To a tamne (09.02.17)
Podarmo je 32lětny při Bodamskim jězoru spytał, wóń marihuany ze smjerdźatym twarožkom zakryć. Policisća běchu chětro połny nachribjetnik muža na Lindauskim dwórnišću kontrolowali. We wačoku namakachu wšelake žiwidła a wjacore tyzy ze sylnje wonjacym twarožkom. Tam pak běchu drogi schowane. Zastojnicy marihuanu sćazachu, wupisachu skóržbu a pósłachu muža z twarožkom skónčnje dale.
Mjerzajo so na snědań, kotruž bě mać jemu do pěstowarnje sobu dała, je pjećlětny w Stuttgarće ćeknył a z měšćanskej železnicu wotjěł. Po puću do pěstowarnje bě so z maćerju tak zwadźił, zo jej twochny a na zastanišću do železnicy zalěze. Sobujěduca žona pjeracha narěča a přepoda jeho policiji, kotruž bě mać hižo zazwoniła. Tola tež jako hólc mać zaso widźeše, bě přeco hišće hněwny.
To a tamne (08.02.17)
Chětro bolostnje do ruki kusnył je w bayerskim Landshuće paduch wobchodowemu detektiwej. Tón bě 34lětneho wobkedźbował, jako wjacore zamróžene pizzy kradnješe. Při durjach 56lětny podhladneho narěča. Na to dóńdźe k rozestajenju, při čimž paduch detektiwej tak jara do ruki kusny, zo dyrbjachu ranu w chorowni lěkować.
Po dwěmaj měsacomaj je policija w Mnichowje zhubjene awto namakała. Kaž prezidij zdźěli, bě 55lětna žona z Durinskeje 11. decembra awto njedaloko hłowneho dwórnišća parkowała, pozdźišo pak je wjace njenańdźe. Zdźěliwši policiji, zo je wóz pokradnjeny, jědźeše z ćahom domoj. Nětko je policistam w starym měsće dospołnje zanjerodźene awto napadnyło, zhubjeny wóz z Durin- skeje. Žonu su mjeztym informowali.
To a tamne (07.02.17)
Njewotpohladnje woheń zamiškriła je rentnarka, jako na swojim balkonje kołbasu sušeše. 68lětna žona w badensko-württembergskim Balingenje bě čerstwe kołbasy sušiła, při čimž so dekoracija na balkonje horceje kurjenskeje komorki dla zapali. Chětře so płomjenja na drjewjanu konstrukciju balkona rozpřestrěchu. Spočatne pospyty žony, woheń sama podusyć, zwrěšćichu. Wohnjowa wobora porno tomu měješe połoženje spěšnje pod kontrolu. Nichtó so njezrani. Škoda na balkonje a fasadźe domu wučinja přiwšěm něhdźe 20 000 eurow.
Problem z jara aktiwnymi bobrami maja přiběrajcy w połobskej wsy Dolní Žleb w Čěsko-sakskej šwicy. Stajnje zaso hrymzaki cyłe štomy pušćeja, kotrež na milinowody padaja a je roztorhaja. Přeco zaso dochadźa w pomjeznym Dolnim Žlebje k wupadam miliny.
To a tamne (06.02.17)
Wopity, k tomu hišće bjez cholowow a čriji, je šofer pućowanskeho busa w Kaiserslauternje za wodźidłom sedźał. 53lětny bě sobudźěłaćerjej wěstotneje firmy napadnył, dokelž chcyše bjez dowolnosće do ameriskeje kaserny jěć. Přiwołana policija zwěsći w jeho kreji wjace hač dwaj promilej alkohola. Pobrachowacu drastu namakachu w busu, w kotrymž nichtó druhi njesedźeše. Zastojnicy wzachu šofera sobu na stražu.
Na wšě 87 zmužitych zymskich płuwarjow wobdźěli so wčera na Drježdźanskim póstniskim płuwanju we Łobju, kaž organizatorojo zdźěleja. Woda bě z 0,5 stopnjemi chětro zymna, powětr njeměješe wjace hač štyri stopnje. Najstarši wobdźělnik bě 73 lět.
To a tamne (03.02.17)
Wobsedźer złoćaneho pokłada, kotryž běchu dźěći w delnjej Bayerskej při hrajkanju w lěsu našli, je so přizjewił. Na zakładźe dokładnych znajomosćow wo schowje pokłada a jednotliwych pjenjezach móžeše dopokazać, zo pokład woprawdźe jemu słuša. Złoto je 250 000 eurow hódne. Muž bě je w lěsu zarył, dokelž boješe so paduchow w bydlenju. Bankam wón njedowěrješe. Sprawnosć dźěći muž z darom mytowaše.
Na wšě 27 lět bjez jězbneje dowolnosće po puću běše 73lětny muž ze Šwabskeje. Nětko jeho njedaloko Augsburga na traktoru sedźo při wobchadnej kontroli lepichu. Policistam bě alkoholowa wón napadnyła. Test wunjese 1,9 promilow. Jězbnu dowolnosć pak sćazać njemóžachu. Tón běchu jemu podobneho delikta hižo před 27 lětami wotewzali.
To a tamne (02.02.17)
Hižo 250 króć lepjeneho čornojězdźerja je policija w Lüneburgu znowa ze spěšnika ćisnyła. Šafner chcyše jeho tež tohodla wotbyć, dokelž strašnje za alkoholom a urinom smjerdźeše, policija zdźěli. Ćehodla muž z Uelzena stajnje zaso z ćahom do Hamburga jězdźi, njewědźa. Wjacore skóržby a samo jatby njejsu dotal ničo wunjesli. Na policajskim rewěrje je muž, kotryž tež přez agresiwne zadźerženje napadnje, derje znaty. Zastojnicy znaja jeho personalije mjeztym z hłowy.
Z kruchom swinjaceho mjasa je sej španiski fan kopańcy košlu sławneho hrajerja Reala Madrid Sergija Ramosa zawěsćił. Za čas hry dźeržeše taflu w ruce, na kotrejž steješe: „Sergio, daj mi swój trikot a dam ći swinjace mjaso w šmałcu“, štož je delikatesa z južneje Španiskeje. Bjezposrědnje po hrě Ramos mužej trikot přićisny. Tón swoje slubjenje dodźerža a jemu mjaso da.
To a tamne (01.02.17)
Do paslow zalězł je sej paduch w Germeringu pola Mnichowa, jako chcyše drasty z kontejnera za staru drastu kradnyć. Při tym zhubi runowahu a suny so přez škałbu do kontejnera, policija zdźěli. 35lětny podarmo spytaše so ze sudobja zaso wudrapać. Hakle jako pěšk spodźiwne zwuki z kontejnera słyšeše a nuzowe čisło zawoła, přińdźe pomoc. Wohnjowi wobornicy zamk při kontejneru přerězachu a jateho wuswobodźichu.
Wjace hač tysac ludźi je so wčera w kostimach něhdyšich wikingow w šotiskim Lerwicku na kóždolětnym festiwalu „Up Helly Aa“ wobdźěliło. Z rjećazowymi košlemi, nahłownikami a brónjemi wuhotowani ćehnjechu wobdźělnicy po městačku hłowneje ze Shetlandskich kupow. Festiwal zarjaduja tam wot lěta 1880 w tradiciji historiskich nowolětnych a swětłowych swjedźenjow.
To a tamne (31.01.17)
Na třoch kolesach dale jěła je 82lětna wodźerka wosoboweho awta w Badensko-Württembergskej, po tym zo bě koleso zhubiła. Bjezposrědnje do toho bě wona njedaloko Pforzheima z dróhi zjěła a do skłoniny zrazyła. Při tym so wobruč pušći a do napřećo přijěduceho awta zrazy. Najebać to staruška dale jědźeše. Druhim šoferam so poradźi, žonu zadźeržeć. Woni běchu před njej jěducy borzdźili.
Z nakładnym awtom na zamjerznjeny jězor zajěł je 32lětny muž njedaloko badensko-württembergskeho Knittlingena. Kaž policija zdźěli, běchu so durje na boku šofera wočinili. Přez to njekedźbliwy zajědźe muž z jězdnje, přełama wobhrodźenje a wosta hakle na zamjerznjenym jězoru stejo. Zmjerzk minjenych dnjow pak bě jeho zbožo: Móžeše so na dosć tołstym lodźe wuchować. Wohnjowi wobornicy awto z jězora na brjóh sćahnychu.
To a tamne (30.01.17)
Cyłkownje 21 młodych žonow chce lětsa k wubědźowanju „Miss Germany“ nastupić. Wo titul wojuja kandidatki ze wšeje Němskeje w starobje 17 do 28 lět, organizatorojo wólnočasneho parka w Rusće pola Freiburga zdźěleja. Finale budźe 18. februara. Wubědźowanje rjanolinkow swjeći lětsa swój 90. jubilej. Lěta 1927 běchu je prěni króć přewjedli. Lětuše kandidatki běchu so w 150 cyłoněmskich wurisanjach přesadźili, na kotrychž wobdźěli so 5 155 młodych žonow.
Zwada wo hudźbu spěwarki Andreje Berg na narodninskim swjedźenju je w Durinskej wuwjercholiła. Při tym 52lětna žona 50lětnu hosćićelku na party w Rudolstadće daješe a wohrožowaše, policija w Saalfeldźe zdźěli. Pola žonow naměrichu 1,9 a 1,4 promile alkohola. Po informacijach policije njemóžeštej so žonje dojednać, kotry spěw měł so hrać.
To a tamne (27.01.17)
Wopity šofer nakładneho awta je na awtodróze A 4 njedaloko Berbersdorfa spał. Kaž policija zdźěli, bě wón minjenu nóc swoje awto z warnowanskej swěcu na nabóčnej smuze wotstajił a sej wusnył. Hakle po wospjetnym kłapanju a wołanju zastojnikow wón wotući. Kontrola alkohola wunjese pola 29lětneho 2,10 promilow. Jeho jězbnu dowolnosć tuž nablaku sćazachu. Nakładne awto dyrbjachu wotwlec dać.
Zo by so alkoholowej kontroli wuwinył, je so wodźer wosoboweho awta we Wodowych Hendrichecach wčera wječor zabarikaděrował. Přez wusku škałbu wokna bě zastojnikam papjery z awta sunył. Woni wšak alkohol čujachu a sej žadachu, zo ma wulězć. 42lětny pak durje zamkny. Po dorěči ze statnym rěčnikom policisća nabóčne wokno awta rozbichu, a muž w awće so hižo njewobaraše.
