Kolesa w hrjebi leželi

Sepicy. Hižo minjenu njedźelu rano je muž w Bólericach pola Sepic w jednej hrjebi tři kolesa wuhladał. Wo tym drje informowaše wón policiju hakle dwaj dnjej pozdźišo, na zbožo pak hišće sčasom. Jako mjenujcy wobsadka policaj­skeho awta k wopisanemu městnu při­jědźe, tři kolesa hišće w chowance ležachu. Při přepruwowanju ramikowych čisłow so wukopa, zo bě znajmjeńša jedne koło pokradnjene. Dźěćace hórske koleso bě so hižo minjeny pjatk w Bambruchu pola Kamjenca zhubiło. Zwotkel tamnej pochadźatej, njeje hišće zwěsćene. Na kóždy pad so policija wuchodźowarjej za informaciju dźakuje, prosy pak, tajke něšto hnydom zdźělić.

Z třěchi sej njezwěrił

Budyšin. Komisar připad je policiji za­wčerawšim popołdnju w Budyšinje na runjewon kuriozne wašnje pomhał dosahnyć skućićela, kiž bě w nocy do toho při zadobywanju do předawanišća zakuskow na Hošic hasy wobdźěleny (SN rozprawjachu). Wobydlerjo mjenujcy ně­hdźe w 14 hodź. na policiju zazwonichu, zo na třěše přitwara na zadnim dworje předawanišća młody muž sedźi. Kaž so pozdźišo wukopa, bě sej wón tam přez schodźišćo domu wućeknył, zo by so před zastojnikami schował, jako woni při zadobywanju zapřimnychu a w předawanišću dweju paduchow lepichu. Jako komplica po tym na třěše sedźeše, so wón najskerje dopomni, zo so wysokosće boji, a njeje sej hižo dele zwěrił. Wobsadka policajskeho awta Budyskeho rewěra tuž rěbl přistaji, 19lětnemu dele kazaše a jeho nachwilnje zaja.

Zadobywarjow lepili

Budyšin. Młodostnaj w starobje 17 a 19 lět běštaj so w nocy na póndźelu do hosćenca na Budyskej Hošic hasy zadobyłoj. Po tym zo staj sej žiwidła do nachribjetnikow spakowałoj, chcyštaj tež kasu wočinić. Policija pak bě spěšniša a jeju nachwilnje zaja. Před durjemi čakacaj komplicaj so zminyštaj.

Awtomat a budku rozbuchnyli

Wojerecy. Wobydlerjo Lipjeckeho naměsta buchu wčera rano wot detonacije njejapcy ze spara torhnjeni. Kaž přiwołani policisća zwěsćichu, bě něchtó krótko po 4 hodź. při centeru Treff 8 cigaretowy awtomat rozbuchnył. Při tym skóncowaštej so tohorunja škleńčana třěcha a wokno susodneho frizerskeho salona. Škoda wučinja něhdźe 8 000 eurow. Jenož něšto mjeńšin pozdźišo je na Hufelandowej mócnje prasnyło. Tam bě přičina rozbuchnjena telefonowa budka. Jeje zbytki běchu we wobkruhu hač do 30 metrow rozbrojene. Načinjenu škodu trochuja tule na wjacore tysacy eurow. We woběmaj padomaj kriminalna poli­cija přepytuje. Konkretne pokiwy na skućićelow pak dotal nima.