Riesa (dpa/SN). Z wobzamknjenjemi k swójbnej politice je AfD swój zwjazkowy zjězd w Riesy zakónčiła. Delegaća roz­sudźichu, zo do wólbneho programa zapisaja, zo je „swójba, wobstejaca z nana, maćerje a dźěći, zarodk towaršnosće“. W naćisku programa dotal steješe, zo je „swójba zarodk towaršnosće“.

Přetorhnjenje samodruhosće w prěnich dwanaće tydźenjach ma bjez chłostanja wostać, je-li so žona do toho poradźować dała. Tam maja so jej wobrazy wuwiwaceho so dźěsća pokazać.

Na zjězdźe w Riesy su delegaća cyłkowny program za wólby zwjazkoweho sejma 23. februara wobzamknyli. Dale rozsudźichu, zo „Młodu alternatiwu“, ­dorostowu organizaciju AfD rozpušća a zdobom nowu młodźinsku organiza­ciju załoža, kotraž je krućišo z nawodnistwom strony zwjazana. Wuprajenje předsydki Alice Weidel, zo chcedźa wšitke milinowe wětrniki w Němskej zwottorhać, zbudźi wjele diskusijow. Kaž strona zdźěli je wona pječa jenož wětrniki měniła, za kotrež dyrbja lěsy pušćeć.

Po wudyrjenju pochromy wuradźuja zamołwići wo móžnych naprawach

Podstupim (dpa/SN). Po wudyrjenju ­pochromy (Maul- und Klauenseuche) pola wodowych buwołow (Wasserbüffel) w Braniborskej su zamołwići dźensa wo dalšim postupowanju přećiwo natykliwej chorosći wuradźowali. Zo je so mrětwa na druhe zwěrjata wupřestrěła, to ­minjeny kónc tydźenja njejsu zwěsćić móhli. Tež zwjazkowy minister za ra­tarstwo Cem Özdemir (Zeleni) je dźensa zastupnikow branše do ministerstwa zwołał, zo by z nimi wuradźował.

Wudyrjenje mrětwy, kotraž je w Němskej jako MKS znata, móhło eksport němskich ratarskich wudźěłkow haćić. Zwjazkowe ratarske ministerstwo z toho wuchadźa, zo budźe lědma hišće móžno mloko, mlokowe wudźěłki, mjaso a mjasowe wudźěłki do krajow zwonka EU eksportować, budźe-li mrětwa jako oficialny pad wobkrućena.

Někotre kraje su hižo konsekwency z njewěsteje situacije sćahnyli. Tak Južna Koreja aktualnje swinjace mjaso z Němskeje njeimportuje. Nižozemska je zakazała ćelata po kraju transportować.

Čas Weimarskeje republiki je dźensa wjacorych přičin dla dosć intensiwnje diskutowana doba. Za Serbow běchu 1920te lěta předewšěm nastupajo politiku wažne. Drje najznaćiša takrjec interna debata tehdy wěnowaše so prašenju, kak hodźało so prawo ludow na samopostajowanje najlěpje rozrisać. Kak by so Serbstwo w swójskim staće abo jako dźěl (bywšeje) Čěskosłowakskeje wuwiło, je rjana tema za uchronisku literaturu, kotraž na zakładźe historiskich podawkow spekulatiwne scenarije wuwiwa. Ideja parlamentariskeho zastupowanja mjeńšinow je w napřećiwku wšo druhe hač u- abo dystopiska. Mysle Jana Skale měli nam z přikładom być, bě dźě so wón jako razny demokrat za reprezentatiwnu reprezentancu narodnych mjeńšinow w tehdyšim Němskim mócnarstwje angažował – we wzajomnosći ze zastupowarjemi minoritow a jako mjezynarodnje nastajeny patriot tež raz mjezy, kotrymž dźensa rady „pucher“ rěkamy, wopušćejo. Bosćan Nawka

Bukarest (dpa/SN). W Rumunskej stolicy Bukaresće žadachu sej tysacy demonstranća před wustawowym sudnistwom wotstup amtěrowaceho statneho prezidenta Klausa Iohannisa, rumunske medije rozprawjeja. Zdobom přiwisnicy prawicarskeho bywšeho prezidentskeho kandidata Calina Georgescu přećiwo tomu protestowachu, zo so wuslědk pre­zidentskich wólbow zběhnje.

Wólby prezidenta kónc nowembra bě prawicarsko-ekstremistiski a Ruskej přichileny Georgescu dospołnje njewo­čakowano dobył. Na to bě wustawowe sudnistwo spočatk decembra wuslědk wólbow jako njepłaćiwy zběhnyło a wospjetowanje wólbow wukazało, ­dokelž njebě wólbny proces zakońsce ­čisty. Sudnistwo argumentowaše, zo ­buchu wolerjo pječa wot socialnych medijow manipulowani, kiž běchu pra­wicarskeho kandidata jednostronsce podpěrowali.

W Rumunskej lědma znaty Georgescu bě wosebje na internetnej platformje Tiktok za sebje wabił. Platforma pak njeje tole wuraznje jako wólbne wabjenje woznamjeniła, sudnicy šwikachu.