Přećiwo domjacym nadawkam stawkować chcedźa swójby w Španiskej. Přičina je hoberske mnóstwo nadawkow, kotrež tam dźěćom nabrěmjenjeja. Spočatnje chcedźa jenož kónc tydźenja domjace nadawki ignorować. Zaměr kampanje wšak je tele nadawki dospołnje wotstronić. Po přepytowanjach EU dyrbja šulerjo w Španiskej tydźensce 6,5 hodźin za domjace nadawki nałožić, w Němskej porno tomu jeno 4,7 hodźin. Jeli stawk ničo njewunjese, chcedźa jón klětu na wšitke dny tydźenja rozšěrić.

Pjany pěšk na awtodróze A 4 je wobchadne njezbožo zawinił, při čimž pak so na zbožo jeno snadnje zrani. 45lětny běžeše wo­srjedź jězdnje. Při kontroli naměrichu zastojnicy pola njeho 1,8 promilow alkohola w kreji. Njezbožo sta so wčera wječor při Porchowskej wotbóčce do směra na Drježdźany.

Berlin (B/SN). Chorownja swj. Jadwigi, wobstejaca 170 lět, je najstarša Berlinska chorownja w nošerstwje katolskeje cyrkwje. Na swjedźenskim zarjadowanju wobdźěli so tež Prěni měšćanosta Michael Müller (SPD). W narěči wón chwaleše, zo steji chorownja za „žiwu mjezyčłowjeskosć“. Wot załoženja pomha wona pacientam, njehladajo na jich nabožinu a pochad. Tež dźensa wukonja wažny přinošk k tomu, zo wostanje rosćaca stolica „čłowjeska a solidarna“.

Zwjazani we wšelakorosći

Genf (B/SN). Lutherski swětowy zwjazk (LWB) a katolska cyrkej stej do swjatočnosćow k 500. róčnicy reformacije swoje zhromadnosće wuzběhnyłoj. Po lětstotkach trajacych napjatosćach a konfliktach su katolscy a ewangelscy wěriwi 31. oktobra prěni raz na globalnej runinje zhromadnje w šwedskim Lundźe na reformaciju spominali. Zhromadnu Božu słužbu swjećeštaj tam bamž Francis­kus a prezident LWB, biskop Munib Younan.

Modlić so za přesćěhanych

Berlin (dpa/K/SN). Něhdyši šefredaktor turkowskeje opozicionelneje nowiny Cumhuriyet Can Dündar je zwjazkowe knježerstwo za to kritizował, zo njeje na zajeća w Turkowskej přisłušnje reagowało. Reakcija němskeho knježerstwa bě zawěrno słaba, tež w přirunanju z druhimi zapadnymi partnerami Turkowskeje, tak na přikład USA“, Dündar rjekny. „Berlin zajeća ani zasudźił njeje. Nam turkowskim žurnalistam ničo njepomha so starosćić.“ Wot europskich knježerstwow wočakuje wón jasny signal za demokra­tiju w Turkowskej.

Přiměr bróni za Aleppo

Moskwa (dpa/SN). Ruske wójsko je za zajutřišim, pjatk, za syriske město Aleppo dalši přiměr bróni připowědźiło. Šef generalneho staba Walerij Gerasimow je wojowarjow opozicije namołwjał, wobstupjeny wuchodny dźěl města wopušćić. Za to budźetej dwě wosebitej čarje zarjadowanej, bjez wojakow a bróni knježerstwa, wón přilubi. Ciwilistam a zranjenym su šěsć čarow přihotowali. Přiměr ma wot 9 hač do 18 hodź. trać.

Němcy bychu Clinton wolili

Peking (dpa/K/SN). China ma starosće němskich awtotwarcow zadźěwkow při wuwiću elektromotora dla za njetrjebawše. Minister za industriju a infotechniku Miao Wei praji zwjazkowemu ministrej za hospodarstwo Sigmarej Gabrielej (SPD) w Pekingu, zo wobchadźa so z němskimi producentami runje tak kaž z chinskimi. Kaž Gabriel pozdźišo žurnalistam rjekny, je chinski minister wobmyslenja zaćisnył, zo móhli so tež lokalne firmy jako dodawaćelki zasadźić. Wicekancler zdobom wuwjedźe, zo plany k wuwiću jězdźidłow z alternatiwnym pohonom na najwjetšim awtowym wikowanišću swěta dotal w Chinje njejsu zakoń, tak zo je hišće wjele móžnosćow, na nje wliw wukonjeć. „Zaleži na tym zwuraznić, zo trjebamy za naše předewzaća fairne inwesticiske wuměnjenja“, Gabriel podšmórny. Dźensa poda so dale do Chengduwa. Na druhej staciji swojeje wizity Chiny wopyta wón wulkowiki, na kotrychž je Němska tónkróć partnerski kraj.