To a tamne (30.11.23)
Na policajsku stražu doběžała je psyca w nižosakskim měsće Peine pola Hannovera. Za zwěrjećom běchu cyły dźeń pytali. Do toho bě 66lětna wobsedźerka při wuchodźowanju do kolesowarja zrazyła. Na to bě so psyca wustróžiła a ćeknyła. Přichodny dźeń wuhladachu ju wokoło policajskeje straže. Jako zastojnicy durje wočinichu, psyca do zachoda skoči. Tam so policisća wo nju starachu.
Zhubjenych přeprošenjow dla su měšćanski jubilej z tysac hosćimi w bayerskim Freyungu wotprajili. Wulki dźěl přeprošenjow njeje hosći docpěł, měšćanske zarjadnistwo zdźěla. Město běchu informowali, zo drje su přeprošenja na póstowym puću něhdźe tčacy wostali. Tohodla su so zamołwići rozsudźili, swjedźeń wotprajić a klětu nachwatać. Přeprošenja běchu 16. nowembra rozesłali.
To a tamne (29.11.23)
Narodny hodowny štom powalił je wichor w stolicy USA Washingtonje. Na wobrazach bě wčera wječor hoberski ležacy štom widźeć, někotre lampički so hišće swěćachu. Kran běchu hižo nastajili. Dwanaće metrow wysoki štom steji bjezposrědnje při Běłym domje. Prezident Joe Biden chce swěčki na štomje jutře zhromadnje ze swojej mandźelskej Jill symbolisce zaswěćić a tak dohodownu sezonu oficialnje zahajić. We Washingtonje so tuchwilu mócnje wichori.
Dinosawrier je wotnětka nowy oficialny symbol awstralskeho zwjazkoweho stata Queensland. Muttaburrasaurus, kiž bě před sto milionami lětami w Awstralskej žiwy, je tak prěni fosilny emblem kraja. Tuchwilu su to koala, Great Barrier Reef a orchideja Cooktown. Z nowym symbolom chcedźa turizm wožiwić, kiž měri so přiběrajcy na fosilne namakanki w kraju.
To a tamne (28.11.23)
Zabyta pistola na nuzniku tankownje je w Stralsundźe zasadźenje policije a wosebiteje antiteroroweje jednotki zawiniła. Stražnik bě rewolwer z pjeć patronami na nuzniku zabył. Jako so na to dohlada, bě pistola preč. Krótko po nim bě dalši muž na nuzniku był a pistolu sobu wzał. Policija pak muža po wobšěrnym přepytowanju wuslědźi a toho bydlenje přepytowaše. Při tym rewolwer namakachu. Dwě kulce pak pobrachowaštej: Muž bě je na brjoze morja do powětra třělił.
98 hodownych štomow z wjace hač 142 000 lampičkami – to je lětuša hodowna dekoracija Běłeho domu. Jill Biden, mandźelska prezidenta USA, je pychu knježerstwoweje centrale we Washingtonje wčera předstajiła. Něhdźe 300 dobrowólnych pomocnikow je minjene dny wšitko spřihotowało a 34 000 hodownych kulow powěsnyło.
To a tamne (27.11.23)
Moderatorej Thomasej Gottschalkej je so telewizijny sćelak ZDF po poslednim wusyłanju show „Wetten das..?“ minjenu sobotu dźakował. „Wjeselimy so nad wulkim wothłosom tuteje show z Thomasom Gottschalkom a prajimy hišće raz dźakuju za njezapomnite wokomiki.“ Gottschalk je cyłkownje 154 wusyłanjow woblubowaneho telewizijneho klasikarja přewodźał. Kak ze show dale póńdźe, chce sćelak „w prawym času“ rozsudźić.
Drogi město kuchinskeho nastroja je posoł 74lětnemu w zapadnym wokrjesu Bodamskeho jězora domoj přinjesł. Muž informowaše policiju, po tym zo bě marihuanu a hašiš w posyłce namakał, nic pak skazanu kuchinsku mašinu. Prawdźepodobnje bě póst pakćik zaměnił, policija zdźěla. Skazał bě starc nastroj w interneće. Policija nětko za woprawdźitym adresatom drogow pyta.
To a tamne (24.11.23)
Škrěčenje a harowanje wokoło kompjuteroweje hry je njedaloko Lübecka zasadźenje policije zawinowało. Susodka bě pohladnych zwukow dla zastojnikow informowała. Do toho bě wona podarmo wo durje a wokna susoda kłapała. 21lětny syn słuchatkow dla ničo njesłyšeše. Tež zastojnicy njemějachu z kłapanjom a swěcu kapsnych lampow žadyn wuspěch. Bjezmała bychu wohnjowi wobornicy durje namócnje wotewrěli. W poslednim wokomiku přińdźe nan z klučom.
Mario Balotelli, bywši italski narodny kopar, je awtowe njezbožo njezranjeny přetrał. 33lětny, kiž hraje aktualnje w Turkowskej, je ze swojim awtom w sewjeroitalskim Brescia do sćěny prasnył. Po tym je pječa test alkohola wotpokazał. W Němskej maja Balotellija w špatnym pomjatku: Wón bě 2012 němske mustwo při EM z dwojimi wrotami z turněra třělił.
To a tamne (23.11.23)
Wisajo pod nakładnym awtom je wopity Awstralčan na wšě 400 kilometrow sobu jěł. Poprawom chcyše so na tute wašnje darmotnje hač do přichodneho městačka předrěć a tam při čerwjenej ampli „wotskočić“. Truck pak měješe na swojim puću jenož zelene ample a hakle po štyrjoch hodźinach w měsće Gold Coast w susodnym zwjazkom staće pozasta. Policisća napisachu mužej chłostanku 170 eurow a dowjezechu jeho na dwórnišćo.
Pytajo za pokładom je muž na polu w Hohenlindenje pola Mnichowa ze swojim metalowym detektorom kwasny pjeršćeń 81lětneje žony z Awstriskeje namakał. Žona bydleše po kwasu 1964 we wsy a je tam pjeršćeń zhubiła. Pozdźišo přesydli so wona do Awstriskeje. Namakar, bywši policist, móžeše žonu z pomocu zadypaneho kwasneho datuma a stawniskich zapisow wsy wuslědźić.
To a tamne (21.11.23)
Dospołnje měrny wostał je šofer taksija w Hammje pola Dortmunda při rubježnym nadpadźe. 40lětny sobujěducy bě wčera pistolu wućahnył, na šofera měrił a bróń demonstratiwnje nabiwał. Najebać to 52lětny šofer rubježnikej přirěčowaše a jeho pohnu, pistolu złožić. Na kóncu skućićel šofera prošeše, jemu znajmjeńša tyzku cigaretow kupić a jeho domoj dowjezć. Tón pak wołaše město toho policiju, kotraž rubježnika zaja.
Hodowny štom za Běły dom přijimowała je first lady USA Jill Biden. Něhdźe 5,60 metrow dołhu jědlu su po starej tradiciji z konjacym zapřahom k sewjernemu zachodej knježerstwoweje centrale we Washingtonje přiwjezli. Narostł je štom w zwjazkowym staće North Carolina. Mandźelska prezidenta so na starodawne wašnje pohončam a konjam dźakowaše a „wulkotny štom“ chwaleše.
To a tamne (20.11.23)
Fatalne misnjenje při wubědźowanju Formule I w Las Vegasu změje dosć drohe konsekwency: Běrow prawiznikow je zhromadnu skóržbu w mjenje něhdźe 35 000 wopytowarjow zapodał, žadajo sej 960 milionow eurow wotškódnjenja. Defektne wěko kanala bě štwórtk prěni trening po 19 mjeńšinach přetorhnył. Hakle hodźiny po tym móžachu z tym pokročować. To běchu wopytowarjo tribuny a wubědźowanišćo dawno wopušćili.
W hrjebi tčacy wostało je policajske awto w Šwikawskim wokrjesu při přesćěhowanju šofera awta. Tón bě so wčera w Crimitschauwje policajskej kontroli wuwinył. Jako policisća za nim jědźechu, suny so jich awto w křiwicy z jězdnje. Dalše policajske awto móžeše podhladneho skónčnje zadźeržeć. Po prěnim přepytowanju je 23lětny muž do jězby drogi brał. Wěcna škoda wučinja 32 000 eurow.
To a tamne (17.11.23)
Z wjace hač 80 rynkami hula-hoop wokoło bjedrow je Berlinjanka Dunja Kuhn w Drježdźanach swój dotalny swětowy rekord přetrjechiła. Dotal nawjedowaše wona w tutym žanru ze 70 rynkami. Při nowym pospyće rekorda dyrbješe wona rynki na znajmjeńša třoch městnach ćěła wěsty čas dźeržeć, štož žadaše sej wjele mocy. Na wčerawšim dnju Guinnessowych rekordow su po wšěm swěće spytali, dotalne rekordy přetrjechić.
Paducham w swojim bydlenju z mobilnym telefonom originalnje přihladować móhł je muž w Lipsku – a je policiju wołał. Třo paduši běchu so namócnje do bydlenja zadobyli a je přeborkali, jako nichtó doma njebě. Awtomatiska kamera jich wobkedźbowaše. Policija paduchow w starobje 28, 31 a 39 lět hišće we wochěži zaja. Sudnik je mjeztym rozsudźił, zo dyrbja do přepytowanskeje jatby.
To a tamne (16.11.23)
Peticiju na dobro nócneho zwonjenja cyrkwinskeje wěže je w šotiskej wsy Beith mjeztym 900 ludźi podpisało. W 90tych lětach běchu zwón w nocy wotstajili, dokelž bě so wobydler hóršił. Do toho bě zwón 200 lět dołho wodnjo a w nocy kóždu hodźinu zaklinčał. Nětko pak je muž w bjezposrědnym susodstwje lěta 1810 twarjeneje cyrkwje zwěsćił, zo mjelčacy zwón zhromadnosći ludźi a identiće wsy ze 6 000 wobydlerjemi zeškodźi.
Skurilne swětowe mišterstwa su wčera – dźeń do dźensnišeho oficialneho Dnja Guinnessowych swětowych rekordow 2023 – w Hamburgu pospytali. Na sydom rekordow su so zwažili. Muhamed Kahrimović je ze syrym jejom w ruce bleše a baseballowy retl rozbił. Palina Glebova je dartowe kłoki z nohu na tarč mjetała. Pospyt, lětace kłoki stejo na sektowych blešach z ruku popadnyć, njeje so radźił.
