To a tamne (27.02.20)
Po puću k sterilizaciji ćeknył je muski pawian w awstralskim Sydneyju. Wón móžeše zhromadnje ze žónskimaj wopicomaj ćeknyć, po tym zo bě so jemu poradźiło zamk duri wočinić. Hakle po dwěmaj hodźinomaj jeho pomocnicy popadnychu. Mjeztym je pawian operowany a so wočerstwja. Žónce běštej jako emocionalna pomoc sobu. Wopicy su dźěl slědźenskeho projekta.
Zo jeho zakaz jězdźenja njestara, je 84lětny muž Augsburgskej policiji nazornje pokazał. Po tym zo bě sudnistwo jemu jězbnu dowolnosć sćazało, sydny so wón do awta a jědźeše na policajsku stražu. Tam žadaše sej swoju jězbnu dowolnosć. Zastojnicy drje jemu tam tež klučik awta wotewzachu, štož pak njepomhaše: Starc jědźeše z taksijom po rezerwowy klučik a z awtom skradźu wotjědźe, kotrež pola policije steješe. Zastojnicy tuž 84lětneho wopytachu a jemu tež druhi klučik wotewzachu.
To a tamne (26.02.20)
Policistam dźěło wolóžił je paduch w Bielefeldźe. Po tym zo bě so do běrowoweho kompleksa zadobył, je wón w jednej z rumnosćow swój wupokaz ležo wostajił. Do toho bě škleńcu duri rozbił a stwy za elektroniskimi nastrojemi přepytał. Po tym zo bě sobudźěłaćer wěstotneje firmy policiju wołał, namakachu zastojnicy wjacore nastroje, kotrež bě sej paduch hižo za transport spřihotował. Na muža čaka nětko chłostanske jednanje.
Nic bjez wowki, to drje bě sej młody porik rjekł a je swoje wěrowanje do chorownje přepołožił. 76lětna wowka njewjesty bě krótkodobnje schorjeła a dyrbješe so stacionarnje lěkować dać. Porik je tuž zmandźelenje krótkodobnje ze stawnistwa w hornjobayerskim Altöttingenje do kapałki wokrjesneje chorownje přepołožić dał. „To tu hišće njemějachmy“, zwurazni rěčnik domu po hnujacym wěrowanju.
To a tamne (25.02.20)
Jeničce šćowkanje zhubjeneho dakla bě słyšeć, jako pomocnicy wčera na łuce w Drježdźanach za nim pytachu. Tón wšak bě chětro zadwělowany, po tym zo bě do liščeje jamy zalězł a tam tčacy wostał. Wobsedźer wołaše wohnjowu woboru, kotraž pak njemóžeše 13 lět stareho psa lokalizować. 17 wohnjowych wobornikow je dakla hakle po połdra hodźinje namakało. Twarski předewzaćel jich z minibagrom podpěrowaše.
Křiwu wěžu kaž w Pisy maja wot njedźele w Dallasu w staće USA Texasu, byrnjež bjez wotpohlada. Tam bě so rozbuchnjenje jědnaćeposchodoweho twarjenja nimokuliło. Twarjenje drje so zwjeze, srjedźny dźěl pak je stejo wostał a so jenož nachilił. Nětko zbudźa foto křiweje wěže w interneće wulku kedźbnosć. Hinak hač w Pisy pak su jeje hodźiny ličene: Wot wčerawšeho dom z bagrom torhaja.
To a tamne (24.02.20)
Sobujěducy ptačk w Mnichowskej podzemskej železnicy je w interneće tójšto originelnych komentarow zbudźił. We wideju je widźeć, kak mały kakadu na kolenje swojeho wobsedźerja sedźo w podzemskej sobu jědźe. Něchtó z komentatorow měni: „Nadźijomnje ma ptačk pjeluški.“ Dalšim je kakadu dopokaz, zo so „kontrolerojo dźeń a lěpje tarnuja“, zo bychu čornojězdźerjow lepili.
Žortnje myslene přispomnjenje prezidenta awstriskeje hospodarskeje komory Haralda Mahrera na Wienskim Operowym balu je kritiku komunalnych politikarjow zbudźił. Žurnalistam bě Mahrer rjekł, zo pije w swojej wosobnej loži na balu „jenož mineralnu wodu, dokelž zlutniwje z čłonskimi přinoškami wobchadźa“. We Wienje su rozhorjeni, dokelž je Mahrer drohu ložu wotnajał, ze zjawnymi srědkami.
To a tamne (21.02.20)
Za čas dowola nad Sewjernym morjom 2012 bě tehdy 13lětna Paula blešu z powěsću do wody ćisnyła. Nětko wosom lět pozdźišo je ju wobydlerka kupy Langeoog namakała. Dźakowano socialnym medijam bu foto z powěsću 40 000 króć dale date, doniž tež Paulu z Badensko-Württembergskeje njedocpě. Kaž so wukopa, bě Paula blešu swój čas na samsnej kupje morju přepodała, hdźež bu namakana.
Miłe februarske temperatury su na tym wina, zo dźiwina w Berlinje nětko hižo wotuća. „Wjewjerčki, insekty kaž tež šupy k měrej njepřińdu“, rěka z tamnišeho wobswětoweho zarjada. Tež ptački w měsće hižo dwaj tydźenjej prjedy fifola hač hewak. Někotre samo hižo swoje hněžka přihotuja. Jeli nětko hišće raz mjerznje, móže to za dorost jara zlě wuńć. Wěste družiny zwěriny dźě su hač do měrca w zymskim sparje.
To a tamne (20.02.20)
Listowu wobalku pjenjez stej Šwicarce namakałoj, po tym zo běštej zawkaj za zahrodowe stólcy kupiłoj. Kuwert z 19 000 eurami tčeše mjez zawkomaj, do folije zapakowanymaj. Žonje zdźělištej namakanku policiji, a ta zwěsći, zo pochadźeja pjenjezy ze zawostajenstwa zemrěteje. Jeje potomnicy běchu zawkaj po wurumowanju chěže socialnej słužbje přewostajili. Dźowka zemrěteje přewostaji žonomaj nimale 3 000 eurow.
Na wšě dźesać bilionow eurow je dźěłowy zarjad šuli w Frechenje pola Kölna přepokazać chcył, zwjazkowy dźěłowy zarjad pak přepokazanku zadźerža. Poprawom měješe šula sto eurow dóstać, kotrež běchu jako pomoc na dobro šulerja za rjadownisku jězbu myslene. W tym zwisku bě drje k misnjenju dóšło. Kak je ze 100 na kóncu 10 000 000 000 000 nastać móhło, to nětko pruwuja.
To a tamne (19.02.20)
Přewidny to manewer: Mlóčnoškleńčane durje kamora přeradźichu w Mecklenburgsko-Předpomorskej muža, za kotrymž policija pytaše. 29lětny bě sej do kamora wućeknył, jako zastojnicy bydlenje přepytachu. Woni kontury podhladneho za škleńcu widźachu a jeho zajachu. Sudnistwo bě muža k tysac euram pokuty zasudźiło, kotrež pak njeje zapłaćił. Chował bě so wón pola znateje w Parchimje. Nětko w jastwje sedźi.
Žonam wospjet skradźu włosy wottřihał je dotal njeznaty w tramwajkach čěskeje stolicy Prahi. Dotal su policiji pjeć tajkich padow přizjewili. Zastojnicy z toho wuchadźeja, zo je dalšich padow a proša žony so přizjewić. Jedna z nich rozprawješe, zo bě w tramwajce po puću, jako naraz pytny, zo so něchtó jeje włosow dótka. Na to wona zwěsći, zo jej plećena wopuška pobrachuje.
To a tamne (18.02.20)
Dale njerozrisany je problem krokodila z wobruču wokoło šije. Awstralski fachowc za zwěrjata Matt Wright přebywaše ze swojimi kolegami podarmo na kupje Sulawesi. Tam chcychu krokodila z pomocu paslow popadnyć a wobruč wotstronić. Reptil pak so paslow wohlada. Mjeztym su so pomocnicy zaso do Awstralskeje wróćili. W meji chcedźa znowa spytać krokodilej pomhać.
Najwjetšu fosilnu nopawu swěta wustajeja wot dźensnišeho w hornjofrankskim Bambergu. Jeje pancer je 140 centimetrow dołhi, normalne wšak je 30 centimetrow, tamniši přirodowědny muzej zdźěla. Fosil běchu sobudźěłaćerjo lěta 2018 při wurywanjach w skale namakali. Dokelž bě skelet při transporće rozpadnył, su fachowcy w tysac hodźin trajacym dźěle 154 milionow lět staru nopawu zaso hromadu sadźili.
To a tamne (17.02.20)
Parada połsta daklow je wčera w Berlinskej měšćanskej štwórći Neukölln wulku kedźbnosć zbudźiła. Parada bě dźěl kónctydźenskich zarjadowanjow, kotrež stejachu cyle w znamjenju dakla. Z bayerskeho Passauwa běchu zamołwići tamnišeho dakloweho muzeja přichwatali. Winicar z Porynskohessenskeje poskićowaše „daklowe wino“. K jědźi mějachu bracle a pomfritki w formje daklow.
Wóń parfima je wopiteho a před policiju ćěkaceho šofera wosoboweho awta přeradźiła. 26lětny ze Speyera bě zastojnikam napadnył, dokelž bě přespěšnje a stajnje zaso bjez swěcy po puću. Jako jeho zastojnicy dosćahnychu, muž z awta wulěze a ćekny. Wóń parfima, kotraž tež w awće knježeše, pak wjedźeše zastojnikow za kerk, za kotrymž so muž chowaše. Test alkohola w jeho kreji wunjese 1,38 promilow.
To a tamne (14.02.20)
Z wotmachom do kerčiny susoda: Při wróćostorkanju z ležownosće je žona we westfalskim Ahlenje ze swojim awtom do kerčiny zajěła a bě krótki čas w awće zajata. Wohnjowi wobornicy dyrbjachu motorowu piłu zasadźić, zo bychu ju wuswobodźili. Čehodla bě žona kontrolu nad awtom zhubiła a na tamny bok dróhi jěła, njewědźa. Policija na to tuka, zo bě přesylnje na pedal płuna stupiła. Nichtó so njezrani.
Rozhłosowe studijo w tramwajce zarjadowali su w estiskej stolicy Tallinnje. Tam zjawnoprawniski rozhłós nětko wšědnje mjez 7 a 18 hodź. wusyła. Pasažěrojo móža přihladować, kak rozhłosownicy wšelake programy zestajeja a moderěruja. Akciju přewjedu składnostnje swětoweho dnja radija. Tak chcedźa na to skedźbnić, zo je radijo najbóle rozšěrjeny masowy medij na swěće.
