Krótkopowěsće (19.01.24)
Přihotuja jutrowny seminar
Budyšin. Serbske młodźinske towarstwo Pawk hotuje so na lětuši jutrowny seminar Młodźiny europskich narodnych skupin (MENS) w Budyšinje. W martrownym tydźeńju wočakuja někak 60 młodostnych z cyłeje Europy. Z jednaćelku MENS zetkachu so štwórtk zo bychu program a financowanje seminara wothłosowali.
Organizatorojo NFF přeprošuja
Großhennersdorf. Filmowy festiwal Nysa (NFF) wotměje so lětsa wot 14. do 19. meje a to hižo 21. raz. Wjace hač 900 filmowych přinoškow w kategorijach hrajny a dokumentarny film kaž tež krótkofilm je lětsa dóšło – wjace hač hdy prjedy. Na 21 městnosćach podłu Nysy w Čěskej, Pólskej a Němskej njeposkićuje festiwal publikumej jeno filmowe předstajenja, ale tež koncerty, čitanja, wustajeńcy a partyje.
Busy zaso po planje po puću
Budyšin. Hładkich dróhow a wjele sněha dla njejsu wot wčerawšeho popołdnja w Budyskim wokrjesu busy jěli. Informaciju rozšěrichu zamołwići za bliskowobchad mjez druhim po socialnych medijach. Wot dźensnišeho ranja busy zaso po planje jědu, přiwšěm móhło k zapozdźenjam dóńć.
Krótkopowěsće (18.01.24)
Zeleny tydźeń dźensa zahaja
Berlin. Wudźeržliwosć, zawěsćenje cyroby a přichod ratarskeje branše steja w srjedźišću 88. mjezynarodneho zeleneho tydźenja, kotryž dźensa wječor w Berlinje zahaja. Zastupjenych je 1 400 wustajerjow ze 60 krajow. Mjez nimi je prěni raz wokrjes Dubja-Błóta, kotryž kulinarisku mnohotu mjez Berlinom a Błótami w swojej prezentaciji tematizuje.
Chaos njezachadźał
Budyšin. Wulce připowědźeny wjedrowy chaos we Łužicy zachadźał njeje. Kaž zdźěli sakska policija, njeregistrowachu hižo žane wjetše problemy, kotrež su z sćěhom wjedra. Na zwjazkowej dróze 6 blisko Bukec pak wostachu někotre nakładne awta poboku dróhi ležo. Hišće wčera běštej Budyski a Zhorjelski wokrjes na warnowanje před zalodźenymi dróhami a sněhom skedźbniłoj.
Sokołam měr popřeć
Krótkopowěsće (17.01.24)
Chór Lipa bilancował
Pančicy-Kukow. Na hłownej zhromadźiznje chóra Lipa, wčera wutoru, zhladowaše předsydstwo na minjene lěto skutkowanja. Chór měješe loni dohromady dźewjeć zjawnych wustupow. Z najwjetšeho dźěla w Hornjej Łužicy. Tohorunja zmóžni so chórej pjeć nowych spěwow na chórowu sadźbu wobdźěłać.
Dr. Magdalene Kemlein njeboh
Drježdźany. W kruhu swójbnych zemrě sobotu w starobje 93 lět hudźbna pedagogowka a terapeutka Magadalene Kemlein, kotraž běše znata za swoje mnohe wobdźěłanja němskich, serbskich a mjezynarodnych ludowych a dźěćacych spěwow. Zdobom wukubła jako wučerka serbske hudźbno-šulske dźěći w duchu Jurja Winarja a wukmanješe jich w powołanjach na serbsko-kulturnym a pedagogiskim polu.
Zwěrjo lěta 2024 wohrožene
Krótkopowěsće (16.01.24)
Prof. dr. Helmut Faska njebohi
Wojerecy. Rěčespytnik prof. dr. Helmut Faska je w starobje 91 lět wčera we Wojerecach zemrěł. Jako posledni direktor Instituta za serbski ludospyt je wón serbske slědźenišćo w dobje towaršnostneho přewróta do noweho přichoda wjedł a jako załoženski direktor Serbskeho instituta skutkował. Faska je mjez druhim awtor wšelakich edicijow wo gramatice serbskeje rěče.
Žadaja sej nawodow za šule
Budyšin. Předsydka Serbskeho šulskeho towarstwa (SŠT), Katharina Jurkowa, sej w lisće wotnožce krajneho zarjada za šulu a kubłanje w Budyšinje „bórzomne wobsadźenje wjednistwow“ serbskich zakładnych šulow Chrósćicy, Pančicy-Kukow a Budyšin žada. Městno nawody je na wšěch třoch stejnišćach njewobsadźene. Wšudźe amtěruje komisariska nawodnica, najdlěje w Chrósćicach.
Z akademije do ministerstwa
Krótkopowěsće (15.01.24)
Požadanska faza zahajena
Kamjenica. Hač do 29. februara móža so wšitcy zajimcy, kotřiž chcedźa so z domjacym lěkarjom we wjesnych kónčinach Sakskeje stać, za zymski semester 2024/25 požadać. Wosebitosć je, zo zamóža so za 40 městnow w přichodnym semestrje tež zajimcy zwonka NC (Numerus Clausus) požadać. 29. januara wotměje so online informaciske zarjadowanje.
Wubědźowanje Simul-plus zahajił
Drježdźany. Wot dźensnišeho móža towarstwa, zjednoćenstwa, města a komuny w Sakskej ze swojimi idejemi na dobro swojeho regiona zaso wo Simul-plus-myta wojować. Sakski statny minister za regionalne wuwiće Thomas Schmidt (CDU) je wčera nowe koło wubědźowanja z dohromady 3,8 milionami mytowanskimi pjenjezami zahajił. Zajimcy móža so hač do 11. měrca požadać.
Štyrilětna pod Everestom
Krótkopowěsće (12.01.24)
Wo mjeńšinach we wučbje
Berlin. Mjeńšinowu radu awtochtonych mjeńšin w Němskej nawjeduje lětsa Saterski Friza Karl-Peter Schramm. Kaž předsyda Domowiny Dawid Statnik informowaše, su na wčerawšim online-wuradźowanju wažnu informaciju na wědomje brali: Konferenca kultusowych ministrow je přihłosowała, zo mjeńšinowa rada zakład za wobkedźbowanje mjeńšin we wučbje po cyłej Němskej wudźěła.
Społnomócnjene so wuměnili
Kamjenc. Społnomócnjene za serbske naležnosće Budyskeho a Zhorjelskeho wokrjesa, Wojerec, Kamjenca a předewzaća TDDK zetkachu so wčera na nowolětnu rozmołwu w Zelnakec pjekarni w Kamjencu. Wone rozjimachu problemy, nowe wužadanja a móžne projekty. Móžnej ćežišći stej serbskorěčny dorost dobywać abo akceptanca serbšćiny w dwurěčnym regionje.
Mjenje pjenjez za kulturu
Krótkopowěsće (11.01.24)
Zrěčenje podpisałoj
Kamjenc. Wokrjes Budyšin a město Kamjenc stej runohódnej partneraj w zaměrowym zwjazku za natwar noweje Lessingoweje kupjele w Kamjencu. Krajny rada Udo Wićaz (CDU) a wyši měšćanosta Roland Dantz (njestronjan) staj wotpowědne zrěčenje wčera w tamnišej halowej kupjeli podpisałoj. Zazběh twarskich dźěłow je za lěto 2026 planowany.
Nowa doba spěchowanja OHTL
Rakecy. Leaderowy region Hornjołužiska hola a haty (OHTL) je druhu projektowu namołwu za spěchowansku periodu Europskeje unije 2023–2027 wozjewiło. Požadanski čas za projekty skónči so 4. měrca. W cyłku maja 790 000 eurow spěchowanskich srědkow za přesadźenje lokalnych wuwićowych strategijow w LEADER-regionje za wšelke naprawy z dźesać wobłukowo k dispoziciji.
Digitalnje dźěłaca uniwersita
Krótkopowěsće (10.01.24)
Wubědźowanje zahajene
Budyšin. Statne ministerstwo za regionalne wuwiće je lětsa 12. raz wubědźowanje „Naša wjes ma přichod“ wuwołało. Hač do 5. meje móža so wsy z hač do 3 000 wobydlerjow na krajnoradnym zarjedźe ze swojimi idejemi a projektami požadać, kotrež atraktiwitu žiwjenja na wsy přisporjeja. Dobyćerja wočakuje pjenježne myto we wysokosći 10 000 eurow.
Nowy wobydlerski policist
Pančicy-Kukow. We wsach zarjadniskeho zwjazka „Při Klóšterskej wodźe“ maja wot spočatka lěta noweho wobydlerskeho policista. Sernjančan André Kober je zamołwitosć za pjeć serbskich gmejnow přewzał. Wón stara so wo zjawnu wěstotu, wo njezboža kaž tež přeńdźenja přećiwo porjadej a je wobydlerjam, šulam, wobchodam, towarstwam a zawodam z narěčenskim partnerom.
Wróćo do 1970tych lět
Krótkopowěsće (09.01.24)
Dźěła za škit zwěrjatow
Drježdźany. Nowa społnomócnjena za škit zwěrjatow w Sakskej je 45lětna skótna lěkarka Carina Heinrich. Wona je nowowutworjene zastojnstwo k zesylnjenju škita a derjeměća zwěrjatow spočatk lěta nastupiła. Jeje hłowne nadawki stej njewotwisne poradźowanje zarjada za škit zwěrjatow a knježerstwa kaž tež wudźěłanje iniciatiwow přez rozmołwy z powołanskimi a fachowymi zwjazkami.
Gmejna so přesadźiła
Choćebuz. Gmejskej dźělej Wjeliki Kólsk (Groß Kölzig) a Mały Kólsk (Klein Kölzig) w gmejnje Dolina Nysy a Małkse (Neiße-Malxetal), wokrjes Sprjewja-Nysa, njejstej wobstatk serbskeho sydlenskeho ruma w Braniborskej. Choćebuske zarjadniske sudnistwo je loni 14. decembra wotpowědne zdźělenje ministerstwa za wědomosć, slědźenje a kulturu zběhnyło, zdźěli wčera nowinski rěčnik sudnistwa na naprašowanje Serbskich Nowin.
Tež dźěći šćěpić dać
Krótkopowěsće (08.01.24)
FDP: Migracija a energija ćežišći
Budyšin. Sakscy liberalni maja so za lětuše wólby krajneho sejma přihotować. Z tym zwisowace wužadanja chcedźa přiwzać a zmištrować. To je designowany načolny kandidat Robert Malorny sobotu na zetkanju sakskeje FDP w Budyšinje podšmórnył. Jako ćežišći je wón wobłukaj migraciju a energiju mjenował, tu njejstej knježerstwje w kraju a Zwjazku aktiwnje dosć jednałoj.
Muž po rozestajenju zemrěł
Biskopicy. 50lětny muž je po rozestajenju w nocy na njedźelu w Biskopicach na swojich zranjenjach w chorowni zemrěł. 18lětny bu ćežko zranjeny. Jeho medicinisce dohladuja, kaž je policija wčera zdźěliła. Na Starym torhošću běchu so do toho wjacori ludźo mócnje do hłosow dóstali. Po prěnich přepytowanjach su zastojnicy 44lětneho muža zajeli.
„Ruske bajki“ wotpokazali
