Hrać a wuknyć
Budyšin (kb/SN). Ludowe nakładnistwo Domowina (LND) je nowu hru wudało, z kotrejž móža dźěći serbski alfabet wuknyć. „Pismikowy MEMO“ je nowe wudaće hornjoserbskeho memoryja, kotryž wobsahuje 34 kartkowych porikow, zwobraznjace wulke a małke pismiki kaž tež objekt z hodźacym so nazwukom. Tež za njemaćernorěčnych je hra atraktiwna, dokelž wopřijima słownu lisćinu z němskimi přełožkami. Memory spěchuje koncentraciju, wutrajnosć, kmanosć zaznawanja a pomjatk.
Hra Simony Ćěsliny z ilustracijemi Gudrun Lenz za znajmjeńša dweju hrajerjow je w internetnym wobchodźe LND kaž tež w Smolerjec kniharni na předań.
Rekordny rěčny kurs z naročnym wobrubjenjom
Choćebuz (KP/SN/bn). Lětuši kompaktny kurs delnjoserbšćiny so nachila. Wot minjeneje póndźele hač do dźensnišeho pjatka je so dohromady 90 zajimcow na zarjadowanju Šule za delnjoserbsku rěč a kulturu wobdźěliło, štož woznamjenja nowy rekord. Mjez kursistami, kotřiž pochadźeja z Hornjeje kaž tež Delnjeje Łužicy, Berlina, Pólskeje, z Čěskeje a Šwicarskeje, su na přikład wučerjo, kubłarjo, studenća, šulerjo Delnjoserbskeho gymnazija Choćebuz a mnozy sobudźěłaćerjo serbskich institucijow, wosebje ze Załožby za serbski lud. Samo kriminalny komisar chce sej serbšćinu přiswojić. Po cyłkownje sydom skupinach, rjadowane po stopjenjach A1 (započatkarjo) do C1 (konwersacija), zwučowachu woni w Choćebuzu a wokolinje wšědnje něhdźe šěsć hodźin. Docenća běchu Jenifer Dünnbierowa, Edyta Rätzel, Angela Šurmanowa, Maria Elikowska-Winklerowa, Charlotte Kušcyna, Till Wojto, Martin Ptasińsk a dr. Christiane Piniekowa.
Móža dale dźěłać a kubłać
Budyšin/Lipsk (SN/at). Stejnišća za sposrědkowanje medijoweje kompetency w Hornjej Łužicy su jasne. Medijowa rada Sakskeho krajneho wustawa za priwatny rozhłós a nowe medije SLM je na njedawnym posedźenju spěchowanje partnerow w dohromady 15 regionalnych kruhach skutkowanja po cyłej Sakskej wobzamknyła. Zwjeselace je, zo móže Medijowa syć Łužica swoje dźěło hač do 31. decembra 2027 pokročować. K jeje partneram słušatej zdobom Załožba za serbski lud a Domowina.
Mjez spěchowanymi projektnymi nošerjemi su za wobłuki Budyšin, Kamjenc a Radeberg Budyski Kamjentny dom, za kónčiny Zhorjelc, Lubij a Žitawa Kulturna- a dalekubłanska towaršnosć zwr Ludoweje uniwersity „Třikrajowy róžk“ w Lubiju a za wobłuki Wojerecy, Niska a Běła Woda Wojerowska kulturna fabrika.
SLM podpěra Medijowu syć Łužicu tež hižo w prěnjej spěchowanskej dobje, kotraž traje hišće hač do kónca lěta. Mjez poskitkami su hłownje přednoški wo bjezstrašnym hibaju w interneće, ale runje tak, kak šmóratko prawje posłužuješ. Poskitki informuja tež w serbskej rěči.
Jubilejny swjedźeń swjeći jubileje
Budyšin (SN/bn). Pod hesłom „Dimensionen – Rozměr“ wuhotuje město Budyšin wot 2. do 18. awgusta 30. Łužiske hudźbne lěćo. Program lětušeho jubilejneho swjedźenja wopřija dohromady 12 zarjadowanjow na sydom jewišćach. Zazběh twori koncert „Das Kleine im Großen“ Němskeje filharmonije smyčkarjow w Budyskej cyrkwi swj. Pětra. Młodźinske ćěleso w nošerstwje Zwjazka němskich hudźbnych šulow je po swójskim podaću „z najlěpšich muzikaliskich talentow w starobje jědnaće do 20 lět“ zestajane a prezentuje so w sprjewinym měsće z twórbami mjez druhim Wolfganga Amadeusa Mozarta a Pjotra Iljiča Čajkowskeho. Składnostnje dalšeho jubileja, mjenujcy 30. róčnicy załoženja biosferoweho rezerwata Hornjołužiska hola a haty, wuhotuja w Malešanskim Domje tysac hatow wosebity cyłodnjowski program „Wjacedimensionalna biosfera“ na přikład z wodźenjemi po wustajeńcy a wječornym pućowanjom po hatach. Wo hudźbne wobrubjenje postaratej so triji Spirt & Pleasure goes Folk a Bube Dame König. Na kóncu mjenowany wustup připowědźi hudźbnik cyłka Jan Oelmann jako „koncert ze štyrjomi premjerami“.
Prezentacija knihi zdobom dźěl mjezynarodneho kursa
Budyšin (SN/bn). „Zmij Direndaj, Hica- Mica, Zmijiček Direndajček, Zmij Ararat a powědančka wo nimi“ je titul zběrki, kotruž je Celovecske nakładnistwo Drava njedawno wudało. Antologija z ilustracijemi Štefana Turka wopřijima wuběr přełožowanych tekstow Loizy Wiesera, kotrež je awstriski Słowjenc „na zakładźe wječorneho bajebaća swojim dźěćom“ spisał. Milenka Rječcyna je powědančka zeserbšćiła a wčera w Smolerjec kniharni předstajiła. „Kniha drje měri so w prěnim rjedźe na dźěći, hodźi so pak hłuboko do stawiznow sahaceho wobsaha dla tež za dorosćenych čitarjow“, wona zjima. Po jeje słowach „njebě sej Wieser wěsty, hač su powědančka wudawanja hódne“, po nastorku přećelow pak so naposledk rozsudźi, je napisać a w swójskim nakładnistwje publikować. Jako spěchowar „małkich rěčow ze z wida wjetšinow často snadnej hódnotu“ a jako přećel Serbow zamó Rječcynu přeswědčić, powědančka do hornjoserbšćiny přenjesć.
„Literarne wuchodźowanje po serbskim Choćebuzu“, kotrež ...
Słowakski flair na Smochčanskim dworje
Wulět do wjelorakeje hudźbneje krajiny słowjanskich susodow z wusahowacej wirtuozowku a suwerenymi solistami
Serbskemu ludowemu ansamblej kaž tež kubłanišću swj. Bena je Smochčanski hudźbny swjedźeń z kóždolětnym wjerškom. Lětsa wuhotowaštej jón wospjet po před lětomaj zahajenej tradiciji z „charakteristiskej hudźbu susodnych Słowjanow“, tónraz pod hesłom „Słowakskej nocy“. Nimo wšitkich spartow SLA předstajichu wjacori hosćo wotměnjawy, dramaturgisce wušiknje zestajany, něhdźe dwuapołhodźinski program pod hołym njebjom.
Mjez hóstnymi hudźbnikami wědźeše předewšěm Paľa Škodova na cymbalu přeswědčić. Hač orchester a spěwarjow přewodźiwši abo solistisce improwizujcy – swój instrument, kotryž je za Słowaksku typiski, wirtuoznje wobknježo wona na dych wotražace wašnje dopokaza, zo nima so před najwjetšimi mištrami cymbala schować a zo hodźi so na tymle hudźbnym nastroju kóždažkuli muzikaliska rafinesa zwoprawdźić.
Přerěznje tysac wopytowarjow na předstajenje
Budyšin (SN/bn). Poslednje předstajenje inscenacije „Spuk unterm Riesenrad – Jetzt ist Bautzen dran“ je předwčerawšim 28. Budyske lětnje dźiwadło a zdobom hrajnu dobu 2023/2024 Němsko-Serbskeho ludoweho dźiwadła zakónčiło. „Přewšo wuspěšna hra“, kaž w medijowej zdźělence NSLDź rěka, přiwabi na 36 předstajenjach dohromady 37 012 přihladowarjow. Porno lońšemu woznamjenja to rozrost wo něhdźe 3 000. Na wudospołnjacych poskitkach „Dźiwadło na zahrodźe“ a „Budyske filmowe nocy na Hrodźe“ zličichu dohromady 584 resp. 826 wopytowarjow, štož je w přirunanju ze zašłej sezonu raz jasny minus něhdźe 1 000, raz dobry plus něhdźe 200 zajimcow. Intendant NSLDź Lutz Hillman zjima: „Přewšo wuspěšne Budyske dźiwadłowe lěćo leži za nami. Wšitke předstajenja běchu hižo do premjery wupředate, a wjeselimy so jara nad tymle wulkim dočasnym dopokazom dowěry našeho publikuma. Wulki dźak wuprajam na tutym městnje tež swojim sobudźěłaćerkam a sobudźěłaćerjam na jewišću kaž tež za nim, kotřiž su tónle hoberski akt zhromadnje zmištrowali.“
Do swěta bajkow so zanurić móhli
Klara Bjedrichec w našej redakciji
Hač wjesne hrajkanišćo abo wědomosć za dźěći – njeje žaneje temy, kotrejež so 16-lětna Wěteńčanka Klara Bjedrichec w swojim prózdninskim dźěle njejima. Tak so na jednym dnju wobhoni, štó sej tuchwilu rady kotry słód lodu popřeje, a na druhim dnju wo kubłanskopolitiskim prašenju rešeršuje. Štóž ma kaž wona jedynku w serbšćinje a w požadanju poskićuje, „wšitke nadawki wukonjeć, kotrež maja so činić“, je we wšědnej produkciji serbskeho dźenika wosebje witany. Hižo rańše posedźenje je drje po jeje měnjenju „přeco jara zajimawe“, ale „to dźe poměrnje spěšnje a druhdy dyrbju so koncentrować, zo bych wšitko zrozumiła.“
Jej so jara lubi, zo móže „kaž prawa redaktorka“ sobu dźěłać. A hdyž je wotewrjenych prašenjow, ma „přeco přećelnu Milenku Rječcynu poboku, kotraž mi rady pomha.“ Do toho běše Klara hižo dwójce składnostnje akciskeho dnja „genialsozial“ nadawki za Dźěćiznak přewzała. Honorar za dźěło w ramiku tuteje akcije so za socialne projekty wužiwa. Po abiturje chce Klara najprjedy lěto po swěće pućować. W tutym času móže potom zdobom rozsud wo powołanju dozrawić.
