Dojednanje z Turkowskej wo ćěkancach wot dźensnišeho płaćiwe

Athen/Berlin (dpa/K/SN). Wot dźensnišeho płaćiwe dojednanje Europskeje unije­ z Ankaru, po kotrymž so ćěkancy z Egejskich kupow do Turkowskeje zaso wróća, načinja w praksy njemałe ćeže. Tak pobrachuja policisća za rjadowanje a wosebje přełožowarjo. Tajki wuznamny plan njehodźi so w „běhu 24 hodźin zwoprawdźić“, rjekny koordinator grjekskeho knježerstwa za migraciju.

Njedźiwajcy woneho zrěčenja přichadźa do Grjekskeje přeco hišće nahladna ličba ćěkancow. Po zdźělenju krizoweho staba rozrosće wona dźensa na cył­kownje 50 411 ludźi. Wot njedźele ranja hač do dźensnišeho switanja je z tur­kowskich přibrjohow 1 662 migrantow na kupy w Egejskim morju přišło. W lěhwje Idomeni njedaloko makedonskeje hranicy přebywa po najnowšim ličenju něhdźe 13 250 ćěkancow, mjez kotrymiž su mnohe swójby z dźěćimi. Žiworić dyrbja­ woni pod kastrofalnymi wobstejnosćemi. Najwjetši dźěl z nich wšak nochce woteńć, dokelž so nadźijeja, zo móhła Makedonska hranicu njenadźicy tola wotewrić, z čimž bychu měli swobodny puć do srjedźneje Europy.

Peking (dpa/SN). Statny a stronski nawoda Chiny Xi Jinping je dźensa zwjazkoweho prezidenta Joachima Gaucka z wojerskej ceremoniju w Pekingu witał. W srjedźišću rozmołwy stejachu bilateralne poćahi­ a mjezynarodne prašenja, kaž zwjazkowy prezidialny zarjad zdźěli. Nimo toho chcetaj wobaj statnikaj „lěto młodźinskeje wuměny“ mjez Němskej a Chinu wotewrěć. Na prěnim statnym wopyće w Chinje je so Gauck tež z ministerskim prezidentom Li Keqiangom zetkał. Při tym dźěše předewšěm wo wutwar hospodarskich stykow mjez krajomaj, wo połoženje chinskeho hospodarstwa a wo nowy pjećlětny hospodarski plan. Tón bě chinski ludowy kongres hakle minjeny tydźeń schwalił, zo by so hospo­darski rozmach dale sylnił.

Źiwize (HA/SN). Za swoju lětušu 25. hłownu zhromadźiznu je sej Domowinska župa Delnja Łužica wupytała wjes Źiwize­ (Siewisch), kotraž słuša do města Drjowka. Tak chcychu zjawnje wšitke prócowanja připóznawać, kotrež so w Drjowku a jemu přisłušacych wsach na dobro serbstwa přewjeduja. Źiwzize słušeja hižo wjele lět do serbskeho sydlenskeho ruma, hdźež po swojich móžnosćach serbsku rěč, kulturu a tradicije haja, rjekny župan Harald Koncak při witanju něhdźe 70 delegatow a hosći hłowneje zhromadźizny. Mjez nimi bě tež krajny rada wokrjesa Sprjewja-Nysa Harald Altekrüger (CDU), kiž so Domowinje za jeje wobšěrne aktiwity dźakowaše.

W swojej rozprawje pokaza Harald Koncak na to, zo župa Delnja Łužica dale rozrostuje. Mjeztym wobsteji wona ze 40 Domowinskich skupin a 22 towarstwow a ma 2 282 čłonow. To rěka, zo je kóždy třeći čłon Domowiny z Delnjeje łužicy.

Běrnjaca solotej město pjenjez: Rubježnik dyrbješe so při nadpadźe w Berlinskim měšćanskim dźělu Britz z darmotnej jědźu spokojić. W nocy na sobotu wohrožeše wón dwě přistajenej kioska. 56lětna sobudźěłaćerka jemu rozłoži, zo su dochody dnja hižo wotewzate. A jeje 24lětna kolegina poskići njeznatemu běrnjacu solotej a napojej. Ze skromnym rubjenstwom so muž na kolesu zminy.

Dospołnje překwapjeny bě hrajer lota w Posaarskej, jako zhoni, što bě w Hrě 77 woprawdźe dobył. Poprawom bě wón ze 77 000 eurami ličił, štož je pola šěsć prawych ličbow z wašnjom. Štož pak njewědźeše: Loterijowe předewzaće dyr­bješe kónc tydźenja, prěni króć w sta­wiznach, nakopjeny jackpot rozdźělić, byrnjež nichtó sydom prawych ličbow njeměł. Tak zwyši so dobyće Posaarčana na dobre 902 961,80 eurow.