Krótkopowěsće (09.01.24)
Dźěła za škit zwěrjatow
Drježdźany. Nowa społnomócnjena za škit zwěrjatow w Sakskej je 45lětna skótna lěkarka Carina Heinrich. Wona je nowowutworjene zastojnstwo k zesylnjenju škita a derjeměća zwěrjatow spočatk lěta nastupiła. Jeje hłowne nadawki stej njewotwisne poradźowanje zarjada za škit zwěrjatow a knježerstwa kaž tež wudźěłanje iniciatiwow přez rozmołwy z powołanskimi a fachowymi zwjazkami.
Gmejna so přesadźiła
Choćebuz. Gmejskej dźělej Wjeliki Kólsk (Groß Kölzig) a Mały Kólsk (Klein Kölzig) w gmejnje Dolina Nysy a Małkse (Neiße-Malxetal), wokrjes Sprjewja-Nysa, njejstej wobstatk serbskeho sydlenskeho ruma w Braniborskej. Choćebuske zarjadniske sudnistwo je loni 14. decembra wotpowědne zdźělenje ministerstwa za wědomosć, slědźenje a kulturu zběhnyło, zdźěli wčera nowinski rěčnik sudnistwa na naprašowanje Serbskich Nowin.
Tež dźěći šćěpić dać
Krótkopowěsće (08.01.24)
FDP: Migracija a energija ćežišći
Budyšin. Sakscy liberalni maja so za lětuše wólby krajneho sejma přihotować. Z tym zwisowace wužadanja chcedźa přiwzać a zmištrować. To je designowany načolny kandidat Robert Malorny sobotu na zetkanju sakskeje FDP w Budyšinje podšmórnył. Jako ćežišći je wón wobłukaj migraciju a energiju mjenował, tu njejstej knježerstwje w kraju a Zwjazku aktiwnje dosć jednałoj.
Muž po rozestajenju zemrěł
Biskopicy. 50lětny muž je po rozestajenju w nocy na njedźelu w Biskopicach na swojich zranjenjach w chorowni zemrěł. 18lětny bu ćežko zranjeny. Jeho medicinisce dohladuja, kaž je policija wčera zdźěliła. Na Starym torhošću běchu so do toho wjacori ludźo mócnje do hłosow dóstali. Po prěnich přepytowanjach su zastojnicy 44lětneho muža zajeli.
„Ruske bajki“ wotpokazali
Krótkopowěsće (05.01.24)
Serbskaj žurnalistaj pola bamža
Rom. Składnostne 75. róčnicy załoženja Zjednoćenstwa katolskich publicistow Němskeje přebywaja tuchwilu 30 žurnalistow w Romje. Mjez nimi staj tež serbskaj zastupjerjej: Rafael Ledźbor (Katolski Posoł) a Bogna Korjeńkowa (MDR). Štwórtk přija jich bamž Franciskus na priwatnu awdiencu, na kotrejž jich na wažnosć wěry při dźěle skedźbnješe.
Zymski swjedźeń wupadnje
Nuknica. Tradicionalny Jolka-swjedźeń, kotryž wotměwa so stajnje spočatk januara w Nuknicy, lětsa wupadnje. Jako hłowna přičina mjenuje so přesnadna ličba pomocnikow za na- a wottwar swjedźenišća. Wšelake cyłki běchu so hižo wot nazymy intensiwnje na program přihotowali. Po móžnosći maja so přinoški na klětušim swjedźenju, kotryž wjesne towarstwo zaso planuje, zapřijeć.
Busowe čakarnje přetwarili
Krótkopowěsće (04.01.24)
Pstruha w Němskej wohrožena
Berlin. Leibnitzowy institut za ekologiju wodźiznow a nutřkokrajne rybarstwo wozjewi w swojej prěni raz po lěće 2009 aktualizowanej lisćinje słódkowódnych rybow a dźewjećwokačow zastopnjowanje pstruhu jako wohroženu. Cyłkownje 38 družin a z tym wjace hač połojca domoródnych družinow je wohroženych. Přičiny su „zanjerodźenje wodźiznow, stupace temperatury kaž tež niši podźěl kislika we wodźe změny klimy dla“.
Festiwal wotprajili
Zhorjelc. „Dny Messiaena 2024“ w Zhorjelcu so w planowanej formje wotměć njemóža. Přičina je po podaću festiwal wuhotowaceho towarstwa Meetingpoint Memory Messiaen „njepřizwolenje spěchowanja mjez druhim ze stron Kulturneho konwenta wokrjesow Budyšin a Zhorjelc“. Tradicionalny koncert „Kwartet na kóncu časa“ chcedźa přiwšěm wuhotować, a to 15. januara.
Ptaču mrětwu zwěsćili
Krótkopowěsće (03.01.24)
Zawody dale zaměrnje inwestuja
Drježdźany. Najebać skerje špatne konjunkturne wuhlady inwestuja rjemjeslniske zawody Drježdźanskeho komorneho wokrjesa tójšto mocow do wukubłanja. Cyłkownje 498 žonow a 1 619 muži su loni wukubłanje zahajili. Tuž rozsudźi so wjace hač 2 000 młodych ludźi za karjeru w rjemjesle. Přiwšěm pak je to 2,2 procentaj mjenje hač lěto do toho.
Wjace wopytowarjow witali
Hamor. We Wochožanskim Parku błudźenkow su loni dohromady 61 000 wopytowarjow zličili, něhdźe 7 000 wjace hač lěto do toho. Wjerški běchu po podaću spěchowanskeho towarstwa parka jubilejne zarjadowanje k 20lětnemu wobstaću w meji, holanski swjedźeń w septembru a halloween-swjedźeń w oktobru. Po zymskej přestawce wotewrja park 15. měrca, mjez planowanymi zarjadowanjemi su wospjet rostlinowe wiki a koncert na dnju maćerje.
Euro w Čěskej njewěste
Krótkopowěsće (02.01.24)
Wulka ličba pacientow
Wojerecy. Wojerowski klinikum Łužiska jězorina je chorownja za ćežišćowe zastaranje ze 14 fachowymi wotrjadami a třomi institutami. Na lěto zastaruja wjace hač 30 000 pacientow ambulantnje a 17 000 stacionarnje, kotřiž tam w lěće 2021 přerěznje 5,4 dnjow přebywachu. Klinikum je akademiske wukubłanišćo z mediciniskej powołanskej fachowej šulu.
Klubaj bilancowałoj
Radwor/Chrósćicy. Młodźinskej klubaj w Radworju a Chrósćicach přewjedźeštej minjeny dny swojej hłownej a wólbnej zhromadźiznje. Nimo bilancowanja zašłeho a wuhladow do noweho lěta wuzwoli Chróšćanski klub Luciana Zahrodnika za noweho předsydu.
Rentu disidentam dorunaja
Krótkopowěsće (29.12.23)
Serbska murja bilancowała
Jaseńca. Lěto 2023 bě najwuspěšniše w dotalnym dźěle towarstwa Serbska murja. Tole wuchadźa z bilancy předsydstwa na wčerawšej hłownej zhromadźiznje w Jaseńcy. Předewšěm mjenowachu widejowy format Stawiznak a wubědźowanje Kwisk a trysk. Wobaj projektaj chcedźa klětu wospjetować a dale wuwiwać. Za jeje skutkowanje spožči so Serbskej muri lětsa Myto Domowiny za dorost.
Serbski sejm prosy wo dary
Njebjelčicy. Serbski sejm prosy Serbow wo pjenježnu podpěru, zo bychu klětuše druhe listowe wólby ludoweho zastupnistwa přihotować móhli. Kaž w aktualnej zdźělence rěčnicy Jadwigi Pjacec rěka, trjeba čestnohamtsce skutkowacy gremij dary za zjawnostne dźěło a wusyłanje wólbnych podłožkow. Daty wotpowědneho konta su na internetnej stronje www.serbski-sejm.de přistupne.
Amoka dla mjenje wohnjostroja?
Krótkopowěsće (28.12.23)
Politika měła skónčnje jednać
Drježdźany. Rjemjeslnicy w Sakskej žadaja sej dołhodobne rozrisanja za problemy město małych krokow. Za to pobrachuje politice na runinje Zwjazka „hišće móc“, kritizuje Jörg Dittrich, prezident Drježdźanskeje rjemjeslniskeje komory a Sakskeho foruma rjemjeslnikow, w lěto 2023 bilancowacej zdźělence w Drježdźanach. Na přikład so njeje poradźiło běrokratiju wobknježić.
Podpěra za wosom projektow
Budyšin/Wostrowc/Wulke Hendrichecy. Wosom projektow Budyskeho komiteja z.t., Załožby mjezynarodny zetkawanski centrum Marijiny Doł a Wobswětoweje knihownje Wulke Hendrichecy z.t. spěchuje Zwjazkowa załožba za přeslědźenje diktatury SED klětu z dohromady 101 111 eurami. Jedne ćežišćo su zarjadowanja wo ludowym zběžku w NDR 17. junija 1953, dalše wudobywanje a zmilinjowanje brunicy w sakskim krajnym třiróžku.
Młodostni narěče dokumentuja
Krótkopowěsće (27.12.23)
DGB: W Sakskej njeměr knježi
Drježdźany. Bilanca DGB Sakskeje za nachilace so lěto je wostrózbjaca. „W Sakskej knježi njeměr, nic jenož politisce, ale tež hladajo na dźěłowe wuměnjenja ludźi. Špatne mzdy, špatne dźěłowe časy a pobrachowace sobupostajowanje bjez skorženja dawno wjace njeakceptuja, ale dźěławi so wobaraja“, rjekny šef DGB Markus Schlimbach powěsćerni dpa. Dźěłodawarjow namołwi, zo njebychu dlěje na joby z niskimi mzdami sadźeli.
Předsydu wobkrućili
Budyšin. Towarstwo Škit Budyšin je na swojej hłownej a wólbnej zhromadźiznje 23. decembra Roberta Krawca jako předsydu wobkrućiło. Nimo wólbow bilancowachu tež zašłe lěto w kotrymž zwoprawdźichu mnohe projekty, mjez nimi spěwanje na adwentnych wikach. Za klětu planuja, zahrodu w starym měsće za serbsku zjawnosć wuhotować.
Hilža Nukec zemrěła
Krótkopowěsće (22.12.23)
Łužica mało potrjechena
Drježdźany. We Łužicy njejsu wěstotne słužby a policija wulke škody wichora Zoltana dla zwěsćili, kiž je zašłu nóc zachadźał. W prěnim rjedźe rozrubachu a zrumowachu wohnjowi wobornicy jednotliwe štomy, kotrež běchu na dróhi padnyli. W cyłku běchu woni w Hornjej Łužicy 15 króć, mj. dr. we Wojerecach, Kubšicach a Lubiju po puću.
Šulske połlěto zakónčene
Budyšin. Sakscy gymnaziasća 12. a 13. lětnika, kotřiž so na maturu přihotuja, su hižo dźensa swoje połlětne wuswědčenje přijeli. Šulerjo powołanskošulskeho gymnazija mějachu dokument zdźěla hižo wčera w ruce. Přičina za to je nadměru krótke šulske lěto. Posledni šulski dźeń za abiturientow je klětu kónc měrca.
Rozrost wukrajnikow w Čěskej
Praha. Po zdźělenju Čěskeho statistiskeho zarjada je ličba wukrajnikow w Čěskej dotalny rekord docpěła. Wokomiknje jedna so wo 1,1 milion ludźi, to rěka 10,3 procentow wobydlerjow kraja. Jenož třećina pak změje dowolnosć k trajnemu přebywanju. Wulki rozrost zwisuje wosebje z přiwzaćom wjace hač 600 000 ukrainskich ćěkancow na přechodne přebywanje.
