Naćisk zludanje wokrjesow njewotwobara
Podstupim/Choćebuz (SN). Krajni radźa wokrjesow Łobjo-Halštrow, Hornje Błóta-Łužica a Sprjewja-Nysa su zludani hladajo na naćisk wo wodźacym wobrazu zarjadniskeje strukturneje reformy Braniborskeje 2019. Krajny sejm chce jutře wo naćisku rozsudźić. Swoje přeća, žadanja a pokazki pak krajni radźa w předležacym dokumenće knježerstwa paruja.
Prěni plan na dobro Serbow
Knježerstwo Kraja Braniborskeje wobšěrne naprawy schwaliło
Podstupim (SN). Braniborske krajne knježerstwo je prěni plan naprawow zestajało, z kotrymiž ma so delnjoserbska rěč w kraju zesylnić. Po tym puću zwoprawdźa knježerstwo wobzamknjenje krajneho sejma z lěta 2015. Kulturna ministerka Martina Münch (SPD) je plan tele dny w kabineće předstajiła. „Delnjoserbska rěč je žiwe kulturne herbstwo Braniborskeje. Wona přinošuje k atraktiwiće a mnohotnosći kraja a je aspekt jónkrótnosće we Łužicy. Z planom naprawow chcemy Serbow škitać a nałožowanju serbšćiny polěkować“, Münch rozłoži, „plan zarjaduje so do cyłeho rjadu naprawow knježerstwa na dobro Serbow. Tak bu lěta 2014 Serbski zakoń wobnowjeny. Loni wotměchu so prěni króć zjawne wólby Rady za serbske naležnosće Braniborskeje. Nimo toho je kraj swój přinošk k etatej Załožby za serbski lud na 3,1 milion eurow powjetšił.“
Wojacy domoj?
May za lěpši kraj
Krajej chłostać?
To a tamne (12.07.16)
Na jězbu z balonom wokoło zemje je so ruski dyrdomdejnik Fjodor Konjuchow podał. 65lětny startowaše dźensa rano w zapadoawstralskim Northamje, 100 kilometrow sewjerowuchodnje přistawneho města Perth. Konjuchow chce rekord Američana Steva Fosseta přewinyć, kiž bě zemsku kulu lěta 2002 w běhu 13 dnjow wobkružił, a planuje cyłkownu čaru 33 000 kilometrow.
Najwjetši orchester swěta zetka so minjeny kónc tydźenja w Frankfurće nad Mohanom, hdźež je zhromadnje hudźił. Němski institut za rekordy je dokładnje 7 548 hudźbnikow zličił a tak informaciju zarjadowarja wobkrućił. Nětko chcedźa hoberski orchester do knihi „Swětowe rekordy w Němskej“ kaž tež do Guinnessoweje knihi rekordow zapisać. Dotal najwjetši orchester swěta bě lěta 2013 w awstralskim měsće Brisbane ze 7 224 hudźbnikami hrał.
Dźe wo sćěhi brexita
Brüssel (dpa/K/SN). Financni ministrojo krajow z eurom rěča dźensa w belgiskej stolicy Brüsselu wo sćěhach brexita. Je to prěnje jich zetkanje po woprašowanju luda we Wulkej Britaniskej. Nimo toho zaběraja so z wuwićom w Portugalskej a Irskej po skónčenju pomocnych programow za tutej krajej. Rozsudy wo přichodnych kročelach su wšak hakle jutře na schadźowanju financnych ministrow statow EU wočakować.
Gauck do Chile wotlećał
Berlin (dpa/SN). Zwjazkowy prezident Joachim Gauck je dźensa na wopyt do Chile a Uruguayja w Južnej Americe wotlećał. W chilskej stolicy Santiagu wočakuja jeho jutře statna prezidentka Michelle Bachelet a dalši zastupnicy stata. W rozmołwach chcedźa aktualne politiske a hospodarske prašenja runje tak wobjednawać kaž złóstnistwa za čas wojerskeje diktatury wot 1973 do 1990.
Lindner: AfD wobkedźbować
