To a tamne (15.11.19)
Zastojnstwo społnomócnjeneho za wosamoćenych njebudźe w Berlinje zarjadowane. To je Dom zapósłancow wčera wobzamknył. Frakcija CDU bě sej społnomócnjeneho žadała, dokelž je runje we wulkoměstach kaž Berlinje dźeń a wjace ludźi wosamoćenych, mjeztym pječa kóždy dźesaty. Berlin je město z najwjace single-domjacnosćemi w Němskej.
Z wubědźowanskim awtom formule 2 bě muž na čěskej awtodróze po puću. Tójšto šoferow so njemało dźiwaše, jako čerwjeny wóz w srjedźnej Čěskej nimo smaleše. To pak změje sćěhi. Policija je 45lětneho šofera mjeztym wuslědźiła. Dokelž nima 600 PS sylne awto dowolnosć, po normalnych dróhach jězdźić, dyrbi jeho wodźer 400 eurow pokuty płaćić a jězbnu dowolnosć na lěto wotedać. Jězdźidło nima ani čisłowu tafličku, swětłomjetakaj a směrowe lampki.
To a tamne (14.11.19)
Njewšědny přirodny fenomen je hobbyjowy fotograf na finskej kupje Hailuoto njedaloko města Oulu wobkedźbował. Wuchodźujo so po přibrjoze wuhlada wón njesměrnje wjele lodźanych kulow. Najwjetša bě tak wulka kaž koparski bul. Muž namakanku fotografowaše a da wobraz do interneta. Na to přizjewi so finski meteorologiski institut. Přirodne wuměnjenja nastaću skurilnych objektow polěkuja: płony přibrjoh, temperatury wokoło nule a wobstajna zymna woda.
Šěsć tydźenjow do hód su wuchodnje Drježdźan dohodownu sezonu zahajili: W parku Pillnitzskeho hrodu wotnětka kóždy wječor wjace hač milion lampičkow zaswěćeja. Hač do 5. januara je „Christmas Garden“ přistupny. Po dwaj kilometraj dołhim puću su 25 swěcowych instalacijow natwarili.
To a tamne (13.11.19)
Wulkeje myše dla je pasažěrske lětadło w Indiskej z dwanaćehodźinskim zapozdźenjom wotlećeć móhło. Poprawom chcyše mašina předewzaća Air-India njedźelu rano južny Hyderabad do směra na Visakhapatnam na wuchodźe kraja wopušćić, jako w kabinje hrymzaka wuhladachu. Pasažěrojo dyrbjachu na lětanišću čakać, doniž njeběchu sobudźěłaćerjo myš dosahnyli. Hakle po desinfekciji móžeše mašina wotlećeć. Myše su strašne, hdyž kable lětadła nakusaja.
Z wosobowym awtom do widejoteki zrazył je muž w schleswigsko-holsteinskim Itzehoe. Do toho bě 41lětny prawdźepodobnje kontrolu nad wodźidłom zhubił. Ćežko zranjeneho dowjezechu jeho do chorownje, tež předawarku widejoteki. Na fotach je widźeć, kak awto wosrjedź wobchoda steji. Policija nětko přičiny njezboža přepytuje.
To a tamne (12.11.19)
We wopačnym měsće plakaty lěpiło je wabjenske předewzaće. Nětko wabitej dwaj hoberskej plakataj w hessenskim Fürthu za předstajenje Moskowskeho baleta w měšćanskej hali, byrnjež tam scyła žanu tajku njeměli. Měnjeny bě Fürth pola Nürnberga. „To je čłowjeski zmylk, kotryž nětko skorigujemy“, zdźěli zamołwita wabjenska agentura. W měsće so tomu směja, wšako su tež w radnicy zwučeni, zo dóstawaja stajnje zaso póštu, kotraž słuša poprawom do Fürtha w Bayerskej.
Sydom kilogramow skaženeje a smjerdźateje kruwjaceje kože su cłownicy na Düsseldorfskim lětanišću sćazali. Smjerdźaty kófer bě zastojnikam hižo zahe napadnył. Pućowaca žona rjekny, zo jedna so wo delikatesu z afriskeho Kameruna, kotruž chce jeje swójba jěsć. Z toho pak ničo njebudźe: Cłownicy plastowej měškaj sćazachu, a kožu nětko zniča.
To a tamne (11.11.19)
Trójce pjaneho za wodźidłom lepili su policisća 68lětneho muža w Neubrandenburgu, a to w běhu štyrjoch dnjow. Kónc tydźenja měješe wón znowa tři promile alkohola w kreji. Jězbnu dowolnosć su zastojnicy jemu hižo minjeny štwórtk wzali, po tym zo jeho z 1,8 promilemi zadźeržachu. Dźeń do toho běchu pěšcy chabłacemu mužej klučiki awta wotewzali a policiju wołali, jako chcyše tón z 1,7 promilemi wotjěć.
Cyły cigaretowy awtomat pokradnyli su paduši w bayerskim Hofje minjeny pjatk w hosćencu, hdźež je samsny čas něhdźe 60 ludźi jědło a piło. Wjacori skućićeljo awtomat z chódby lokala wotnjesechu, bjeztoho zo by to někomu napadnyło. Škodu akcije trochuje policija na dohromady něhdźe 2 000 eurow.
To a tamne (08.11.19)
Muž, kiž měješe pječa mječ při sebi, je w braniborskim Beelitzu zasadźenje policije zawinił. Sobudźěłaćer dožiwjenskeho a hromakoweho zawoda bě muža z mječom na chribjeće widźał a policiju wołał. Pozdatny mječ wukopa so na zbožo jako předešćnik, kiž kaž mječ samurajow wupadaše. Policisća 31lětneho muža napominachu, přichodnje bjez wěcow do zjawnosće hić, kotrež su bróni podobne.
Tójšto njerjada su gondoljerojo we Venedigu z rěki Canale Grande zwućahali. Při tradicionalnym nócnym nurjenju namakachu mjez druhim prochsrěbak, wulku lampu a samo karu za transport wotpadkow. Bě to šesta akcija toho razu, a při dotalnych nazběrachu dohromady 2,5 tonow njerjada. Akciju přewjeduja stajnje w nocy, dokelž je wodnjo přewjele wobchada na rěce. Venedig ćerpi pod masowym turizmom.
To a tamne (07.11.19)
Hněwny roznošowar pizzy je ju žonje w delnjosakskim Bückeburgu do mjezwoča stłóčił. Do toho bě wona pječwo při durjach wotpokazała, dokelž bě po jeje měnjenju předołho na nju čakać dyrbjała. Na to bě roznošowar pizzu z tyzy wzał a ju skazarce chětro njegalantnje do mjezwoča stłóčił. Wona je roznošowarja zranjenja ćěła dla policiji přizjewiła.
Z wosom dulemi złota na nohomaj su ruscy cłownicy młodu žonu na lětanišću w ruskim Wladiwostoku lepili. Wona chcyše złoto do Chiny pašować a bě małe dule z lěpjatym paskom na nohomaj přilěpiła. Zastojnikam žona při kontroli napadny, dokelž bě nerwozna a spłóšiwa. Nimale dwaj kilogramaj złota stej po informacijach cła wjace hač 71 000 eurow hódnej. Žonje, kotraž bě w nadawku Chinjanki po puću, hrozy nětko sydom lět jastwa.
To a tamne (06.11.19)
Bjez wědźenja staršeju je so dwanaćelětny Würzburgčan z ćahom na puć k přećelej do Nürnberga nastajił. Sto kilometrow do cila pak jeho policisća zadźeržachu. Železnicarce bě samlutki jěducy pachoł w spěšniku ICE napadnył, kiž měješe nimo toho jeničce šulersku jězdźenku poruhrskeje kónčiny při sebi. Staršej wo tym ničo njewědźeštaj. Šula njeje jeju informowała, zo njebě hólc scyła na wučbu přišoł.
Ze schowanej minikameru je 32lětny w Engelskirchenje pola Kölna spytał jězbne pruwowanje zmištrować. Njedaloko twarjenja, w kotrymž pruwowanje bě, móžeštaj kumpanaj přez mobilnoškričkowy zwisk wšitke prašenja sobu čitać a pruwowancej přez małe słuchatko we wuchu prawe wotmołwy přišeptnyć. Pospyt pak so nimokuli. Pruwowar to pytny a zawoła policiju, kotraž wšitkich třoch zaja a techniku sćaza.
To a tamne (05.11.19)
Zhubjeny třilětny hólčk je w šwabskim Bad Wörishofenje zasadźenje policije zawinił. 16lětny bratr měješe njedźelu popołdnju na njeho kedźbować, je pak sej wusnył. Po tym zo bě zaso wotućił, njemóžeše třilětneho po cyłym domje namakać. Prjedy hač zawołana policija dojědźe, młodostny bratřika tola wuhlada, schowaneho pod poslešćom.
Pokradnjeny pomnik Göttingenskeho dźiwadźelnika Heinza Erhardta su dźensa zaso stajili. Tři tydźenje bě pomnik woblubowaneho komikarja zhubjeny, doniž njeje pěšk wobškodźenu stelu na štom zlehnjenu našoł. Je to po wšej Němskej jenički pomnik dźiwadźelnika, kiž bě w Göttingenje wosom filmow nahrawał. Lěta 2003 postajeny pomnik pokazuje, kak Erhardt (1909–1979) w róli policista wobchad rjaduje. Stela je nětko zesylnjena, zo njemóža ju wjace pokradnyć.
To a tamne (04.11.19)
Najwjetšu rybjacu soljanku swěta su w Heringsdorfje na kupje Usedom nawarili. Pod dohladom zastupnika instituta rekordow Němskeje je powołanski kuchar André Domke ze sto kilogramow ryby kaž tež z wulkeho mnóstwa papriki, tomatow, kórkow, cyble a korjeninow cyłkownje 268 litrow rybjaceje soljanki zhotowił. Tak bě wuměnjenje instituta spjelnjene, kotryž žadaše sej znajmjeńša 250 litrow. Dźěl poliwki su hnydom předali, zbytk su zawarili.
Jeničce spódnje cholowy a košlu woblečeny je 55lětny šofer wosoboweho awta na awtodróze 65 koleso wuměnił. Dokelž chětro za alkoholom wonješe, dyrbješe wón „duć“ a měješe wjace hač dwaj promilej. Zastojnicy zapodachu skóržbu wopiłstwa za wodźidłom dla. Hač měješe muž alkohola dla tak mało drasty na sebi, njemóžeše policija rjec.
