Krótkopowěsće (26.02.24)
Chcedźa zhromadnje postupować
Choćebuz. Město Choćebuz chce zhromadnje z wjacorymi akterami „sylnišo přećiwo prawicarskemu ekstremizmej postupować“. Towarstwo „Choćebuski rozmach“ a iniciatiwa „njedźělomna južna Braniborska“ stej tole po wčerawšim zeńdźenju wozjewiłoj. Nětko póńdźe wo to wobstejacy koncept přećiwo prawicarskemu ekstremizmej dale wuwić.
Mjedowe tydźenje zakónčili
Budyšin. Prěni raz wuhotowane Budyske mjedowe tydźenje buchu předwčerawšim „wuspěšnje zakónčene“. Wjeršk bě Šěrachowy pčołarski konwent z něhdźe 200 fachowcami-wobdźělnikami. Wustajeńca wo Hadamje Bohuchwałje Šěrachu w Centrumje při Žitnych wikach je po słowach iniciatora Güntera Sodana mjez druhim wuskutkowała, přehladku přichodnje w Žitawje prezentować.
Geografiska wěda prašana
Krótkopowěsće (23.02.24)
Wusud na dobro prawow mjeńšin
Luxemburg. Europske sudnistwo (EuGH) je štwórtk skóržbu Rumunskeje přećiwo planowanej Europskej wobydlerskej iniciatiwje za sylnjenje regionow a mjeńšin (EBI) wotpokazało a z tym prawa narodnych mjeńšin w Europje sylniło. Iniciatiwa zasadźuje so za lěpše připóznaće a spěchowanje regionow z hospodarskimi, socialnymi a kulturnymi wosebitosćemi w EU.
Na druhi protest z tvBunt
Budyšin. Swój hłós z pisanej dujerskej hudźbu přećiwo prawicarskemu ekstremizmej a za čłowjeskosć a demokratiju pozběhnyć, tomu słuži njedźelu wot 14 hodź. dalša demonstracija na Hłownym torhošću w Budyšinje. Protest ma wotewrjene město pokazać a měri so přećiwo wobrazej póndźelnych akcijow. Přeprošuje zwjazkarstwo tvBunt. Wočakuja kapału „Banda Comunale“ z Drježdźan.
Boja so pušćenych z jastwa
Krótkopowěsće (22.02.24)
Wustajeńca wo energiji
Hórnikecy. Kónc měsaca ma so w Hórnikečanskej Energijowej fabrice wustajeńca z titulom Power2Change – Mission Energiewende“ wotewrěć. Hač do 26. meje změja wopytowarjo składnosć, so intensiwnje z problemami a móžnymi rozrisanjemi na mjenowanu temu interaktiwnje rozestajeć. Samsny dźeń wotměwa so tam 10. Budyski Energijowy forum.
Žadaja sej měrowe jednanja
Kamjenc. Skupina prominentnych ludźi z Budyskeho wokrjesa sej wot zwjazkoweho knježerstwa iniciatiwu hromadźe z USA a druhimi wulkimi krajemi za měrowe jednanja Ruskeje a Ukrainy žada. Iniciatorojo su něhdyši krajny rada Michael Harig, Kamjenski wyši měšćanosta Roland Dantz, teologa Peter-Paul-Straube, lěkarka Ursula Straube a něhdyši wjesnjanosta Hodźija Peter Beer.
SLA digitalizuje twórby D. Kobjele
Krótkopowěsće (21.02.24)
Wotewru Astrocentrum Łužica
Zhorjelc. Zwjazkowa ministerka za slědźenje Bettina Stark-Watzinger (FDP) a sakski ministerski prezident Michael Kretschmer (CDU) wotewrětaj jutře w Zhorjelcu na Póstowym naměsće interimne stejišćo Astrocentruma Łužica. Na to wotměwaja so podijowa diskusija a přednošk kaž tež wjedźenje po tuchwilu přistupnych rumnosćach.
Kandiduja za wólby sejmika
Budyšin. K wólbam Budyskeho wokrjesneho sejmika 9. junija je tudyši wokrjesny zwjazk Zwjazka 90/Zelenych 37 wosobow nominował. Mjez nimi su Serbaj a Serbowka. Pětš Jahn-Brězan z Debšec kandiduje we wólbnym wokrjesu (wk) 2, Marija Untchowa z Bóšic we wk 5 a Julian Nyča z Prěčec we wk 7. W Bóšicach, Rakecach a Budestecach Zeleni k wólbam gmejnskich a wjesnych radow nastupja.
Hrajerjo małych rólow pytani
Krótkopowěsće (20.02.24)
Wjace podpěraćelow festiwala
Choćebuz. Mjeztym je 65 wosobow dźěłowu papjeru za woprawdźity Łužiski festiwal podpisało. Zajimcy móža lisćinu podpěraćelow pod www.echteslausitzfestival.de widźeć. Čłonojo iniciatiwy za woprawdźity Łužiski festiwal swoje mjeno njewozjewja, dokelž dožiwja ze lońšeje nazymy wosobinske nadběhi, wumjezowanja a difamowanja.
Wo deportaciji Słowjencow
Wien. Wustajeńca „Spuren. Sledi“ wuměłcow Karla Vouka, Vereny Gotthardt, Tanje Prušnik a Marka Lipuša budźe wot 22. małeho róžka tydźeń w awstriskim parlamenće we Wienje widźeć. Wona so wěnuje mjez druhim deportaciji 277 swójbow Korutanskich Słowjencow za čas knjejstwa nacijow. Wuměłcy ze swojimi twórbami tež na dóńt swojich potrjechenych prjedownikow dopominaja.
Wočakuja haćenja stawka dla
Krótkopowěsće (19.02.24)
Berlinala: SJ Chrósćicy w filmje
Berlin. W zwisku z lětušimi europskim mišterstwom w kopańcy su Mnichowscy studenća Wysokeje šule za telewiziju a film „Elf Mal Morgen: Berlinale Meets Fußball“ zhotowili. Zapřijaty do filma je tež krótkofilm wo serbskich koparjach Chróšćanskeje sportoweje jednotki. Film wobhladać móžeće sej srjedu, štwórtk a sobotu, hlejće prošu w interneće program www.berlinale.de.
Zaso w Budyšinje za čłowjeskosć
Budyšin. Z pisanej dujerskej hudźbu přećiwo prawicarskemu ekstremizmej, zhromadnje za čłowjeskosć a demokratiju – pod tutym hesłom chcedźa přichodnu njedźelu, 25. małeho róžka, wot 14 hodź. w Budyšinje demonstrować. Po informaciji rěčnicy „trägerverBUNT Budyšin“, Maren Düsberg, nawjazuja z tym na prěnju manifestaciju 27. wulkeho róžka z 1500 wobdźělnikami.
Přistawnišćo njebudźe
Krótkopowěsće (16.02.24)
Diferencu móža wurunać
Róžant. Zo móhła gmejna Ralbicy-Róžant diferencu w swojim lětušim hospodarskim planje wurunać, dyrbja 255 000 eurow ze swojich likwidnych srědkow nałožić. Tole zdźělichu na wčerawšim posedźenju gmejnskeje rady. Dohromady chcedźa něhdźe 3,8 milionow eurow wudać. Najwjetše wudawki planuja za nowotwar Ralbičanskeje pěstowarnje. (Wjace wo tym w póndźelnym wudaću.)
Wupisanje serbskeje rady
Drježdźany. Wupisanje za dźěłowe městno wěcywobdźěłarki w jednaćelni Rady za serbske naležnosće Sakskeje běži hač do kónca měsaca. Požadarjo njech zapodadźa podłožki na personal@ smwk.sachsen.de. Dźěłowy čas wučinja 20 hodźin tydźensce. Dźěło doma je móžne a tež wjac dźěłoweho časa – přez nadawk w spěchowanju kultury.
Pjenjezy za dźiwadło
Halle/Budyšin. Kulturna załožba Zwjazka spěchuje pjeć nowych projektow ze cyłkownje 746 100 eurow w swobodnym staće. Tole zdźěli załožba wčera w Halle. Z toho profituje mjez druhim Němsko-serbske ludowe dźiwadło w Budyšinje, kotrež ma za festiwal „Witajće druhdźe“ 77 100 eurow dóstać. Zarjadowanje chcedźa w septembrje wotměć.
Krótkopowěsće (15.02.24)
Podpěra za socialny angažement
Drježdźany. Sakske socialne ministerstwo podpěruje wjace hač połsta „socialnych městnosćow“ za zetkanje a angažement. W Budyskim wokrjesu su to mj. dr. Radworske dwórnišćo inkluzije, towarstwo Verein(t) für Wittichenau e.V a towarstwo Wojerowska kulturna fabrika, we Zhorjelskim wokrjesu gmejna Rěčicy a přirodowědna stacija Dołha Boršć.
WK1 pod pomnikoškit?
Wojerecy. Hižo dołho angažuje so Wojerowska iniciatiwa „Mitmachstadt“ wo zdźerženje platoweju domow w Nowym měsće. Měšćanska bydlenska towaršnosć chce domaj zwottorhać, dokelž ma saněrowanje za předrohe. Hač do kónca měrca pruwuje nětko krajny zarjad za pomnikoškit, hač měł bydlenski kompleks WK1 škitny status dóstać, to zdźěli krajny konserwator Alf Furkert.
Termin hišće jasny njeje
Krótkopowěsće (14.02.24)
Sakske předewzaća zeznać
Budyšin. Z darmotnym tiketom podpěruje wobchadny zwjazk Hornja Łužica-Delnja Šleska (ZVON) šulerjow, kotřiž chcedźa so na tydźenju wotewrjenych duri sakskich předewzaćow wobdźělić. Akcija pod hesłom „Pohladaj nutř“ wotměje so wot 11. do 16. měrca. Dnjowy tiket je na wosobu wjazany a płaći za wšitke regionalne a měšćanske zwiski z busom kaž tež z ćahom.
EksperiMINT-campus wopytałoj
Radwor. Dr. Stefan Ohm, wědomostny sobudźěłaćer w Astrocentrumje Łužica (DZA) je wčera hromadźe ze serbskej studentku astrofyziki Johannu Šurec zymski prózdninski campus w Radworju wopytał. Wobaj staj ze šulerjemi eksperimentowałoj a app za spóznawanje hwězdnišća předstajiłoj. Nimo toho informowaštaj wo přichodźe DZA we Łužicy.
Wjace padow hač loni
Krótkopowěsće (13.02.24)
Wjele dočasnje šulu wopušći
Berlin. Kwota młodych ludźi w Němskej, kotřiž šulu dočasnje wopušća, je z 12,2 procentami wyša, hač na runinje EU. Tam wučinja wona 9,6 procentow, tak zdźěli statistiski zarjad EU Eurostat. Jenož Rumunska, Španiska a Madźarska maja hišće wyše kwoty.
Spominaja na zničenje 1945
Drježdźany. Město Drježdźany spomina dźensa z mnohimi zarjadowanjemi na zničenje města před 79 lětami. Politika a towaršnosć chcetej po tradiciji z rjećazom ludźi přez historiski centrum a přez Łobjo tónraz wosebje sylne znamjo za měr a demokratiju pokazać. Tež sakski ministerski prezident Michael Kretschmer (CDU) a wyši měšćanosta Dirk Hilbert (FDP) so wobdźělitaj.
Debata wo wulkopósłanstwje
