Na jězbu z balonom wokoło zemje je so ruski dyrdomdejnik Fjodor Konjuchow podał. 65lětny startowaše dźensa rano w zapadoawstralskim Northamje, 100 kilometrow sewjerowuchodnje přistawneho města Perth. Konjuchow chce rekord Američana Steva Fosseta přewinyć, kiž bě zemsku kulu lěta 2002 w běhu 13 dnjow wobkružił, a planuje cyłkownu čaru­ 33 000 kilometrow.

Najwjetši orchester swěta zetka so minjeny kónc tydźenja w Frankfurće nad Mohanom, hdźež je zhromadnje hudźił. Němski institut za rekordy je dokładnje 7 548 hudźbnikow zličił a tak informaciju zarjadowarja wobkrućił. Nětko chcedźa hoberski­ orchester do knihi „Swětowe rekordy­ w Němskej“ kaž tež do Guinnessoweje knihi rekordow zapisać. Dotal najwjetši orchester swěta bě lěta 2013 w awstralskim měsće Brisbane ze 7 224 hudźbnikami hrał.

Brüssel (dpa/K/SN). Financni ministrojo krajow z eurom rěča dźensa w belgiskej stolicy Brüsselu wo sćěhach brexita. Je to prěnje jich zetkanje po woprašowanju luda we Wulkej Britaniskej. Nimo toho zaběraja­ so z wuwićom w Portugalskej a Irskej po skónčenju pomocnych programow za tutej krajej. Rozsudy wo přichodnych kročelach su wšak hakle jutře na schadźowanju financnych ministrow statow EU wočakować.

Gauck do Chile wotlećał

Berlin (dpa/SN). Zwjazkowy prezident Joachim Gauck je dźensa na wopyt do Chile a Uruguayja w Južnej Americe wotlećał. W chilskej stolicy Santiagu wočakuja jeho jutře statna prezidentka Michelle Bachelet a dalši zastupnicy stata. W rozmołwach chcedźa aktualne politiske a hospodarske prašenja runje tak wobjednawać kaž złóstnistwa za čas wojerskeje diktatury wot 1973 do 1990.

Lindner: AfD wobkedźbować

Generalna sekretarka SPD Katarina Barley je dźensa zhromadnje z Ansgarom Dittmarom, předsydu zwjazka homoseksualnych w SPD, před stronskej centralu w Berlinje chorhoj z tučelowymi barbami na sćežor sćahnyła. Je to dźěl akcije SPD pod hesłom „Žanu­ móc homofobnym – integracija za wšěch“. Foto: dpa/Wolfram Kastl

Berlin (dpa/K/SN). Njedźiwajcy njesnadnych diferencow mjez jednotliwymi wobdźělenymi stronami widźi zwjazkowa kanclerka Angela Merkel (CDU) wulku koaliciju dale na zhromadnym kursu. „Wšitke trěbne wobzamknjenja su zhromadny skutk“, rjekny wona njedźelu w lětnim interviewje telewizije ZDF nastupajo wšelakore měnjenja mjez uniju a SPD. Wadźeńcu ze šefom CSU Horstom Seehoferom politiki napřećo ćěkancam dla ma kanclerka za skónčenu. Zo Wulka Britaniska wotum wjetšiny za wotchad z EU zwoprawdźi, wo tym je Merkel přeswědčena. „Zaběram so z woprawdźitosću a wuchadźam tuž kruće z toho, zo próstwu wo wustup zapodadźa“. K tomu drje dóńdźe pak hakle potom, hdyž změja noweho premiera.