To a tamne (18.07.16)
Rój wosow je na koparskej hrě w Ekuadorje sudnikow, přihladowarjow kaž tež wobě mustwje wuhnał a tak partiju přetorhnył. Agresiwne wosy lećachu wčera po stadionje přistawneho města Guayaquil, kaž telewizijne wobrazy dokumentuja. Spočatnje ćěkaše sudnik na kromje hrajnišća a biješe wokoło so. Jemu slědowachu koparjo, hłowny sudnik a skónčnje přihladowarjo. Po dwěmaj hodźinomaj so wosy zminychu. Dalša hra po tym wotmě so bjez problemow.
Ze swojim ultralochkim lětadłom znje- zbožił a na dubje wisajo wostał je 91lětny muž we Wulkej Britaniskej. Senior wisaše wčera pjeć metrow wysoko na štomje pola Edenbridga na juhowuchodźe kraja. Wohnjowi wobornicy dyrbjachu lětadło zawěsćić, prjedy hač móžachu 91lětneho z rěblom wuchować a do chorownje dowjezć.
Sta čěłow wućahnyli
Rom (dpa/SN). Italska marina je cyłkownje 675 ćěłow z wraka ćěkanskeho čołma wućahnyła, kotryž bě so loni w aprylu w Srjedźnym morju podnurił. Jeničce 458 mortwych namakachu w nutřkownym dźělu łódźe, w kotrymž so poprawom twory składuja. Łódź su spočatk měsaca z dna morja zběhnyli. Bjezposrědnje po jeje podnurjenju 18. apryla 2015 běchu 170 ćěłow znosyli. Jenož 28 ćěkancow katastrofu přežiwi. Italski ministerski prezident Matteo Renzi bě tehdy připowědźił, zo chcył wrak zběhnyć dać, zo by wšemu swětej bědu ćěkancow pokazał.
AfD pyta wupuć z krizy
Berlin (dpa/SN). Prěni króć po dwěmaj měsacomaj je so zwjazkowe wjednistwo prawicarskopopulistiskeje AfD w Berlinje zešło, zo by interny bój wo móc w stronje skónčiło. Při tym dźe wo rozestajenje mjez předsydomaj Frauke Petry a Jörgom Meuthenom. Te bě po pačenju frakcije AfD w Badensko-württembergskim krajnym sejmje wudyriło. AfD by po najnowšich woprašowanjach dwanaće procentow ludźi do Němskeho zwjazkoweho sejma woliło.
Wuradźuja wo płaćiznje mloka
Poraženosć po nadpadźe w Francoskej
Paris (dpa/SN). Šok, poraženosć a žarowanje: Při nadpadźe w přistawnym měsće Nizza na francoskim narodnym swjatku je wčera wječor znajmjeńša 84 ludźi žiwjenje přisadźiło. Mjez woporami su tež dźěći. Tójšto ludźi so zrani. 18 z nich je přeco hišće w kritiskim stawje. Skućićel bě z nakładnym awtom z wulkej spěšnosću do ludźi jěł, kotřiž na sławnej pobrjóžnej Promenadźe des Anglais róčnicu francoskeje rewolucije swjećachu. Policija skućićela zatřěli. Jedna so wo 31lětneho Francozu tuneziskeho pochada. Wón njebě policiji dotal jako radikalny znaty, kaž medije rozprawjeja.
W Parisu je so dźensa rano wěstotny kabinet zešoł. Po tym chcyštaj so prezident François Hollande a ministerski prezident Manuel Valls do Nizzy podać. Hollande bě hižo wčera wječor připowědźił, zo wobstejacy wuwzaćny staw hladajo na nadpad dale podlěši.
Pokročujaz dialogom
Johnson drje njewitany
Madźarska Saksku podpěruje
Móža dokładnišo warnować
Berlin (dpa/SN). Němska wjedrarnja chce wotnětka nowy a lěpši warnowanski system wužiwać. Z nim móža tež mjeńše kónčiny, kaž gmejny a jednotliwe měšćanske dźěle, před njewjedrami warnować, rozłoži Hans-Joachim Koppert, nawoda wotrjada za wjedrowe prognozy Němskeje wjedrarnje, wčera w Berlinje. Dotal su warnowanja před njewjedrami za 400 wulkowokrjesow wobličili. Nětko móža 10 000 gmejnow cyle dokładnje warnować a alarmować. Wot awgusta ma system tež jako app předležeć.
Přičiny, system warnowanja přestajić, běchu někotrežkuli mjerzanja: „Je so stajnje zaso stawało, zo smy cyły wokrjes před njewjedrom warnowali, štož bě tež prawje. Potrjecheny pak bě na kóncu jeničce dźěl kónčiny. Mnozy čujachu so wopak alarmowani“, Hans-Joachim Koppert rjekny. Přez pjeć lět je wjedrarnja nowy dokładniši system, takrjec meteorologiski zoom, wuwiwała. Warnować chcedźa nětko jenož te kónčiny, kotrež su woprawdźe potrjechene. To płaći tež w zymje za sněh.
To a tamne (15.07.16)
Mjedwjedź je so do awta zamknył, a to w małoměstačku njedaloko Denvera w USA. W interneće wozjewjeny widejo pokazuje, kak policisća zwěrjo kedźbliwje z kófroweho ruma na swobodu pušća. Njeje ani tak wulki. Přiwšěm je cyłe awto zapusćił. Samo wodźidło je rozkusane. Wobsedźerka awta chcyše poprawom na dźěło jěć, nětko pak dyrbi najprjedy škody wotstronić. „W awće smjerdźi hórje hač za mokrym psom“, wona praji.
Nic bjez mojeje tobołki! Nimale dwě třećinje žonow Němskej – 59 procentow – bydlenje tak derje kaž ženje bjez ručneje tobołki njewopušća. To je woprašowanje apotekoweho portala wunjesło. Hišće wjace, 72 proc., ma wobsah tobołki za priwatny a druhim napřećo za „absolutnje tabu“. Njezadźiwa tuž, zo by 47 proc. žonow emocionalnje jara trjechiło, by-li so tobołka zhubiła.
Přez morjo ćěkać je strašne
Berlin (dpa/K/SN). Ćěkajo do noweje domizny je lětsa po cyłym swěće hižo wjac hač 3 600 ludźi žiwjenje přisadźiło. Mjezynarodna organizacija za migraciju zwěsća za prěnje poł lěta znajmjeńša 3 694 mortwych abo zhubjenych. Porno prěnjemu połlětu 2015 je to přirost wo 18 procentow. Najstrašnišo je přez Srjedźne morjo ćěkać. Tam zatepi so lětsa hižo wjac hač 2 900 ludźi.
Wotum njedowěry přetrała
Mainz (dpa/SN). Porynsko-pfalcska ministerska prezidentka Malu Dreyer je wotum njedowěry opoziciskeje CDU w krajnym sejmje zwrěšćeneje předanje lětanišća Hahn dla přetrała. Politikarka SPD dósta dźensa 52 hłosow. Runje telko hłosow ma tamniša koalicija SPD, FDP a Zelenych. Opozicija bě sej wotum njedowěry žadała, po tym zo bu znate, zo njebudźe lětanišćo dubioznemu chinskemu inwestorej předate. Tón bě falšowane bankowe dokumenty předpołožił. Nimo toho njebě dorěčanu pjenježnu sumu za lětanišćo přepokazał.
Obama sćele wojakow
