To a tamne (16.01.20)
Za kompjuterom na čas zabył a k tomu hišće alarm zawinił je dźewjećlětny wopytowar wobchoda za elektroniku w Saarbrückenje. Hólc bě sej při kompjuteru hrajkał. Jako přistajeny po swjatoku swěcu hasny a alarmowy system zapiny, wudyri nadobo alarm. Hakle nětko jemu napadny, zo je hišće něchtó we wobchodźe.
Nuznik za psy maja wot najnowšeho na Helsinkskim lětanišću. Wobhospodarjer lětanišća Finavia je dwaj tajkej zarjadował. Tak reaguja na naprašowanja mnohich pasažěrow, hdźe móhli psy swoju nuzu wotbyć. „Wobłuki, w kotrychž móža štyrinohače na nuznik hić, su na sewjeroeuropskich lětanišćach hišće jara rědke“, rěčnica zdźěli. Přiwšěm njeje myslička cyle nowa: W Americe su tajke městnosće samo předpisane, zo móhli serwisowe psy pasažěrow, na přikład tajke, kotrež slepych přewodźeja, na nuznik hić.
To a tamne (15.01.20)
Prědowanje do fitnesoweho studija wusyłała je cyrkwinska wosada mylnje něšto dnjow w sewjerorynsko-westfalskim Solingenje. Mikrofonaj duchowneho a sportoweho trenarja w susodnym studiju běštej na samsnu frekwencu nastajenej. Ludźo w studiju so tuž njemało dźiwachu, jako słyšachu přez wótřerěčaki dźěle prědowanja. Wosada je problem mjeztym rozrisała a frekwencu změniła.
120 kilometrow před policiju ćěkał je w Bayerskej 60lětny smalak z Berlina. Policisća chcychu jeho awto na awtodróze A 92 pola Mnichowskeho lětanišća kontrolować. Muž pak spyta ćeknyć. Při tym jědźeše zdźěla do wopačneho směra – a to ze 180 km/h. Pola Wörtha zrazy do policajskeho awta. Wón njeměješe žanu jězbnu dowolnosć, a awto njebě zawěsćene. Nimo toho předležeše wukaz zajeća přećiwo mužej.
To a tamne (14.01.20)
Lětadło-knihownja steji wot najnowšeho w sobu najstrašnišej štwórći stolicy Mexika-města. Tamniše zarjadnistwo bě 20 lět staru wusłuženu Boeing 737 kupiło a přetwarić dało. Hłowny zaměr je, ludźom a wosebje dźěćom knihi a elektroniske medije zbližić a tak kriminalitu pomjeńšić. W lětadle maja nimo knihow tež e-booki, słuchoknihi a kompjutery. Internet na naměsće, hdźež Boeing 737 steji, móža darmotnje wužiwać.
29 lět bjez jězbneje dowolnosće z awtom jězdźił je muž w Radebergu. Wukopało je so to nětko po wobchadnym njezbožu. Přewulkeje spěšnosće dla bě muž z awtom z dróhi zajěł, do štoma prasnył a so snadnje zranił. Jězbnu dowolnosć wšak policistam pokazać njemóžeše, tu běchu jemu hižo 1991 jězdźenja pod wliwom alkohola dla wotewzali. Wo nowu so wón ženje prócował njebě.
To a tamne (13.01.20)
Na awtodróze pěši po puću był je 27lětny w Bayerskej, z čimž zawini zasadźenje policije. Jako jeho wobsadka policajskeho awta njedaloko Mnichowa wuhlada a zadźerža, muž zastojnikam rozłoži, zo chce do swojeje pólskeje domizny běžeć. Po informacijach policije bě wón chětro wopity. Policisća wzachu jeho sobu hač k přichodnemu wotpočnišću, hdźež tež jeho awto steješe. Přewodnik Polaka tam hižo na njeho čakaše.
Ćeknjena kokoš je so w sewjerobraniborskim Reckezinje njedaloko Perleberga wo skóržbu postarała. 66lětnemu plahowarjej kokošow běchu wjacore twochnyli. Jako muž na ležownosći susodki jednu z nich popadny, njeměješe 52lětna žona žane zrozumjenje za to a je muža ranjenja domjaceho měra dla wobskoržiła. „Tajki pad dotal hišće njemějachmy“, w policajskej rozprawje rěka.
To a tamne (10.01.20)
Mjeno swojeho města změnić chcedźa wobydlerjo kanadiskeho sydlišća Asbestos a francoskorěčnej prowincy Quebec. Wčera su tam wobydlerjo z čłonami měšćanskeje rady prěnje informaciske zarjadowanje přewjedli. Nowe mjeno hišće nimaja. Přezjedni pak sej su, zo mjeno woneje jědojteje twarskeje maćizny asbest nahladnosći města škodźi a inwesticijam zadźěwa. W podkopkach njedaloko města běchu asbest wjele lět wudobywali.
Wot kralowskeje swójby dźělenej stej wotnětka wóskowej postawje britiskeho princa Harryja a jeho mandźelskeje Meghan w Londonskim kabineće wóskowych figurow „Madame Tussauds“. Mějićeljo kabineta reaguja tak na jeju připowědźenje, zo chcetaj so přichodnje kralowskich winowatosćow wzdać a „normalne“ žiwjenje wjesć. Poprawom wšak kralowska swójba hromadźe steji.
To a tamne (09.01.20)
Kóčka z mjenom Vlekkie je so we wačokowym centrumje Amsterdamskeho lětanišća Schiphol zhubiła. Tež po dny trajacym pytanju njejsu ju dotal namakali. „To je hrozne“, rjekny wobsedźerka nowinarjam, po tym zo běchu jej dowolili wosobinsce w hewak zawrjenym arealu lětanišća za swojim lubuškom pytać. Transportne sudobjo bě so při překładowanju skóncowało, a tak móžeše kóčka twochnyć.
Štyrilětna holca je w porynsko-pfalcskim Ludwigshafenje nuzowe čisło woliła, po tym zo bě so jeje mać doma zwjezła. Holčka bě wčera rano čisło „112“ woliło. Dźakowano jeje dokładnym informacijam móžachu pomocnicy 31lětnu mać spěšnje namakać a jej pomhać. Žona měješe problemy z wobtokom kreje, bě pak spěšnje zaso na nohomaj. Najebać to dowjezechu ju do chorownje. Štyrilětna smědźeše z comakom w hubje sobu jěć.
To a tamne (08.01.20)
Znjezboženeho z awta wuswobodźił je New-Yorkski guwerner Andrew Cuomo. Guwerner bě ze šoferom w New Yorku na měšćanskej awtodróze po puću, jako wuhlada na napřećiwnej jězdni powróćeny transporter. 62lětny Coumo wulěze a šofera wuswobodźi. Njebě to prěni króć, zo Cuomo njesebičnje pomha. Tak bě hižo defektne awta wotwlekł a tajke z hłubokeho sněha wućahnył.
Policiju z limonadu wobšudźić chcył je šofer awta w Hessenskej, jako kontrolowaše jeho na drogi. Po tym zo bě test potu na čole muža pozitiwny, přizwolichu jemu zastojnicy po wšelakich wurěčach dalšemu testej na zakładźe urina. Njemało pak so dźiwachu, zo měješe pozdatny urin wuhlikowu kisalinu, zo bě zymny a zo za limonadu wonješe. Muž skónčnje přizna, zo je limonadu do nopaška plunył, kotruž bě do toho pił.
To a tamne (07.01.20)
Čłowječi nop namakali su wobydlerjo domu w delnjosakskim Lüneburgu, jako w zahrodce dźěłachu. Po informacijach policije jedna so z wulkej wěstotu wo čłowječe powostanki. Prawdźepodobnje bě nop hižo dlěši čas w zemi ležał. Ležownosć swójby je w bjezposrědnim susodstwje kěrchowa. Tón bě něhdy wjetši, tak zo sahaše snano hač na ležownosć swójby. To nětko pruwuja.
W nocy k tankowni wulećała je sej wowca w hessenskim Rüsselsheimje. Nahrawanja wěstotneje kamery pokazuja, kak wustróžany muž před njej do předawarnje tankownje ćeknje. Skoćo pak to njemyleše: Wćipne wone tankownju inspicěrowaše a přihladowaše dalšemu kupcej při tankowanju. Wowčer, kiž bě připadnje na městnje, wowcu popadny. Dowjezechu ju do zwěrjatownje, hdźež nětko na swojeho wobsedźerja čaka.
To a tamne (06.01.20)
Wo titul swětoweho mištra w mjetanju hodownych štomow su so wčera w pfalcskim Weidenthalu wubědźowali. Wobdźělnicy su w třoch disciplinach nastupili: Tak dyrbjachu 1,50 metrow wysoki štom kaž hlebiju mjetać, jón kaž hamor wjerhać a přez wysokoskokowu łatu ćisnyć. Sta ludźi spektaklej přihladowachu. Městny koparski klub Wackerm je zarjadowanje we wsy z 2 000 wobydlerjemi mjeztym 14. króć zarjadował.
Milinu nadróžneje lampy je šofer nakładneho awta wužiwał, zo móhł w swojej kabinje telewiziju hladać. Policistam napadny wčera rano na přemysłownišću w durinskim Nohra kabl, kotryž wjedźeše wot sćežora lampy do kabiny Lkw-ja. 39lětny šofer dyrbješe chcyjo nochcyjo přiznać, zo bě sej milinu přiswojił. Za to trěbne techniske nastroje měješe w awće. Na njeho wšak čaka nětko chłostanje.
To a tamne (03.01.20)
Přepitk 2 020 dolarow dósta pinčnica w Los Angelesu składnostnje noweho lěta wot bywšeho spěwarja skupiny „New Kids on the Block“ Donnieja Wahlberga. Tón bě zhromadnje ze swojej přećelku w hosćencu był a so spontanje rozsudźił, pinčnicu překwapić. A ta bě jara zbožowna. Wšako móže jako samostejaca mać přidatne pjenjezy derje trjebać.
Nowe lěto dwanaće hodźin dočasa swjećili su wobydlerjo małeje španiskeje wsy Villar. W móličkej gmejnje zapadnje stolicy Madrida bydli jenož hišće 30 ludźi, wulki dźěl je starši hač 80 lět. Seniorojo nochcedźa hač do połnocy čakać a swjeća tuž přechod do noweho lěta hižo připołdnju. Dočasny silwester je we wsy hižo z tradiciju, kotruž pěstuja wot lěta 2004. Gmejna bědźi so runja druhim z demografiskim wuwićom: Młodźi ludźo su do městow wotešli.
