To a tamne (28.07.17)
Pasažěrow w nižozemskich železnicach přichodnje hižo z „damy a knježa“ njenarěča, ale jenož hišće z „pućowacy“. Železniska towaršnosć NS to připowědźa, dokelž chce, zo bychu so wšitcy „w ćahu jenak witani čuli“. Tež w stolicy Amsterdamje su wobzamknyli město dotalneho „česćene damy a knježa“ jenož hišće „lubi ludźo“, „lubi Amsterdamčenjo“ abo „lubi přitomni“ wužiwać.
Wulki prask a jaskrawy błysk stej wobydlerjow wjacorych štwórćow Berlina w nocy na štwórtk ze spara budźiłoj. Přičina bě krótkospjeće w milinarni, kotrež bě šup w 1 100 kilovoltowym transformatorje zawinił. Kak bě so zwěrjo do derje zawěsćeneho objekta energijoweho zastaraćela Vattenfall dóstało, njemóža sej rozjasnić. Šup přežiwi a ćekny.
To a tamne (27.07.17)
Tři dny přećiwo sebi tenis hrać budźetaj sportowcaj w delnjosakskim Twistringenje. Při tym chcetaj Christian Masurenko (49) a Dennis Heitmann (34) nowy swětowy rekord nastajić. Dźensa rano we wosmich staj hrać započałoj a chcetaj njedźelu wječor w šesćich, po 82 hodźinach, skónčić. Jenož někotre mjeńšiny chcetaj sej za jědź, spar a nuznik popřeć. Hra je tež přez livestream w interneće widźeć. Trenar, lěkarjo a fyzioterapeuća ekstremneju sportowcow přewodźeja. Energiju čerpać chcetaj wonaj z poprjancow, poliwki a nudlow. Přihladowarjo maja jeju přidatnje motiwować.
Z kijom za starych ludźi je 23lětny w Berlinje-Kreuzbergu 41lětneho muža přebił. Do toho bě sej pjenjezy wot njeho žadał. Jako so wón spjećowaše, so 23lětny z kijom do njeho da. Jako pěšcy na pomoc přińdźechu, so rubježnik bjez pjenjez zminy. Policisća jeho njedaloko městna njeskutka nańdźechu. A znowa je muž spytał kij zasadźić, zo by so zajeću wobarał – tónraz wšak bjez wuspěcha. Přećiwo njemu přepytuja nětko rubježnistwa dla.
To a tamne (26.07.17)
Dospołnje nimo kulił je so pospyt žony w Mnichowje, wosace hnězdo na balkonje bydlenja wotpalić. Po tym zo běchu so meble na balkonje zapalili, rozpřestrěchu so płomjenja w bydlenju a na balkon přichodneho poschoda, wohnjowa wobora zdźěli. Wobornicy woheń podusychu. Cyłkownu škodu trochuja na 50 000 eurow. Žona móžeše bydlenje hišće w prawym času wopušćić a so njezrani. Wosace hnězdo njejsu po wohenju hižo namakali, kaž rěkaše.
Štyrilětny je w badiskim Kehlu zasadźenje policije zawinował, po tym zo je chowanje hrał. Kaž policija zdźěli, bě so přiwuzny, kiž měješe na hólca kedźbować, přizjewił a zdźělił, zo je hólc tež po dokładnym pytanju zhubjeny. Na to policija za nim pytaše. Muž so w tym času hišće raz dokładnišo po domje rozhladowaše a namaka štyrilětneho – pod łožom.
To a tamne (25.07.17)
Swětowy kongres rumpodichow wotměwa so tuchwilu w danskej stolicy Kopenhagenje. Wčera ćehnješe 160 wobdźělnikow parady rumpodichow při přijomnych 20 stopnjach po měsće. Na kongresu wobjednawaja tež nowe wužadanja w zastojnstwje: Dźeń a mjenje dźěći mjenujcy do rumpodicha wěri. Santa-kongres zarjaduja wot lěta 1957. Wobdźělnicy su mjez druhim z Wulkeje Britaniskeje, Kanady, Němskeje a Hongkonga.
Zwada z něhdyšim pjasćowarjom je 52- lětneho wjacore zuby płaćiła. Muž bě so w čornolěsnym Unterkirnachu na tym postorčił, zo cuzy pos po jeho zahrodźe běha. Wopity wobsedźer zahrody psa wućěri a storči při tym na 40lětneho pjasćowarja. Tón jeho tak dyri, zo dyrbješe do chorownje. Tež něhdyši bojowy wojowar poćerpje zranjenja w mjezwoču. Policija přepytuje nětko přećiwo woběmaj.
To a tamne (24.07.17)
Wodowa trubka je w Bielefeldźe wulkozasadźenje policije zawiniła. Muž bě zastojnikam zdźělił, zo je runje dweju podhladneju z mašinskej třělbu typa Kalašnikow a kófrom do susodneho domu zastupić widźał. Policija na to z wulkej jednotku přijědźe a mužow w bydlenju překwapi: Jeju „mašinska třělba“ wukopa so jako wulka shisha. Rěčnik policije je zasadźenje hladajo na tuchwilne wěstotne połoženje přiwšěm zakitował.
Z ultralochkim lětadłom wokoło swěta: Šwicarski dyrdomdejnik Xavier Rosset poda so wčera na 400 dnjow trajacy lět. We wjacorych etapach chce wón 80 000 kilometrow zmištrować a 50 krajow wopytać. Hłownje chce kultury a ludźi zeznać a planet pod wšelakimi aspektami přeslědźić, kaž Rosset nowinarjam rjekny. Lětacy nastroj waži 240 kilogramow a je hač do 157 km/h spěšny.
To a tamne (21.07.17)
Šćipata wóń horceje mašiny za rězanje železa je třoch paduchow přeradźiła. Policistam w Kölnje bě při kontroli awto z třomi chětro nerwoznymi mužemi napadnyło. Jedyn z nich bě dospołnje přepoćeny. Mjez jeho nohomaj ležachu baliki pjenjez. W awće bě nimo toho wšelki grat k zadobywanju. Po prěnich zwěsćenjach běchu mužojo w starobje 24 do 31 lět trezor wobchodniskeje rumnosće rozrězali a z njeho pjećcyfrowu sumu pjenjez spakosćili.
Z pjeć wukazami zajeća pytaneho muža je policija w Choćebuzu zajała, po tym zo běchu jeho w ćahu bjez jězdźenki lepili. Při kontroli personalijow so wukopa, zo statne rěčnistwa w Berlinje, Hamburgu, Frankfurće nad Wódru a Braunschweigu muža wšelakich padustwow a njepłaćenych chłostankow dla pytaja. Nětko ma 617 dnjow w jastwje wotsedźeć.
To a tamne (20.07.17)
Mać z čerstwej całtu k narodninam překwapić chcyše štyrilětny w badensko-württembergskim Gundelfingenje, je pak při tym zasadźenje policije zawinił. Pjerach bě wčera rano samlutki do wobchoda přišoł a sej całtu žadał. Předawarka pak so starosćeše a zawoła policiju. Zastojnicy hólčka na to pěši domoj přewodźachu. Mać bě za nim hižo pytała. Tón bě so skradźu z bydlenja zminył a so nětko z policiju nawróći – wězo z čerstwej całtu za mać jako narodninski dar.
Z awtom so přećisnył a dale jěł je 93lětny na zwjazkowej dróze pola Gery. Na parkowanišću njedaloko městna njezboža w Altenburgskim kraju wón skónčnje zasta. Byrnjež so po wšěm zdaću njezranił, dowjezechu jeho do chorownje. Kak je k njezbožu dóšło, njemóže sej policija tak prawje wujasnić. Muž bě z jězdnje zjěł, do wobhrodźenja prasnył a so přećisnył.
To a tamne (19.07.17)
Tři měsacy stare hojo je pos w Americe z morja wuchował. Golden Retriever z mjenom Storm bě so w přistawje Jefferson Harbor w Long Island pola New Yorka kupał. Nadobo wuhlada wón zabłudźene sornjatko w morju. Bjez wahanja je Storm za šiju hrabny a na pobrjóh donjese. Widejo wo akciji, wot Marka Freeleyja w interneće wozjewjeny, su sej mjeztym statysacy wobhladali. Hojeću, kotrež dowjezechu do zwěrjatownje, so mjeztym zaso derje dźe.
Na wšě 400 konopjowych rostlin je biologa w ruskim měsće Togliatti w swojim bydlenju plahował. Rostliny stejachu samo na přetwarjenym łožu a w kamorach. We wjelbiku namakachu zastojnicy nimo toho sydom kilogramow marihuany w hódnoće wjace hač 2,5 milionow rublow (něhdźe 36 000 eurow). Policija biologu-plahowarja konopje zaja.
To a tamne (18.07.17)
Strašne městno za sobujědźenje je sej młoda kóčka w hessenskim Hombergu nad rěku Ohm wupytała. W porjedźerni awtow namaka ju wčera sobudźěłaćer, po tym zo bě šofer wo spodźiwnych zwukach w motorowej rumnosći rozprawjał. Šef porjedźernje je kóčku najprjedy raz w běrowje zaměstnił. Mjeztym su hóstnu swójbu za nju wuslědźili. Tež mjeno micka hižo ma: Mercedes.
Njepłaćeneje chłostanki wosom eurow dla zaja policija na Hamburgskim lětanišću muža, kiž bě so z dowola w Turkowskej nawróćił. Wón bě před lětomaj wopačneho parkowanja chłostanku 15 eurow dóstał, je pak jeno dźěl zapłaćił. Tak zwosta 8,07 eurow. Dokelž njemějachu adresu, wukaza statne rěčnistwo zajeće. Muž móžeše so rozsudźić: pak dźeń do jastwa, pak 8,07 eurow plus 53,60 eurow za wobdźěłanje płaćić. Wón radšo zapłaći.
To a tamne (17.07.17)
Do policajskeho awta prasnyła je 17lětna kolesowarka w Münsterskim kraju, dokelž njebě so na nadróžny wobchad, ale město toho na swój handy koncentrowała. Zastojnikam bě wona napadnyła, dokelž přez słuchatka hudźbu słuchaše a runočasnje mobilny telefon posłužowaše. Policisća holcu přesćahnychu a spytachu ju z trubjenjom na jeje lochkomyslne zadźerženje skedźbnić. Podarmo. 17lětna měješe woči jenož za handy, doniž do policajskeho awta njezrazy. Při tym so snadnje zrani.
Z energiskim znapřećiwjenjom je 86lětny muž w južnej Hessenskej rubježnika wotbył. Muž bě sej w předrumnosći banki kontowe podłožki wućišćeć dał, jako jeho zakukleny z pistolu wohrozy a sej žadaše, zo tysac eurow wotzběhnje. „Za to sym přestary“, rentnar znapřećiwi. Zadźiwany paduch so na to zminy.
