Budyšin (SN/MkWj). Rada za serbske naležnosće Sakskeje je so dźensa k swojemu prawidłownemu posedźenju w Budyšinje zešła. Pod nawodom předsydki, zapósłanče CDU w Zwjazkowym sejmje Marje Michałkoweje, wuradźowachu čłonojo mjez druhim wo komunalnym wubědźowanju „Serbska rěč je žiwa“. Při tym mějachu wuslědk woprašowanja na blidźe, kotrež bě čłon rady Hubertus Ryćer, mjez dwurěčnymi gmejnami přewjedł.

Dalše ćežišćo bě přihot zhromadneho posedźenja serbskeju radow Sakskeje a Bra­niborskeje 2. meje w Drježdźanach. Tam chcedźa so mjez druhim wo nazhonjenjach w zwisku z nowym Serbskim zakonjom Braniborskeje informować a wo planje k zachowanju serbskeje rěče a kultury wuradźować. Nimo toho chcedźa problemy serbskeho wučerskeho a kubłarskeho dorosta rozjimać, Marja Michałkowa na naprašowanje SN informuje. Kubłanje budźe tež hłowna tema dźěłoweho posedźenja, kotrež ma so srjedź junija w Budyšinje přewjesć. Tam rěča wo naćisku noweho šulskeho zakonja.

Z nowym rekordom staj wohnjowej wobornikaj­ z Pólskeje minjenu sobotu w Berlinje wubědźowanje po schodach Park-Inn-hotela na Alexandrowym naměsće dobyłoj. Szczecinjanaj trjebaštaj za 770 schodźenkow hotela runje 5:42 mjeńšin a móžeštaj tak swój dotalny rekord 6:01 samo hišće polěpšić. Wjace hač 750 wohnjowych wobornikow z wosom krajow so na běhu w 39 poschodowym domje wobdźěli. Při tym mějachu 30 kilogramow ćežki wačok na chribjeće a płunowu masku před mjezwočom.

Pytajo ze sylnym magnetom za swojimi zhubjenymi klučemi je muž w Bayerskej ručnu granatu z jězora wućahnył. Kaž rěčnik policije wobkrući, bě granata z Druheje swětoweje wójny hišće strašna. 28lětny bě magnet při wudźe připrawił, po tym zo běchu kluče do jězora padnyli. Policija granatu znješkódni.

Nadźija za bjezwokrjesne města

Choćebuz (dpa/ch/SN). W swojim naćisku za cyłkowny koncept planowaneje wokrjesneje reformy drje čerwjeno-čerwjenej knježerstwowej frakciji dale zwuraznitej, zo měli wot 2019 jenož hišće města z wobydlerskej ličbu 175 000 bjezwokrjesne wostać. Tole by rěkało, zo jenož krajna stolica Podstupim samo­statna wostanje a zo so dotalne bjezwo­krjesne města Choćebuz, Brandenburg nad Habolu a Frankfurt nad Wódru do wokolnych­ wokrjesow zapřija. Přećiwo tomu so města sylnje wobaraja. Krajne­ knježerstwo je tuž za wuradźowanje w parlamenće wobmjezowanje formulowało, kotrež rěka, zo móhło so prašenje regularneje ličby wobydlerjow za bjezwokrjesne města nastupajo noworjadowanje wokrjesow znowa diskutować. Choćebuz budźe z něhdźe 92 500 wo­bydlerjemi lěta 2030 druhe najwjetše město kraja.

Nowa BTU trjeba čas