To a tamne (09.04.25)
Kaž w filmje su skućićeljo na awtodróze A 2 w Delnjej Sakskej jěduce nakładne awto wurubili. Swědkojo wčera rano wobkedźbowachu, zo ćmowe wosobowe awto nakładne awto do směra na Berlin přesćěhuje. Njedaloko Luhdena mužej na motorowu hawbu awta zalězeštaj a durje připowěšaka wočiništaj. Na to wobrazowki a laptopy kradnještaj. Šoferej tole hakle na přichodnym parkowanišću napadny. Škoda wučinja 10 000 eurow.
Zlutniwje z pitnej wodu wobchadźeć maja ludźo hladajo na trajacu suchotu. Tole namołwja hłowny jednaćel zwjazka městow Němskeje Helmut Dedy. Změna klimy je dale a bóle widźomna. Tohodla je rozumne wužiwanje wody w městach, ratarstwje a industriji jara wažne, wón rjekny. Dołho trajaca suchota móhła komuny wužadać. Tuchwilu pak je zastaranje ludźi z wodu zaručene.
Ličba młodych skućićelow přiběra
Zhorjelska policajska direkcija je wčera kriminalnu statistiku zańdźeneho lěta wozjewiła. W Zhorjelskim a Budyskim wokrjesu je ličba registrowanych njeskutkow porno předlětu wo 5,7 procentow stupała.
Zhorjelc (SN). Lońše signifikantne zwyšenje ličby přeńdźenjow wo 2 613 padow zwisuje z wulkeho dźěla z migraciskej situaciju we wokrjesu, to zamołwići w swojej rozprawje znazornjeja. Wot cyłkowneje ličby bě 2 222 přeńdźenjow přećiwo migraciskemu prawu. Zwjetša běchu to pady njelegalneho zapućowanja do Němskeje a njelegalneho přebytka tudy. Přirunujo z lětom 2023 je so kwota w tutym prawniskim wobłuku wo 14,7 procentow zwyšiła. Potrjechene wosoby w zwisku z tutymi přeńdźenjemi přichadźachu wosebje ze Syriskeje (7 500), z Ukrainy (1 715), Afghanistana (1 099) a Turkowskeje (1 085). Wobdźěłanje tutych přeńdźenjow ležeše hłownje w rukomaj zwjazkoweje policije.
Zaso wjace wotprawjenjow
Berlin (dpa/SN). Ličba registrowanych wotprawjenjow po wšěm swěće je najwyši staw minjenych dźesać lět docpěła. Loni su w 15 krajach wjace hač 1 500 wotprawjenjow zličili, organizacija Amnesty International zdźěla. Najwjace smjertnych wusudow přesadźa w Chinje, Sawdi-Arabskej, Iranje, Iraku a w Jemenje. Amnesty International złožuje so na oficialne ličby. Dokładna ličba eksekucijow njeje znata.
Köpping k dnjej Romow
Drježdźany (dpa/SN). Składnostnje dźensnišeho mjezynarodneho dnja Romow je sakska ministerka za integraciju Petra Köpping (SPD) bohatu kulturu Romow hódnoćiła a za akceptancu a runoprawosć wabiła. Ministerka na to skedźbni, zo je diskriminacije dla přeco hišće wjele Romam kubłanje, dźěło a bydlenje ćešo přistupne. Ćim wažniši je angažement sakskeje syće towarstwow přećiwo anticyganizmej. Zastupjerjo Romow a Serbow hižo wjele lět w mjeńšinowej radźe kooperuja.
Schwesig njebudźe šefina SPD
Sobudźěłaćerjo ratarskeho drustwa Hohenseeden w Saksko-Anhaltskej ...
China wobara so naprawam USA
Kritizuja młowojte financowanje
Ukrainjenjo nětko tež w Belgorodźe
Kiew/Belgorod (dpa/SN). Ukrainske wojerske jednotki njejsu po słowach prezidenta Wolodymyra Zelenskeho jenož wokoło Kurska w Ruskej wojersce aktiwne, ale nětko tež w susodnej kónčinje wokoło ruskeho Belgoroda. „Přewjedźemy aktiwne operacije w pomjeznej kónčinje njepřećela“, rjekny Zelenskyj wčera wječor w swojim widejowym poselstwje. Bě to prěnje oficialne wobkrućenje z jeho strony. „Wójna dyrbi so tam nawróćić, zwotkel je přišła.“ Ruska strona njeje tute informacije dotal wobkrućiła.
Po nadpadźe ukrainskich jednotkow na kónčinu južnje ruskeho Kurska spočatk awgusta by to druhi wuspěšny dyr přećiwo Ruskej był. Kaž hižo w Kursku dźe wo to, ukrainski teritorij škitać, Zelenskyj rjekny. Konkretnje mjenowaše wón pomjezne kónčiny Charkiw a Sumy. Wuraznje dźakowaše so Zelenskyj ukrainskim wojakam za jich zmužitosć.
Operacija w Kursku je w dalokej měrje zwrěšćiła. Ruske wójsko je ukrainske jednotki nimale dospołnje wućěriło a tójšto wukrajnych wojowarjow zajało.
Zamołwitosć komunow sylnić
Sakska přihotuje nowy plan za wuwiće kraja z wjac sobuskutkowanjom
Drježdźany (dpa/SN). Sakske knježerstwo chce w tutej wólbnej dobje nowy plan za wuwiće kraja (LEP) předpołožić a při tym komunam wjace sobuskutkowanja zmóžnjeć. „Tole ma so kaž čerwjena nitka přez cyły plan ćahnyć. Chcemy nowe móžnosće wotkrywać, město toho zo jim zadźěwamy. Z planom chcemy nowym idejam durje wotewrěć“, rjekny Regina Kraushaar (CDU), ministerka za infrastrukturu a krajne wuwiće powěsćerni dpa.
Předwidźany plan za wuwiće kraja je fachowe wobłuki přesahowacy cyłkowny koncept za přichod swobodneho stata. Wón wobsahuje strategije za wuwiće sydlišćow, za hospodarske spěchowanje, za škit přirody a wobswěta abo za wobchadnu infrastrukturu. Tež rozdźělenje płoninow za bydlenje, přemysło, ratarstwo abo wočerstwjenišća tam zapisaja.
