor do Rio de Janeira na dwaj dnjej trajacy wjeršk wodźacych industrijnych krajow swěta dolećał. Brazilski prezident Luiz Inácio Lula da Silva nochce, zo stanje so wójna w Ukrainje z temu wuradźowanjow, a njeje tuž ukrainskeho prezidenta Wolodymyra Zelenskeho cyle wědomje přeprosył.

Wćipnosć je ludźi w Radworju sobotu wječor na žurlu hosćenca „Meje“ na nazymski koncert ze spěwnej skupinu Jarobinka přiwabiła, wšako bě to prěni wustup žónskeho chóra we wsy. Na kóncu přesahowaše překwapjenje hladajo na to, štož so jim poskići. Wosom žonow pod nawodom Walburgi Wałdźic zanjese spěwy ze srjedźneje a Delnjeje Łužicy. Štož hnydom napadny, bě wěstota spěwarkow: za projektowy chór, kotryž wobsteji runje štyri lěta a kiž jónu wob lěto zwučuje, bě to wuběrny wukon. Přał bych sej wjace informa­cijow wo tutym zajimawym ćělesu. Wosom spěwarkow a wuběrnje přewodźacu huslerku skrótka předstajić, časowy ramik koncerta tež přežadał njeby.

Na kóncu zwosta debata wo hudźbnym wusměrjenju chóra, kiž wěnuje so bolosćam pod sćěhami brunicy ćerpjaceho dźěla Łužicy a kiž njewuprudźa žiwjensku radosć kaž druhe serbske skupiny. Jarobinka wostanje zajimawy dypk serbskeho hudźbneho žiwjenja. Marko Wjeńka

Mnichow (dpa/SN). Bayerski wobchadny minister Christian Bernreiter (CSU) sej žada, zo zwjazkowe knježerstwo kóšty za cyłoněmsku jězdźenku dołhodobnje stoprocentowsce přewozmje. „Z wida Bayerskeje dyrbi Zwjazk kóšty dospołnje přewzać, wšako bě němski tiket, kaž mjeno hižo praji, přeće Zwjazka“, Bernreiter rjekny. Wón spjećuje so z tym předsydźe CDU a kanclerskemu kandidatej CDU/CSU Friedrichej Merzej. Tón bě rjekł, zo je regionalny wobchad w Němskej w prěnim rjedźe nadawk zwjazkowych krajow. Zwjazk je drje zamołwity, jězdźenku ­sobu financować. Njeje pak winowaty, ­wšitko sam zapłaćić, tak Merz.

Za 2025 je financowanje tiketa zaručene, po tym zo bě so frakcija CDU/CSU zwólniwa wuprajiła, při rozrisanju sobu dźěłać. W druhej połojcy decembra chcedźa wo tym w zwjazkowym sejmje wothłosować. „Chcemy, zo tajke něšto kaž cyłoněmsku jězdźenku zachowamy“, rjekny Merz po wurjadnym posedźenju frakcije CDU/CSU w Berlinje. Jednanja wo financowanju pak budu „chětro wob­ćežne“. Tuchwilu płaći stat połojcu, štož wučinja 1,5 miliardow eurow wob lěto.