Ke komplikacijam přišło je dźensa dopołdnja w porynsko-pfalcskim Boppardźe, jako chcychu hodowny štom za zwjazkowu kanclerku Angelu Merkel (CDU) wottransportować. Po tym zo běchu jědlu podrězali, njemóžachu ju z kranom na nakładne awto połožić, dokelž hrožeše strach, zo so štom rozłama. Tuž dyrbjachu dalši kran skazać, zo móhli dwě tonje ćěžki štom wotwjezć. Přepodać chcedźa jón přichodnu srjedu.

Wjace hač 44 000 eurow zawdawka spakosćił je wikowar napojow w Kölnje. Sudnistwo je jeho k dźesać měsacam jastwa na pruwowanski čas zasudźiło, rěčnik sudnistwa wobkrući. Wikowar bě awtomat za prózdne plastowe bleše tak manipulował, zo nastroj blešu drje ličeše, ju pak njeroztřěska. Tuž móžeše muž blešu stajnje zaso do awtomata tyknyć, cyłkownje 180 000 króć.

Hans Heinrich Hansen z čestnej profesuru wuznamjenjeny

Kiel (SN). Ministerski prezident Schleswigsko-Holsteinskeje, Torsten Albig (SPD), je Hansej Heinrichej Hansenej z danskeho Egernsunda wčera čestnu profesuru kraja spožčił. Knježerstwowy šef hódnoći po tutym puću wjelelětne wusahowace zasadźowanje Hansena na dobro mjeńšin. Tole wuchadźa z nowinskeje zdźě­lenki kenclije ministerskeho prezidenta. „Počesćimy Was dźensa za Waš žiwjenski skutk. Sće na wurjadne wašnje k tomu přinošował, zo je z měrniweho susodstwa w pomjeznej kónčinje dźensa modelowy region moderneje mjeńšinoweje politiki nastał“, Albig rjekny. Hansen je po jeho słowach „zmužity wojowar za prawa narodnych mjeńšin“. Jeho skutkowanje je dźensa po wšej Europje widźomne, hdźež dyrbja sej wjetšiny a mjeńšiny měrniwu wzajomnosć zdźěłać.

New York (B/SN). Zjednoćene narody (UN) chcedźa zahajić jednanja k wotpokazanju a wotstronjenju atomowych bróni. USA, Ruska, Francoska a Wulkobritaniska kaž tež Israel, kiž ma pječa tohorunja atomowe brónje, hłosowachu přećiwo tajkim jednanjam. 123 sobustawskich statow hłosowaše za to. Konferenca ma so w měrcu w New Yorku, we hłownym sydle UN, započeć.

Snano bamž tola přijědźe?

Rom (B/SN). Bamž Franciskus njeje swoje pućowanje do Němskeje k swjatočnosćam „500lětny jubilej reformacije“ w lěće 2017 hišće cyle wotprajił. Nimale wěste w jeho pućowanskim planje dotal jenož je, zo wopyta wón Indisku a Bangladesh, rjekny wón na wróćolěće žurnalistam z dwudnjowskeho přebywanja w Šwedskej. Tež předsyda Němskeje biskopskeje konferency, kardinal Reinhard Marx, běše před pućowanjom bamža na zahajenje swjatočnosćow k reformaciji w Šwedskej rěčał wo móžnym wopyće bamža w Němskej k zakónčenju jubilejneho lěta.

Biskop zawjazuje měšnikow

Kulow/Spale (SN/BŠe). Wjetši dźěl pjenjez za ponowjenje bywšeje kapałki w Spalach je zaručeny. Dźensa je sakski ministerski prezident Stanisław Tilich (CDU) zamołwitym spěchowansku zdźělenku we wysokosći 269 000 eurow přepodał. „To je wuraz, zo na wjesne dźěle njezabywaja“, zwurazni Kulowski měšćanosta Markus Posch (CDU). Přichodnje chcedźa Spalsku kapałku jako žarowansku halu a sociokulturne zetkawanišćo wužiwać. Tež ewangelske Bože słužby chcedźa tam wotměwać. Tak zwjazuja wjacore funkcije w jednym domje. Tuchwilu pak je dom hišće w špatnym twarskim stawje. Cyłkownje 400 000 eurow je za ponowjenje pod škitom pomnikow stejaceje kapałki trěbnych.

Dalšu spěchowansku zdźělenku stej zapósłanča zwjazkoweho sejma Marja Michałkowa (CDU) a Stanisław Tilich Kulowskemu městu přepodałoj, zo móhli tamnišu wjacezaměrowu halu pod energetiskimi saněrowanskimi zaměrami ponowić. Tak dóstanu z programa „Mosty do přichoda“ 121 313 eurow.