Drježdźany (dpa/SN). Sakska wuslědźi lěsne škody w swobodnym staće přichodnje tež z pomocu satelitowych wobrazow, kotrež Europska swětnišćowa agentura ESA darmotnje sposrědkuje. Fachowcy na městnje daty wuhódnoćeja. Zaměr je, změny w lěsach wot oktobra 2017 hač do apryla 2020 analyzować. Wčera je so statny minister za energiju, škit klimy, přirodu a ratarstwo Wolfram Günther (Zwjazk 90/Zeleni) w Drježdźanskej holi wo projekće wobhonił.

„Satelitowe wobrazy nam při tym pomhaja, wot skórnikow potrjechene lěsne płoniny spěšnje a po cyłym kraju dokumentować. To nam zmóžnja, škody zaměrnje wotstronić, riziko stratow posudźować a prěnjotne płoniny za znowazalěsnjenje postajeć“, Günther podšmórny a doda, zo „mamy šansy nětko wužić, ekologiske přetworjenje na wašnje forsěrować, zo nastawaja stabilne, na wšelakorosć družin a strukturow bohate kaž tež wukonliwe lěsy.“ Daty nimaja po informacijach ministerstwa jeno statnemu lěsniskemu zawodej Sachsenforst słužić, ale tohorunja priwatnym a komunalnym akteram k dispoziciji być.

Teltow (dpa/SN). Ratarjo w Braniborskej wočakuja lětsa tróšku nadpřerězne žně a tak lěpši wuslědk hač loni. Přiwšěm pak budu w kraju jasne rozdźěle nastupajo plus a minus, zdźěli rěčnik krajneho burskeho zwjazka Tino Erstling powěsćerni dpa do zakónčenja žnjow. Po jeho słowach zwisuje to z rozdźělnym mnóstwom spadkow w jednotliwych regionach kaž tež z kwalitu pódy na městnje. „Mamy zawody, kotrež podobnje špatne wunoški domchowaja kaž w suchim lěće 2018. Su pak tež ratarjo, kotřiž lětsa dosć derje wotrěznu.“ Hišće do zahajenja žnjow rěkaše ze stron zwjazka, zo budu lětuše žně podpřerězne.

W Burskim zwjazku južna Braniborska, su to wokrjesy Dubja-Błóta, Hornje Błóta-Łužica a Łobjo-Halštrow, liča po słowach jednaćelki Carmen Lorenz špatnych pódow a pobrachowaceho dešća dla z podpřerěznymi wunoškami. „Ale tež tu mamy punktuelne rozdźěle z lěpšimi žnjemi“, rjekny jednaćelka.

Po lěću suchoty 2018, kotrež bě ratarjam jenož wunošk dweju milionow tonow přinjesło, su domchowanki loni zaso 2,5 milionow tonow docpěli.

Tukrajne dowolowe kónčiny steja lětsa před wosebje wulkim wužadanjom. Koronapandemije dla chce so tam wjele wjace ludźi wočerstwić, dokelž so mnozy z nich dowola we wukraju wzdadźa. A su-li woni z bydlenskim mobilom po puću, njejsu na to pokazani sej kwartěr knihować dyrbjeć. Campingownišća pak su tele dny přepjelnjene, to njeje jenož w błótowskich Bórkowach fakt. Zo skića tam caravanam za krótke přebywanje na parkowanišću Wjerbowy hród wupuć, zo njetrjebaja dale jězdźić abo něhdźe „čornje“ přez nóc stejo wostać, swědči wo tym, zo su zamołwići sčasom za alternatiwu pytali. Wo to su so tež w měsće Budyšinje starali: Njepřichadźacych busow z pućowanskimi towaršnosćemi dla přewostaja za nje předwidźane přestrjenje na Schliebenowym parkowanišću nětko bydlenskim mobilam. Dalša móžnosć je parkowanišćo na Třělnišću. Jeničce za wuprózdnjenje tanka z trjebanej wodu dyrbja kaž w Borkowach na stejnišćo-campingownišćo. Axel Arlt

Lětuši srjedźostawski dźeń Zwjazko­weho zjednoćenstwa srjedźostawskeho hospodarstwa (BVMW) w Drježdźanskim hospodarskim regionje budźe 1. septembra. Budźe to 20. podawk, kotryž je bywši regionalny zwjazk BVMW Hornja Łužica iniciěrował.

Budyšin (SN/at). Na zetkanju ze skrótšenku „MiTag“ na Biskopičanskej Bu­trowej horje chcedźa so předewzaćeljo z tym zaběrać, kak móža „Přichod do přitomnosće dóstać“. Tradicionalnje dźe wo to, nastorki přiwzać, nowe styki nawjazać a wobstejace dale wudźeržować. „Wuwića sčasom spóznać a z toho prawe konkluzije sćahnyć je za předewzaćela dźeń a wažniše. 20. MiTag tajke wuwića a wužadanja pokaza“, rozłožuje Sirko Rosenberg z Budyskeho běrowa BVMW.