Krótkopowěsće (08.07.24)
Trajnu wustajeńcu předźěłali
Choćebuz. Choćebuski centrum za čłowjeske prawa w bywšej chłostarni města je swoju trajnu přehladku wo stawiznach jastwa mjez 1933 a 1945 předźěłał. Nowy wupłód chcedźa jutře mjez druhim w přitomnosći statneje ministerki za kulturu Claudiju Roth (Zeleni) a braniborskeho ministerskeho prezidenta Dietmara Woidkeho (SPD) wotewrěć.
Stadion chcedźa přetwarić
Choćebuz. Hospodarski region Łužica chce dale z towarstwom Energiju Choćebuz wo alternatiwnych móžnosćach spěchowanja hladajo na přetwar stadiona pytać. Towarstwo bě próstwu wo spěchowanske srědki z hornca za strukturne spěchowanje Zwjazka přihotowało, tuta pak wuspěšna njebě. Spěchowanje sporta je zakładnje naležnosć zwjazkowych krajow.
Němski terminal tež za Čěsku
Krótkopowěsće (05.07.24)
Nowy prezident Rotary-kluba
Radwor. Na swojim wčerawšim zeńdźenju w Radworskim hocencu „Meja“ su čłonojo Budyskeho Rotary-kluba noweho prezidenta wuzwolili. Zastojnstwo přewozmje nětko na jedne lěto lěkar a diabetologa dr. Tomaš Bulank. Budyšan běše hižo w předsydstwje dźěłał, w kotrymž su mjeztym hižo wjacori Serbja skutkowali.
Prěnja přepinarnja LEAG dźěła
Choćebuz. Łužiska energija a milinarnje (LEAG) je prěnju přepinarnju za klimje přichilenje produkowanu milinu syći připinyła. Přepinarnja Kotłow (Kathlow) blisko nastawaceho solarneho parka deponija Janšojce ma wukon transformatora 50 MVA a dodawa milinu do regionalneho 110-kV-milinowoda syće MITNETZ Strom. LEAG planuje tuchwilu twar hišće dalšich tajkich připrawow.
Nowa směrnica na dobro Serbow
Krótkopowěsće (04.07.24)
Najwjetši přirost mzdy
Kamjenc. W Budyskim wokrjesu je přerězna mzda na wosobu w lěće 2022 po cyłej Sakskej najbóle postupiła. Tam zasłužichu dźěłopřijimarjo něhdźe 32 600 eurow, 5,1 procent wjace hač w lěće do toho, krajny statistiski zarjad wčera w Kamjencu zdźěla. W Zhorjelskim wokrjesu přiběraše přerězna mzda na wosobu wo 4,9 procentow na nimale 31 200 eurow.
Kubłanje za demokratiju sylnić
Drježdźany. Sakski kultusowy minister Christian Piwarz (CDU) chce z nowym konceptom „W wie Werte“ wuwučowanje demokratije na šulach podpěrować. „Z tym damy wučerjam načasny instrument do rukow, kotryž jich při demokratiskim a politiskim kubłanju sylni“, wón praji. Mnohe wot fachowcow doporučene naprawy su tež wobstatk kubłanskeje strategije „Kubłanski kraj Sakska 2030“.
Skonstituowace posedźenje
Krótkopowěsće (03.07.24)
Wjac wučomnikow za hladanje
Kamjenc. Ličba wučomnikow, kotřiž rozsudźichu so loni za wukubłanje w hladanskim powołanju, je rozrostła. Kaž krajny statistiski zarjad w Kamjencu zdźěli, bě jich cyłkownje 8 856 žonow a muži z wotpowědnym wukubłanjom. To je rozrost wo 7,7 proc. Podźěl žonow je 74,7 proc. Mjez wučomnikami su tež dorosćeni nad 30 lět.
Wotewrja běrow w Ulan Batoru
Drježdźany. W nadawku sakskeho ministerstwa za wědomosć kaž tež sakskeje krajneje konferency rektorow wotewrě Freibergska hórniska akademija w mongolskej stolicy Ulan Bator nowy wědomostny zwiskowy běrow na campusu tamnišeje uniwersity. Swobodny stat chce tu młodych Mongolčanow na studij do Sakskeje wabić.
Drohoćinki zaso „doma“
Krótkopowěsće (02.07.24)
Zakazowa skóržba aktiwistomaj
Choćebuz. Koncern LEAG chce aktiwistomaj, kotrajž běštaj w lěće 2019 brunicowe bagry blokowałoj, „přistup k jamam a haćenje tamnišich dźěłowych procesow“ juristisce zakazać. Móžna pokuta wučinja hač do 250 000 eurow. Proces bu dźensa na krajnym sudnistwje w Choćebuzu zahajeny. Organizaciji Robin Wood a Ende Gelände matej „zakazowu skóržbu, kotrejež zaměr je hłownje dalšim protestam zadźěwać“, za njewoprawnjenu a připowědźitej tuž demonstracije.
Čara zapusćenja w Žylowje
Choćebuz. Wichorowa trubjel je 300 metrow dołhu čaru zapusćenja po chójninje a Škodowskim puću wčera wječor w měšćanskim dźělu Žylowje zawostajiła. Sćěhi běchu wotkryte a wobškodźene třěchi, spowalene a wuwróćene štomy, po powětru lětacy campingowy wóz a wobškodźene awta, kaž město informowaše. Wjedra dla měješe wohnjowa wobora 17 zasadźenjow jeničce w Žylowje.
Powabjenje wo myto móžne
Krótkopowěsće (01.07.24)
Nowa nawodnica lěsnistwa
Drježdźany. Britta Lolk je nowa nawodnica lěsniskeho wobwoda Hornja Łužica. Wona naslěduje na wuměnk rozžohnowaceho so Holma Karaßa. Jednaćel Sachsenforst Utz Hempfling ma ju za „absolutnu fachowču, kotraž wě z wužadowanjemi změny klimy a struktury w regionje wobchadźować“. Wot dźensnišeho je Lolk za něhdźe 8 000 hektarow lěsa we wobsydstwje Sakskeje zamołwita.
Z biosferowym certifikatom
Malešecy/Hućina. W biosferowym rezerwaće Hornjołužiska hola a haty maja z dźěćacym domom „Při łučinowym lěsu“ w Hućinje prěnju certifikowanu biosferowu dźěćacu dnjowu přebywarnju. Nawoda zarjadnistwa Torsten Roch je wopismo a mału lipu nawodźe dźěćaceho domu Wilhelmej Trittmacherej minjeny pjatk we wobłuku wjesneho a hatneho swjedźenja přepodał.
Indonezojo do Čěskeje
Krótkopowěsće (28.06.24)
Dar za inscenaciju
Čorny Chołmc. Załožba Łužiska jězorina podpěruje lětušu Krabat-Saga Kulturneho centruma Krabatowy młyn z pjenježnym darom. Suma 15 000 eurow je předewšěm za kostimy a awtentiske serbske drasty předwidźana. Aktualna inscenacija „Na spočatku je swětło“ twori sylny zwisk mjez k stawiznam a tradicijam regiona. Wšitkich 16 předstajenjow je wupředatych.
Wukubłanske městna swobodne
Budyšin. Ličensce je za wšěch, kotřiž chcedźa powołanje nawuknyć, we wuchodnej Sakskej městno swobodne. Aktualnje je 1 149 młodych ludźi při Budyskej wotnožce agentury za dźěło a jobcenteromaj Budyšin a Zhorjelc přizjewjenych, kotřiž wukubłanskeho městna dotal nimaja. Runočasnje je hišće 1 223 njewobsadźenych wukubłanskich městnow w regionje, agentura dźensa zdźěla.
Listowe wólby schwalili
Krótkopowěsće (27.06.24)
Pjenjezy za LAB schwalene
Budyšin. Dohromady 68,6 milionow eurow je etatny wuběrk zwjazkoweho sejma wčera za planowany slědźerski centrum za twarske maćizny LAB w Budyšinje schwalił. „To je dobra powěsć za wobydlerstwo w našim wokrjesu a za twarske hospodarstwo po wšěm swěće“, wuzběhnje Budyski krajny rada Udo Wićaz (CDU) w nowinskej zdźělence. LAB přeslědźuje móžnosće, kak hodźało so spěšnje, tunjo a naslědnje twarić.
Europa nadal přewjele pije
Genf. Po aktualnej studiji zwěsća Swětowa strowotniska organizacija WHO, zo hodźi so „Europa nadal jasnje po rozdźělnych wašnjach konsuma alkohola rozrjadować, korjenjace hłuboko w kulturje“. Tak pije so na wuchodźe najwjace palenca a na juhu skerje wino. Zasadnje měło so „njewotwisnje wot družiny mjenje pić, wšako zemrěje na 100 000 wobydlerjow na přikład w Němskej 25, w Pólskej 50 a w Ukrainje 125 ludźi wob lěto direktnje w zwisku z alkoholom“.
„Winnetou II“ z nowym rekordom
Krótkopowěsće (26.06.24)
Narodninski „doodle“ z efektom
Budyšin. Składnostnje narodnin Miny Witkojc je platforma Google 28. meje doodle mjenowanu grafiku, zhotowjenu wot Choćebuskeje wuměłče Siggiko, wozjewiła. Jónkrótna akcija je mjez druhim wuskutkowała, zo je sej tójšto zajimcow wideja z recitacijemi basnjow Witkojc na digitalnym kanalu Zwjazka serbskich wuměłcow „SerbskiTV“ wobhladało. Dohromady zliči towarstwo jeničce na tymle dnju něhdźe 1 500 klikow, kaž předsyda Jan Bělk wčera zdźěli.
Njezbožo w konwoju
Triebel. Na wróćojězbje z wobydlerskeje rozmołwy we Vogtlandźe wčera je awto, w kotrymž bě mjez druhim sakski ministerski prezident Michael Kretschmer (CDU) z pasažěrom, njezbožo zawinowało. Jězdźidło bě so sornje wuhibnywši přewodźaceho awta dótknyło. Zranił so něchtó njeje, nasta pak wěcna škoda.
Máchovo jezero sej wotkryć
Krótkopowěsće (25.06.24)
Stup dale njepopušći
Drježdźany. Drježdźanske towarstwo Stup dale chce z nowymi wobsahami dotalnych a dalšich čłonow do dźěła wabić.
Mjez druhim chcedźa škotowy turněr přewjesć. Dale móhli sej přirodny camp za serbske swójby w lětnich prózdninach předstajić a mejlowy rozdźělak ma so ponowić. Dźěćacy kruh porno tomu chcedźa dale wjesć.
Spěchuje pólsko-sakske projekty
Drježdźany. Europska unija financuje we wobłuku spěchowanskeho programa Interreg Pólska-Sakska štyri nowe mjezy přesahowace projekty z dohromady 5,5 milionami eurow. Mjez nimi je z 1,1 milionom spěchowany projekt, w kotrymž kooperuja Pólski centrum za technologiske wuwiće z Wrócławja, TU Drježdźany a Budyski centrum załožićelow tzwr na dobro wuwiwanja MINT-kompetencow młodostnych.
Hornjołužičan nowy šef
