Vincze: Sebjewědomje wobchować
Celovec (SN). Krajny hejtman Korutanskeje dr. Peter Kaiser je tele dny prezidenta Federalistiskeje unije europskich narodnych mjeńšin (FUEN) Loránta Vinczu přeprosył, zo by na 27. kongresu etniskich mjeńšin wo zwiskach mjez etniskimi, narodnymi a europskimi identitami přednošował. Zarjadowanje bě korutanske knježerstwo w Celovecu (Klagen- furt), stolicy regiona, organizowało. Wobdźělnicy diskutowachu tam wo tym, kak so globalizowanje a masowa imigracija w Europje na awtochtone mjeńšiny wuskutkujetej. Při tym stejachu Korutanscy Słowjency w srjedźišću.
To a tamne (23.11.16)
Młody Israelčan je cyle wosebity kwasny dar dóstał. Dźeń do wulkeho dnja wón zhoni, zo bě w loće přeličene 3,6 milionow eurow dobył. Hodźiny do wěrowanja sej šek wotewza. Kupił bě sej lotowy lisćik ze zbytnych pjenjez po nakupowanju dźeń do kwasa na wikach. Poprawom chcyštaj młodaj zmandźelenaj po kwasu doma wostać, nětko pak pojědźetaj do Ameriki a po nawróće chcetaj do wulkeho bydlenja zaćahnyć.
Bywši abt benediktinskeho klóštra w Neresheimje pola Stuttgarta je tajnje štyri miliony eurow na darowanskim konće składował. Podłožki běchu po jeho smjerći 2013 w pisanskim blidźe našli. Zwotkel pjenjezy su, njeje jasne. Kaž benediktinojo zdźěleja, njejsu dotal ani jenički cent z toho wudali. Najprjedy ma so cyła wěcka rozrisać.
Hižo raz do přichoda hladali
Młodźi Serbja sej minjenu njedźelu při snobjedźe wizije wuměnjeli
Budyšin (MDź/SN). Wobdźělnicy lětušeho snobjeda wužiwachu nimo zhromadneje snědanje móžnosć, raz do přichoda hladać. W Budyskej Röhrscheidtowej bašće mějachu k tomu njedźelu dobru składnosć.
Móžeće sej předstajić, w lěće 2100 pola němskeho pjekarja z pomocu serbskorěčneho robotera swoje całty kupować? Po měnjenju wobdźělnikow lětušeho snobjeda móhła to jedna opcija do přichoda serbstwa być. W třoch rozdźělnych skupinach rozmyslowaše 30 přewažnje młodych ludźi wo tym, kak móhli na přikład serbskorěčne rumy tež w přichodźe wobchować.
Jedna skupina zaběraše so mjez druhim z tym, kak móhli Serbow zwonka Łužicy wjazać. Jedna móžna ideja je tak mjenowany „remote teaching“. Što to woznamjenja? Sedźiće před ličakom, a wučer serbšćiny podawa wam z pomocu internetoweje konferency hodźiny. Tajke modele hižo eksistuja, za šulske kubłanje, za dalekubłanja abo za studij. Čehodla njeměli tež my tajke něšto poskićeć?
Kollig budźe generalny wikar
Berlin (B/SN). 60lětny pater Manfred Kollig z Münstera budźe nowy generalny wikar arcybiskopstwa Berlin. Kollig, přisłušnik rjadu Arnsteiner Patres, budźe wot 1. februara naslědować prelata Tobiasa Przytarskeho, kiž je nětko propst cyrkwje swj. Jadwigi. Kollig je so 1956 w Koblenzu narodźił, zastupi 1974 do rjadu, złoži 1978 wěčne sluby a bu 1981 na měšnika wuswjećeny.
Planuja wosadny centrum
Annaberg-Buchholz (B/SN). Milionowy projekt wosadneho centruma planuje wosada swj. Hany w Annabergu-Buchholzu. Wón ma nastać na cyrkwinskej ležownosći, hdźež steji nětko hišće stare twarjenje. W nowotwarje změje na sto ludźi městno. Farar Karsten Loderstädt wuchadźa z toho, zo płaći nowotwar něhdźe milion eurow, a 200 000 eurow budźe wosada sama płaćić dyrbjeć. Hižo nětko wona za to pjenjezy zběra. Prěni zaryw je planowany za kónc lěta 2018. Lěto pozdźišo swjeći cyrkej swj. Hany swój 500. jubilej. Potom chcedźa nowy dom wotewrěć. Dźěćom a młodostnym chcedźa tak skićić dobre wuměnjenja za intensiwne skutkowanje.
Gymnazij wobsteji 25 lět
Nowa předsydka
Doskónčnje wo budget šło
Berlin (dpa/K/SN). Zwjazkowy sejm je dźensa doskónčnje wo budgeće za 2017 wuzradźował. Jutře ma so wón schwalić. Přisłušny wuběrk bě so hižo do toho wo definitiwnym etaće dojednał. Předwidźane je, nałožić klětu za wudawki 329 miliardow eurow. Přidatne pjenjezy budu za bój přećiwo terorizmej, za přewinjenje migraciskeje krizy a za humanitarnu pomoc. Financny minister Wolfgang Schäuble (CDU) chce štwórty raz za sobu bjez noweho dołha wuńć.
Trump TPP zaso spušći
New York (dpa/K/SN). Ručež je nowy prezident USA Donald Trump 20. januara do Běłeho domu zaćahnył, chce wón transpacifiske zrěčenje wo swobodnym wikowanju TPP wupowědźić. To připowědźi prawicowy populist z widejowym poselstwom. K tomu wón rjekny, zo je tele zrěčenje mjez dwanaće statami „potencielna katastrofa za naš kraj“. Japanski ministerski prezident Shinzō Abe k Trumpowemu hroženju praji, „bjez USA nima zrěčenje TPP žanoho zmysła“.
Erdoğan dale ludźi pušća
Tilich: Jasny signal knježacym
Zražka w Israelu
To a tamne (22.11.16)
Natutkana, pod wliwom drogow a tež hišće z handyjom w ruce je 54lětna žona z awtom po Kasselu jězdźiła. Policistam wona napadny, dokelž so sama za wodźidłom fotografowaše. Test alkohola wunjese 1,3 promile. W ručnej tobołce namakachu zastojnicy nimo toho hašišowu cigaretu. Jězbnu dowolnosć su šoferce nablaku sćazali.
Dojednanje spěwacych honačow w braniborskim Zitzu dla je kritiku zwjazka plahowarjow rasoweje pjerizny zbudźiło. „Plahowar móže z tym žiwy być, za kokoše je zawěranje w kurjencu hórke, dokelž so tam wodnjo porjadnje do so dadźa“, měni rěčnik zwjazka. Hobyjowy plahowar bě so po lěta trajacej zwadźe ze susodami dojednał. Kokoše a honače smědźa jenož hišće wot 8 do 20 hodź. na zahrodu. Njedźelu a swjate dny wšak dyrbja cyle w kurjencu wostać.
Atentatnik 27 ludźi morił
Kabul (dpa/SN). Při sebjemordarskim nadpadźe na jednu z mošejow afghaniskeje stolicy Kabula je po informacijach policije 27 ludźi žiwjenje přisadźiło. 35 wosobow so zrani. Mjez mortwymi su tež dźěći. Po informacijach nutřkowneho ministerstwa bě so sebjemordarski atentatnik před šiitiskej mošeju rozbuchnył. Radikalno-islamscy talibanojo zamołwitosć za nadpad dotal wotpokazuja.
Železnicar njezbožo zawinił
Traunstein (dpa/SN). W procesu železniskeho njezboža w Bad Aiblingu dla, při kotrymž bě 9. februara dwanaće ludźi zahinyło, posudźowachu fachowcy dźensa podawki, kotrež wjedźechu k zražce dweju ćahow. Wobskorženy je 40lětny železnicar, kiž měješe swój čas słužbu we wuhibkarni. Fachowc zarjada Zwjazka k přepytowanju železniskich njezbožow zwěsći, zo bě železnicar w rozsudnym wokomiku wopak jednał a z wopačnym signalom njezbožo zawinił.
Wo ćěkancach debatowałoj
