Swoju winu jako wobchadny rowdy je 82lětna minjeny pjatk policiji w Lomma­tz­schu w Mišnjanskim wokrjesu wu­znała. Policija bě zjawnje za šoferom awta pytała, kotrež bě na dróze najebać napřećiwny wobchad traktor přesćahnyło a sej při tym wonkowny špihel wottorhnyło. Traktorist a wodźer napřećo jěduceho awta móžeštaj ze sylnym spinanjom zražce runje hišće zadźěwać. Rentnarka ma nětko z jednanjom strašneho jězdźenja dla ličić.

Atrapu policajskeho awta móžeš sej w Berlinje požčić, chceš-li paduchow wottrašić. Wobsedźerjo domow móža atrapu, kotraž wupada kaž prawe policajske awto, w dowolu před zachod stajić, kaž přenajenska firma Bieseke informuje. Awta njesmědźa pak na zjawnych parkowanišćach stać a po dróze jězdźić.

Budyšin (SN/CoR). Wjace hač 25 ludźi zetka so minjeny pjatk w Budyskim Serbskim domje, zo bychu sej nazhonjenja wuměnjeli k prašenju, kak z prawicarskim populizmom wobchadźeć. Bě to třeća regionalna konferenca lěta, na kotruž bě syć Tolerantna Sakska (TolSax) po Zwickawje a Döbelnje přeprosyła. Něhdźe sto organizacijow syć TolSax zjednoća.

Wien (dpa/K/SN). Tydźeń do wólbow prezidenta w Awstriskej staj so kandidataj na zastojnstwo, prawicar Norber Hofer (FPÖ) a Alexander Van der Bellen (Ze­leni) hišće raz w telewiziji rozestajałoj. Hofer je němsku kanclerku Angelu Merkel­ za jeje politiku napřećo ćěkancam raznje kritizował. Z njej je Merkel Europje nahladnu škodu načiniła. Wumjetowanje riwala, zo rěči wón za wustup Awstriskeje z EU, Hofer­ wotpokaza. Wón pak je za wuše poćahi tež z Ruskej.

Gauck pola wojakow

Szczecin (dpa/SN). Zwjazkowy prezident Joachim Gauck je dźensa hłowne sydło mjezynarodneho wojerskeho korpsa w pólskim Szczecinje wopytał. Tam chcy­še so zhromadnje z pólskim statnym prezidentom Andrzejom Dudu wo dźěle a hotowosći multinarodneje jednotki wob­honić. Korps běchu krizy na Ukrainje dla loni wot 200 na 400 přisłušnikow ze­sylnili. Němska sćele sto wojakow.

ARD a ZDF bjez olympije