Krótkopowěsće (19.08.24)
Maja nowu webstronu
Slepo. Slepjanska Serbska wyša šula „Dr. Marja Grólmusec“ ma nowu šulsku webstronu, a to w němskej kaž tež serbskej rěči. Stronu su wjacori šulerjo pod nawodom wučerja Marcela Rjelki wuhotowali. Šulski nawoda Jan Hrjehor je wšitkim swój dźak za přesadźenje projekta wuprajił. Zajimcy móža nětko w interneće pod www.os-schleife.de nowosće z dwurěčneho kubłanišća zhonić.
Ministerka wopyta „Wjelbik“
Budyšin. Sakska ministerka za kulturu a turizm Barbara Klepsch je pjatk na přeprošenje serbskeho zapósłanca krajneho sejma Marka Šimana hosćenc „Wjelbik“ wopytała. Mějićelka Monika Lukašowa w kampani „Turizm: słodźi. Pola nas w Sakskej“ sobu skutkuje. W rozmołwje z njej a šefkucharjom Tomašom Lukašom je ministerka zhoniła, zo zajim za serbsku kulturu přiběra.
Ćahi zastać njesmědźa
Krótkopowěsće (16.08.24)
Policija přihotuje so na CSD
Lipsk. Hladajo na zarjadowanje CSD w Budyšinje minjenu sobotu, hotuje so Lipšćanska policija na wobšěrne zasadźenje. Jutře tam Christopher-Street-Day přewjedu. Mjeztym je hižo prěnja demonstracija pod hesłom „hordy, němski, narodny“ blisko hłowneho dwórnišća přizjewjena. Tuž móhło tam k rozestajenjam dóńć.
Projektaj předstajił
Choćebuz. Nawoda předsydstwa předewzaća Łužiska energija a milinarnje (LEAG) Thorsten Kramer je wčera w Choćebuzu projektaj předstajił, kotrejž so na wobnowjomne energije wusměrjatej. Jónu je to solarna připrawa, kotruž fachowcy na jězoru wuchodnje Choćebuza instaluja. Tamna naprawa je park wětrnikow w Brězynce pola Baršća.
Češa w zahrodkownišću
Krótkopowěsće (15.08.24)
Sakska přeběrokratiska
Drježdźany. Zwjazkowy justicny minister Marco Buschmann (FDP) je sakskemu knježerstwu wumjetował, nimale telko běrokratije produkować kaž EU. Při tym so na rozprawu Sakskeje rady za kontrolu normow złožuje, zo změny krajneho prawa přiběrajcy ludźi financielnje poćežuja. To su Sakske Nowiny składnostnje narěče Buschmanna w Drježdźanach rozprawjeli.
Předstaja archiw a projekty
Berlin. Centrala za koordinaciju zachowanja pisomneje kultury (KEK) je widejo „Papjera powěda stawizny“ wozjewiła W filmje so Budyski archiwowy zwjazk předstaji. Wosebite ćežišćo twori wosom projektow, kotrež je KEK w Budyšinje z dohromady 150 000 eurami spěchowała. Tak restawrowachu mjez druhim historiske protokole měšćanskeje rady a wurjedźichu pergamentowe dokumenty.
Češa a brónje
Krótkopowěsće (14.08.24)
26 městnow podlěšili
Budyšin. Załožbowa rada je wčera podlěšenje časowje wobmjezowanych 26 dźěłowych městnow w serbskich institucijach hač do kónca 2025 wobzamknyła. Wo detailach zhonichu čitarjo našeho wječornika hižo 25. julija. Marko Kowar, předsyda załožboweje rady, wjesele zwěsći, zo „tute městna zaručeja dźěławosć we wobłukach, kiž maja za Serbow wysoku prioritu“.
Ralbicy su mjez stipendiatami
Drježdźany. Sakske ministerstwo za kultus je wčera 27 šulerkam a šulerjam stipendij přepodał. Spěchowanje wučinja něhdźe 100 000 eurow. Młodostni podadźa so wot septembra štyri tydźenje do wukraja a přebywaja we hóstnych swójbach. Mjez wuzwolenymi kubłanišćemi je Ralbičanska wyša šula. Šulerjo wopytaja mjez druhim Čěsku, USA, Španisku a Italsku.
Diskusija po konstituowanju
Krótkopowěsće (13.08.24)
Přibrjóh chcedźa wutwarić
Wojerecy. Zapadny přibrjóh Šibojskeho jězora ma so dale za turistow wutwarić, wuzběhny Wojerowski wyši měšćanosta na wčerawšej rozmołwje z nowinarjemi. Hižo loni bě Wojerowska měšćanska rada wobzamknyła, plan wobtwarjenja zhotowić dać. Krok po kroku ma so plan nětko zwoprawdźić. Mjez druhim nastanu při přibrjohu prózdninske domy.
Zažne wino lětsa njebudźe
Radebeul. Krutych zmjerzkow lětsa w aprylu dla produkuja sakscy winicarjo lětsa lědma woblubowany Federweißer. Straty na žnjach wina su cyle jednorje přewysoke. Winowe kiće dadźa winicarjo lětsa dozrawić, zo bychu prawe wino z nich zhotowili.
Wuradźowanja wo šulstwje
Budyšin. Serbske šulske towarstwo (SŠT) so wjeseli drje nad wotumom šulskeje konferency Radworskeje zakładneje šule za serbski 1. lětnik. Hišće pak wěc zdokonjana njeje. Kaž předsydka SŠT Katharina Jurkowa zdźěli, budu pjatk wječor z Domowinu a nawodami serbskich šulow wo koncepće 2plus a delegowanju serbskich wučerjow, přichodny tydźeń z kultusowym ministerstwom wuradźować.
Krótkopowěsće (12.08.24)
Wěriwi so rozžohnowali
Budyšin. W Budyskim klóštrje Klarisow mějachu wěriwi zawčerawšim składnosć so z wobydlerkami rozžohnować. Generalny wikar Drježdźanskeho-Mišnjanskeho biskopstwa Andreas Kutschke je kemše sobu swjećił. Krótko do 100lětneho wobstaća klóštra, sotry mjezsobnych njerozrisajomnych konfliktow dla klóšter w septembrje wopušća.
W dalšich cyrkwjach kradnyli
Budyšin. Wospjet zadobychu so njeznaći do cyrkwjow w Hornjej Łužicy. Nimo Róžeńčanskeje swjatnicy a Klóšterskeje cyrkwje w Pančicach-Kukowje (SN rozprawjachu) běchu skućićeljo minjeny pjatk w Ralbičanskej cyrkwi jałmožnicu pokradnyli. Wěcna škoda wučinja tam 250 eurow. Tež w Budyskej Tachantskej cyrkwi a w tamnišej ewangelskej farje paduchojo w nocy na pjatk zachadźachu a wulku škodu zawostajichu.
Mjenje słónčnych róžow
Krótkopowěsće (09.08.24)
Hroža demonstrantam z namocu
Budyšin. Druhi raz wotměje so jutře, sobotu demonstracija Christopher Street Day (CSD) za wjelorakosć, tolerancu, solidaritu a prawa queernych w Budyšinje. „Wěstotnych přičin dla“ bu akciji poprawom slědowacy swjedźeń wotprajeny W socialnych medijach namołwjeja prawicarscy ekstremisća mjenujcy k tomu, wobdźělnikow CSD namócnje nadběhować.
Zeleni za serbsku rjadownju
Drježdźany/Radwor. „Je dospołnje njeakceptabelne, hdyž so na serbskej šuli serbska rjadownja njezarjaduje“, praji kubłanskopolitiska rěčnica frakcije Zelenych w Sakskim krajnym sejmje, Christin Melcher, wo situaciji 1. lětnika na Radworskej zakładnej šuli. Melcher tež „špatnu komunikaciju“ ze stron krajneho zarjada za šulu a kubłanje ze šulu a staršimi raznje kritizuje.
Ukrainska kniharnja w Čěskej
Krótkopowěsće (08.08.24)
Dobrowólni šule podpěruja
Drježdźany. 220 młodych ludźi je ze spočatkom noweho šulskeho lěta swoje dobrowólne socialne lěto pedagogika na sakskich šulach zahajiło. Wjace hač 60 procentow z nich podpěruje šule we wjesnych kónčinach. Kultusowy minister Piwarz (CDU) podšmórnje, zo je so w minjenych lětach 80 procentow dobrowólnych po swojim socialnym lěće na studij wučerstwa podało.
Předaloko, přehłuboko, přehorco
Peking/Leuven. Chinscy a belgiscy slědźerjo su na zakładźe datow sondy Messenger eksperimentelnje dopokazali, zo „móhł Merkur geologisku worštu měć, kotraž je do 18 kilometrow tołsta a ryzy dejmantna“. Pokład wudobywać pak „budźe ćežko, wšako chowa so w hłubokosći něhdźe 500 kilometrow. Nimo toho je tola trochu zdaleny planet z hač do 480 stopjenjemi celsiusa dosć horcy.“
Rudne horiny lěpje škitać
Krótkopowěsće (07.08.24)
Domowinu njejsu informowali
Bukecy. „Rozsud AWO njebě za Domowinu wotwidźomny“, zdźěli nowinska rěčnica třěšneho zwjazka Božena Šimanec k wotstronjenju Witaj-skupiny. W rozmołwje na přeprošenje wjesnjanosty ze zastupjerjemi AWO, pěstowarnje, staršich a Domowiny spočatk apryla je jeničce wo polěpšenje situacije Witaj-skupiny šło. Domowina dale rozmołwy ze staršimi kaž tež AWO wjedźe (čitajće wjac jutře).
Myta młodym slědźerjam
Drježdźany. Lětuše wubědźowanje PEGASUS – šule adoptuja pomniki je zakónčene. Mjez mytowanymi su wyša šula Malešecy, Budyski Powołanskošulski centrum a Budyski Schillerowy gymnazij. Jich projekty steja pod hesłom „Naša šula ma stawizny, hrodowy park Bart“, „dopominać – wuslědźić – zrozumić“, wopomnišćo Budyšin II a „300 lěta Čěski móst“ w Hornjej Hórce.
Z bombami hrozyli
Krótkopowěsće (06.08.24)
Ralbičan šulerjo pisaja knihu
Ralbicy. 16 šulerjow 8. lětnika Serbskeje wyšeje šule Ralbicy přewjedźe lětsa zhromadnje z Ludowym nakładnistwom Domowina projekt „Naša serbska kniha“. Z wučerku serbšćiny Juliju Serbinec a lektorku Weroniku Žurowej nadźěłaja młodostni hač do nazymskich prózdnin wobsahi za swójsku serbsku knihu. W srjedźišću maja dopomnjenki bywšich šulerjow na swoju šulu stać.
Dźěłaja nětko hromadźe
Budyšin. Zapósłanče a zapósłancy stronow Lěwicy, SPD, Zelenych a Die Partei dźěłaja w Budyskej měšćanskej radźe wotnětka w frakciji „Soziales Nachhaltiges Budyšin“ hromadźe. Frakcija ma napřećiwny pol k sylnej frakciji AfD w radźe być. Frakciji přisłuša dohromady pjeć politikarkow a politikarjow. AfD ma tuchwilu wosom zapósłančow a zapósłancow w radźe.
Warnuja před kupanjom
