To a tamne (12.01.23)
Jědojtu rohowu wiperu nańdźechu wobydlerjo wjaceswójbneho domu wčera w pozaarskim měsće Schiffweiler. Prawdźepodobnje wobsedźer hada dlěje wjace doma był njeje. 16 wobydlerjow dyrbješe twarjenje na to wopušćić, zo bychu zasadźenske mocy dalše zwěrjata pytać móhli. Po prěnich podaćach namakachu dalšeho jědojteho hada a wjacore powšěm zdaću tohorunja jědojte pawki.
Dokelž so za popularnu hólču hudźbnu skupinu BTS z Južneje Koreje zahorjatej, stej dwě 13lětnej holcy z Pakistana chcyłoj so do Južneje Koreje podać. Policija jeju při tym popadny. Po jeje informacijach běštej so holcy nadźijałoj, swojeju pop-idolow zetkać. Skupina ma w Pakistanje wjele fanow. W konserwatiwno-muslimskim Pakistanje płaći spěwanje a rejowanje žonow w zjawnosći na mnohich městnach hišće jako njepřistojne.
To a tamne (11.01.23)
W Bochumje je žona žiwjenje přisadźiła, jako so wutoru wječor jeje dom njenadźicy sypny. Po wjacore hodźiny trajacym slědźenju běchu ju wuchowanske jednotki w rozpadankach namakali. Druha wosoba je přežiwiła a so sama wuswobodźiła. Po prěnich dopóznaćach policije běše eksplozija přičina njezboža. Dwuposchodowy wjaceswójbny dom je dospołnje zničeny.
17lětny šuler je prawdźepodobnje swoju 55lětnu wučerku wutoru popołdnju w měsće Ibbenbüren w rjadowni swojeje powołanskeje šule z nožom morił. Po słowach statneho rěčnistwa je šuler po swojim njeskutku sam policiju telefonisce informował a so bjez spjećowanja zajeć dał. Druzy we wokomiku nadpada w rjadowni njeběchu. Přepytowanja běža. K motiwam njeskutka nochcyše zastupjer statneho rěčnistwa hišće ničo rjec.
To a tamne (10.01.23)
Dokelž je na nuzniku w lětadle kurił, bu pasažěr při njeplanowanym mjezypřizemjenju w Hannoveru z lětadła wjedźeny. 33lětny je po starće w Hamburgu namołwu přistajeneje ignorował a swoju cigaretu dokurił, zdźěli wčera zwjazkowa policija. Potajkim bu jemu k zahubje, zo bě lětanska towaršnosć rozsudźiła, w Hannoveru přizemić. Tam je mjenujcy lětadło techniskich problemow dla wupadnyło. Poprawom měli w Hannoverje pasažěrojo šmórnjeneho lěta přistupić, zo móhli dale do Turkowskeje lećeć. Tola pilot z Hamburga wuzamkny tež kurjaka.
Njewšědne městno je sej njeznaty w Hannoveru wupytał. Elektriski roler wisaše wčera něhdźe dźesać metrow wysoko na wuhenju kupnicy. Za wupožčowarja, Berlinske předewzaće Tier, je to pad wandalizma.
To a tamne (09.01.23)
Pjany šofer je sej na křižowanišću w Šwikawje za wodźidłom wusnył. Policisća su 35lětneho na pózdnim pjatku wječor wubudźili, policija zawčerawšim zdźěli. Dokelž w awće za alkoholom wonješe, zastojnicy šofera dokładnišo přepytachu. Prěni test pokaza 1,76 promilow. 35lětny dyrbješe hišće samsny wječor swoju jězbnu dowolnosć wotedać.
W lódzymnej wodźe pod hołym njebjom wosrjedź japanskeho milionoweho města Tokija su dźesatki ludźi Bohow wo strowotu prosyli. Něhdźe štyrceći muži we wosebitych falach a běłych pasach wokoło čoła kaž tež žony w běłym płašću su do wody zalězli a swoje próstwy wótře wołajo přednjesli.
To a tamne (06.01.23)
Pjećlětny je so w Bayerskej sam na wulku jězbu podał – a z tym zasadźenje policije zawinił. Kaž policija wčera zdźěli, přizjewi so zawčerawšim zadwělowana mać z Nördlingena. Jeje syn je so při hrajkanju ze štyrilětnym přećelom zhubił. Policija na to za hólcom z helikopterami, trutami a psyčej staflu pytaše. Něhdźe dwě hodźinje pozdźišo namakachu zastojnicy zwjazkoweje policije hólca při dwórnišću w něhdźe 35 kilometrow zdalenym Aalen. Hólčec je sej z ćahom tam dojěł.
W Japanskej móža dźiwje ptački w zymje w swójskim hosćencu chłóšćić. Před tafličku z japanskim napisom „hosćenc dźiwich ptačkow w zymje“ w přirodoškitnym centrumje prefektury Fukui je „hosćom“ bifej ze słónčnymi róžemi přihotowany, zdźěli dźensa rěčnik centruma. Hłódne ptački přileća z wokolnych horow, kotrež su tuchwilu zasněžene.
To a tamne (05.01.23)
Durje mjeńšeho lětadła su minjeny pjatk „z njebjes“ do zahrody socialneje stacije w Meckenbeurenje při Bodamskim jězoru (Baden-Württembergskej) padnyli. Elektroniski system lětadła je pilota wo wopačnej funkciji durjow hišće do starta informował, policajska rěčnica rozłoži. 45lětny pak je signal ignorował a wot bliskeho lětanišća Friedrichshafen startował. Na zbožo so nichtó zranił njeje.
Hižo dwójce buchu dźěle čarow Mnichowskeho lětanišća zawrjene, dokelž bě tam psyk z mjenom „Sammy“ po puću, policija zawčerawšim zdźěli. Sammy pochadźa z wukraja, hdźež běše na dróhach žiwy. Póndźelu chcyše jeho nowa wobsedźerka na lětanišću wotewzać, ale psyk je so wuswobodźił a zminył.
To a tamne (04.01.23)
Krótki čas bě něhdyši kanclerski kandidat CDU Armin Laschet na wulkim plakaće w aktualnym Berlinskim wólbnym boju wo dom zapósłancow widźeć. Wčera je to pasantam a šoferam awtow w Berlinskim wobwodźe Steglitz-Zehlendorf napadnyło. Krótko po tym bu plakat zaso wotstronjeny. Za to je tam nětko stary plakat z nětčišej zwjazkowej wonkownej ministerku Annalenu Baerbock připrawjeny. Za darmotne wabjenje je wona zawěsće jara dźakowna. Kotry plakat na tele městno woprawdźe słuša, znate njeje.
Šwicarski cłownik so njemało dźiwaše, jako při kontroli jězdźidła na hranicy k Němskej dźewjeć dorosćenych a 14 dźěći w jednym jězdźidle naliči. Wulkoswójba chcyše do Berna, policija wčera zdźěli. Tola hromadźe dale jěć njesmědźachu.
To a tamne (03.01.23)
120 socialnych hodźin a pjeć lět bjez jězbneje dowolnosće su wuslědk jězbneho pruwowanja šulerki w Letiskej. Wona bě mjenujcy pjana na praktiski pruwowanski termin přišła, zdźěli wčera letiske generalne statne rěčnistwo w Rize. Jako pruwowar pytny, zo steješe šulerka pod wliwom alkohola su wotpowědny test přewjedli. Tak zwěsćichu, zo měješe wona wjace hač 2,1 promilow alkohola we wudychu.
Cigara je wohenjej w srjedźnej Frankskej zadźěwała. 29lětny bě so w silwesterskej nocy wot hosćiny we Westheimje krótko domoj nawróćił, dokelž bě swoju „nowolětnu cigaru“ zabył, kotruž sej kóžde lěto popřeje. Při tym je woheń na nowo natwarjenej łubi wuhladał a wohnjowu woboru informował. Po informacijach policije je tak wjetšej škodźe twarjenja zadźěwał.
To a tamne (02.01.23)
27 000 objektow bu loni w běrowach namakankow awstriskeje železnicy ÖBB wotedatych. Ludźo su nimo kófrow, šmóratkow, klučow abo wupokazow tež rolatory, kije, 16 słuchanskich nastrojow, tři zubne protezy a chorobnej stołaj ležo abo stejo wostali. Tež na dweju psow, 99 kolesow a 34 dźěćacych wozyčkow su pasažěrojo zabyli. 34 procentow cyłkownych namakankow móžachu mějićelkam a mějićelam wróćić.
Před wočemi publikuma je artist na wysokim powjazu w Freiburgskim hodownym cirkusu pjeć metrow do hłubokosće padnył a sej při tym wjacore kosće złamał. Kaž policija a zarjadowar zdźělištaj, měješe njezbožo lěpši wukónc hač spočatnje trochowane. Předstajenje minjeny štwórtk bu najprjedy přetorhnjene, potom pak pokročowane.
To a tamne (30.12.22)
90 swětowych rekordow su Němcy w nachilacym so lěće certifikować dali, kaž rjekny to Olaf Kuchenbecker, najwyši sudnik při Instituće rekordow w Němskej, powěsćerni dpa. Mjez druhim su w bobby-carje dróhu ze spěšnosću 106 km/h dele smalili. Dale bu wěža w porynsko-pfalcskim Gau-Weinheimje jako najkřiwiša swěta do rekordneje knihi zapisana. Wona je wo 5,4277 stopnjow nachilena.
Rumpodich, Bože dźěćo a Mikławš su lětsa w sydom hodownych póstowych filialach Němskeho pósta nimale 633 900 hodownych listow dóstali. Loni bě jich 648 850. Rěčnica pósta ma za přičinu nišeje ličby posyłkow, zo su 2021 za čas koronoweho lockdowna powšitkownje hišće wjace listow pisali hač nětko. Na prěnim městnje přećow steješe strowota.
