Ban Turkowsku napominał
To a tamne (22.07.16)
Tež na najwotležanišich twarnišćach njejsu dźěłaćerjo před kontrolemi čornodźěła dla wěsći. Hłowny cłowny zarjad w Augsburgu je swojich zastojnikow wčera na 2 224 metrow wysoki Nebelhorn pola bayerskeho Oberstdorfa pósłał, hdźež tuchwilu nowy panoramowy hosćenc nastawa. Mjez 37 dźěłaćerjemi su cłownicy woprawdźe wjacore přeńdźenja zakonjow zwěsćili. Dokelž powjaznica twarskich dźěłow dla njejězdźeše, wšak dyrbjachu woni pěši na horu.
Přechutnje brał je Stuttgarćan kriminalku w telewiziji a je policiju wołał. 46lětny bě na schodźe wjaceswójbneho domu słyšał, kak něchtó žonu wudrěwuje, dokelž bě mandźelstwo łamała. Wuchadźejo z toho, zo jedna so wo njeskutk, wołaše muž policiju. Durje bydlenja pak wočiništej sotře w starobje 14 a 16 lět, kotrejž běštej film hladałoj.
Zakoń płaći
Paris (dpa/K/SN). Po měsacy trajacej wadźeńcy reformy dźěłowych wikow dla je francoske knježerstwo kónčne wothłosowanje w parlamenće prosće na te wašnje wobešło, zo wuži wosebite rjadowanje we wustawje. Po nim wěsty zakoń płaći, jeli njenamjetuje so, wuprajić knježerstwu njedowěru. Z reformu ma so dźěłowe prawo złahodnić a předewzaćam wjetša fleksibelnosć zmóžnić.
Hooliganojo před sudnistwom
Köln (dpa/SN). Po brutalnym nadpadźe na španiskich turistow w Kölnje zahaja přichodny tydźeń proces přećiwo pjeć ruskim hooliganam. Jednanje wotměje so 29. julija, zdźěli rěčnik Kölnskeho hamtskeho sudnistwa. Mužam wumjetuja zhromadne strašne ranjenje ćěła. Woni běchu w juniju třoch Španičanow přebili, kotřiž rozdźělowachu antifašistiske lětaki. Policija móžeše bičkow zajeć. Tući běchu z ćahom z europskich koparskich mišterstwow w Francoskej přijěli.
Wěstotu přepruwować
Chětro wopušćena skutkuje tele dny nakupowanska dróha Liman ...
Visegrád: Zajimy wuchoda lěpje zastupować
Waršawa (dpa/SN). Knježerstwowi šefojo Visegrádskeje skupiny schadźowachu so dźensa we Waršawje, zo bychu wo přichodźe Europskeje unije po wotchadźe Wulkeje Britaniskeje z EU (brexit) wuradźowali. Dalša tema rozmołwow mjez Pólskej, Čěskej, Słowakskej a Madźarskej bě politika ćěkancam napřećo, zdźěli ministerska prezidentka Beata Szydło medijam. Wuchodne čłonske staty EU su dotal raznje přećiwo wukazanej kwoće ćěkancow w jednotliwych krajach.
Erdoğan postaja
Pjenjezy za Irak
Přećiwo propagandźe
To a tamne (21.07.16)
Wot dweju elefantow ze seršćowcom na běłu płachtu molowanej wobrazaj stej w zwěrjencu čěskeho Ústíja nad Labem na předań. Něšto mjeńši wobraz płaći 19 eurow, wjetši 33 eurow. Molowanje ma dwě lěpšinje: Zwěrjeći stej zaběranej a coologiska zahroda ma přidatne dochody. Te móža za slědźenja na polu chorosćow elefantow wužiwać. Z njewšědnej akciju chcedźa pokročować.
Njewšědnje mało dźěła měješe policija po padustwje w Nürnbergu: Skućićel ležeše we łožu wopora a kruće spaše. Po- družnik bě wčera wječor při durjach swojeho bydlenja wobškodźenja zwěsćił. Wšitcy kamory běchu přeborkane, a paduch we łožu ležo kruće spaše. Wobydler zazwoni policiju, kotraž 27lětneho paducha wubudźi. Dokelž steješe wón wočiwidnje pod wliwom drogow a bě zamyleny, dowjezechu jeho do psychiatrije.
Wo přichodźe Polakow rěčałoj
Waršawa/London (dpa/SN). Pólska ministerska prezidentka Beata Szydło a britiska premierministerka Theresa May stej telefonisce wo poćahach wobeju krajow po brexiće rěčałoj. Tema běchu tež prawa w Jendźelskej bydlacych Polakow po wotchadźe kraja z Europskeje unije, kaž Waršawska kenclija zdźěli. Szydło bě na to pokazała, zo dyrbjał London tež po brexiće zajimy Polakow w kraju zakitować. We Wulkej Britaniskej bydli a dźěła mjeztym wjace hač poł miliona Polakow.
Předsydstwo wotprajene
London (dpa/SN). Wulka Britaniske njepřewza kaž planowane w druhej połojcy 2017 prezidentstwo rady EU. Tole je britiska premierministerka Theresa May prezidentej rady Donaldej Tuskej telefonisce připowědźiła, kaž z Londona zdźěleja. Tusk je jeje rozsud pječa witał. Předsydstwo rady EU so połlětnje měnja. Wulka Britaniska by je po planje klětu w juliju přewzać měła. Po připowědźenym brexiće pak je to ćežko předstajomne.
Nečasa wobskoržili
